Read Biblia Mixe de Quetzaltepec Salmo 149 Bible Online

Salmo 149 - Biblia Mixe de Quetzaltepec bible

Salmo 149

¹Tukxoontä'äky mëjjawë Tios yë xyëëw nyaxëty. Tukwin'ëwtë yë Wintsën yë ëy yä'äxy jemyëtypë, mmëjpëjkta'aktë ma tsyëënëtën yë wa'ats ja'aytyëjkëty.

²Xoonta'aktë miitsëty Israel ja'ayëty, miitsëty naax kajpn jampë myajpaatën Sión, jä'ä ko Tios yë'ë yajkojpë ets yë'ë yajkutujkpë ma miitsëtyën.

³Mmëjpëjkta'aktë yë xyëëw mëët yë ety tëki'ixy, ëwtë ya'axtë yë ëy, tukpa'ëna'antë yë xijn ets kow,

⁴jä'ä ko Tios tyukxoontäkpy yë nyaax kyajpn; yajmëtäkpy yë ja'ay yu'unk naxymyëpë jyuuky'atën.

⁵Xoonta'aktë miitsëty wa'ats ja'aytyëjkëty ko të mmëta'aktë, ko mma'atëty mpo'kxtëty akujk jotkujk myajpaata'antë.

⁶Mmëjpëjkta'aktë yë Tios mëët ja aaw ayuk, kajpë'ëktë yë mtëypyujxnëty mëti'ipë jëjpën mäjtskpa'a

⁷ets ja naax kajpn xyajkutëkoytyëty mëti'ipë ëxëëk të mtunëtën, jëtu'un xytyukkumëtowtëty ja nyëë pyokyëty

⁸ets xykyë'ëtsum xytyekytsyumtëty ja yajkutujkpëtëjk ets ja ja'ayëty mëj'äämpyë y'itën mëët ja pujxntä'äky je'emtyëtypë

⁹ets y'atëwëty jëtu'un ijxtëm ënäty të yaj'awitsyën ja pyokyëty tä myinyën këxja'ay. Jëtu'un nëjkx ja ja'ay mëj'äämpy nyaxtë mëti'ipë oy juuky'ajtëpën. Tukxoontä'äky mëjjawë Tios yë xyëëw nyaxëty.