Read Biblia Mixe de Quetzaltepec Salmo 146 Bible Online

Salmo 146 - Biblia Mixe de Quetzaltepec bible

Salmo 146

¹Tukxoontä'äky mëjjawë Tios yë xyëëw nyaxëty. Nmëjpëjkta'akäämpyës yë Wintsën winë aaw winëjot.

²Nmëjpëjkta'akäämpyës yë Wintsën mapaatës njuuky'ätyën, nkuuy'ëwäämpyës yë Tios mëti'ipës nTios'ajtypyën, maas tyam njuuky'ätyën.

³Këtii xytyuk'ijxpätëty yë naaxwiinyëtë ja'ay ko mëj'äämpy yajpaaty ma myënaaxwiinyëtë ja'ayën mëti'ipë ka'ap myäyëtëtyën yajnitso'okëty.

⁴Ko y'ooktëty naaxway y'awinpita'antë, jä'ä xëëw winë y'atëkooytyä'äy mëti'ipë të tjamay të tjatajyën.

⁵Janty jotkujk yë ja'ay yajpaaty mëti'ipë yë putëjkën y'ëxajëpën ma Tiosën, Tios, mëti'ipë Jacob y'ëwtajtën, mëti'ipë jam pyëjktäkpyën yë jyot wyinma'any ma Wintsënën mëti'ipë Tyios'ajtypyën.

⁶Yë'ë yajkoj ja tsajp ets naax, yë mejy ets tu'kë'ëyë mëti'ipë yajpatp ma yë'ëjëtyën, mëti'ipë nyikäjpxypën, jä'ä tyuunpy.

⁷Yë'ë nyipaye'epy ja ja'ay mëti'ipë ëxëëk jajtp këpäjtpën, kyääkymyoopy jyi'kxymyoopy ja ja'ay mëti'ipë yuu'o'këpën. Yë Wintsën yaj'ëwaatsëpëtsëëmpy ja ja'ay mëti'ipë tsumy matsy ijtpën.

⁸Yë Wintsën yaj'ijxë'kpy yë ja'ay mëti'ipë wiintsën, yajjotkujktäkpy yë ja'ay mëti'ipë ëyo'ontum yajpatpën; tsyojkpy jya'ap näjyëtu'un yë ja'ay mëti'ipë oy yajxon juuky'ajtëpën.

⁹Yë Wintsën kyuwäämpy yë jaaypyaat jaaypyo'kxy, Kyëwent'ajtyp yë ku'ooky u'unk ku'ookytyo'oxy, e yë ëxëëkja'aytyëjk yë'ë kë'ëm yajnë'ëtëkoopy yajtu'utëkoopy.

¹⁰Mijts Sión kajpn, yë Wintsën jam xëmë ënä'ämaanp ma mijtsën; yë mTios yë'ë yajkutukaanp winë xëëw winë jëmëjt. Tukxoontä'äky mëjjawë Tios yë xyëëw nyaxëty.