Read Biblia Mixe de Quetzaltepec Salmo 18 Bible Online

Salmo 18 - Biblia Mixe de Quetzaltepec bible

Salmo 18

¹Wintsën, mijts nmëk'ajtën'ajtyp; mijts ntsojkpy nja'ap.

²Mijts xykyuwaanp xynyixajpës, mijts ntsoktakn'ajtyp, mijts xyaj'ëwaatsëpëtsëëmpës, mijts nTios'ajtyp, ja tsaa mëti'ipës xy'akëëytyujkp xy'axajtujkpën, ja n'kuwaanpës, ja mëk'ajtën mëti'ipës xyajtsokpën, ets ja ntsoktaknës ni'ik këjxmëpë.

³Mijts Wintsën, mpatëp ets myajwin'ëw myajwinya'axëty; ko mijts nmëkäjpxy, täätsës xyajnitso'oky maas ja nmëtsiptëjkën.

⁴Tä tu'uk yë tejpxy tii yajtuktsumyën jëtu'unës yë o'kën të xyjyapaaty; jëtu'un tä nëë nyijä'tstëkoyën.

⁵Tëë yë o'kën xyjyatsumy xyjyaxotyës; tëës muum njayajpaaty ma o'ktaknën yu'utsypë.

⁶Maas ënäty jotmayjoty nyajpaatyën, jääjës të nmëkäjpxy yë Wintsën, tëë yë Tios n'amëtoyës yë näypyutëkë. Tëë tmëtoy koos të nmëkäjpxy ma tsyajptëjkën. Koos mëk të nyä'äxy të njoky tëë tyatsk tuk'akonë.

⁷Ënät ojts yë naaxwiinyëtë mëk yu'kxy. Ojts yë tun kopk yu'kxtë, kopk ëjxypyaat; ojts yajwijtsyu'kxtë mëët ja Tios ja tsyip y'äkë.

⁸Ojts jok pyëtsimy ma jyëjpën, ets ma y'aawën jëën jap pëtsëëm mëti'ipë yaj'o'kpën. Ojts jëënpajk tka'tspëtsëmy y'aawjoty.

⁹Tëë jam tsajpkëjxm nyäy'awijtstu'utyë, ets yaa naaxwiiny të kyëtä'äky. Jap tyekpya'tkë'p yoots nëma'a jap të kyëxë'ëky.

¹⁰Ënät të tukwä'tspety tu'uk yë Tios kyukäjpxy käkn mëëtpë, ets të myëkääkë'ëkyë pojotm.

¹¹Yë'ë të nyätyukyu'utsyë ets të nyätyuk'apëjktukyë yë yëkyoots ets nëma'a mëti'ipë nëëmëëtën.

¹²Të'kxp wëtsujkp jam të y'akëxë'ëkë ma yajpaatyën, ko të tyëtsntu'uy jëtu'un të yaj'ixy jëënpajk yowë tuup.

¹³Yë Wintsën, Ni'ik Këjxmëpë, ënääwën të tyajmëtoyë yë y'aaw y'ayuk jam tsajpjotm ets të tyëtsntu'uy jëtu'un tä jeexyë jëënpajk kyuko'ownaxyën.

¹⁴Jëtu'un tä jeexyë ti'pxn tnajtsmatsën jëtu'un të tyawëtsuky, ets ja nmëtsipës të tyaj'akääkwä'kxy.

¹⁵Tëë ja mejy nyitëtstu'uty mëti'ipë jap pa'tkë'pën; yaj'ijxnëp mëti'ipë ja naaxwiinyëtë tsyëëm'ijtypyën, mëët ko ja Wintsën të kyäjpxy ets ko mëk të tyajpojy.

¹⁶Tiosës të xywyijtsë'ëky, jam këjxm të xynyikuxajnaxyës, etsës të xyjyuuty jap komnëëjoty.

¹⁷Tëës xyajtso'oky maas yë nmëtsipën mëti'ipë ëwa'anëtyën ets jotmëkëtyën këtiinëm ëjts, mëti'ipës ënäty xy'ëxëëk'ijxtëpën.

¹⁸Jääjës të xynyipëtë'ëktë maas ënäty ëxëëk njaty nkëpetyën, je'eyëp ko yë Wintsën yë'ëjës të xypyutëkë.

¹⁹Tëës ëwaatsëtum xypyëjktä'äky, tëës xyajtso'oky jä'äs ko xytsyoky xyjyawë.

²⁰Yë Wintsën yë'ëjës të xykyumay, ets xypyatpës jëtu'un, jä'ä ko oyës winë ntuny.

²¹Ëjts Tiosës yë nyë'ë tyu'u të npanëjkxë, Ka'apës nijëna'a nTios të n'ixtijy.

²²Yapës njootjoty nwinma'anyjoty ntimmyëët'aty tu'kë'ëyë yë y'ënä'ämën tyiyajtën, ka'apës nijëna'a y'ënä'ämën tyiyajtën të njëjpmëkajpxë.

²³Mëtëyës të njuuky'äty ma yë'ëjën, ja ëxëëkpë ka'apës të ntunyë këwentë.

²⁴Tëës yë Wintsën xykyumay, ko oy winë të ntunyës.

²⁵Mijts Wintsën oy winë xytyuny ma ja'ayën mëti'ipë oy winë tyuunpyën, ets tëyajtën winë xytyuny ma ja'ayën mëti'ipë tëyajtën winë tyuunpyën,

²⁶Mëtëy mja'ay'äty ma ja'ayën mëti'ipë mëtëy ja'ay'ajtpën ets këpety ma ja'ayën mëti'ipë këpetyën.

²⁷Mijts myajnitsokpy yë ja'ay mëti'ipë yu'unk naxym juuky'ajtëpën, e mëti'ipë mëj këjxm näjya'awëtëpën naxym xyajnaxy.

²⁸Mijts, Wintsën, xymyoopyës yë të'kxën jajën; ets mijts Tios, mëti'ipës nTios'ajtypyën xykyutë'kxpës maas nkupi'its nkukootsën.

²⁹Mëët mijts yë mputëjkën jyëkyäpëp nwinkuwa'akëtyës yë nmëtsip ets jotkujk naxëtyës ma ja potsyën mëti'ipë yë kyajpn nyapots'ajtypyën.

³⁰Yë Tios yë nyë'ë tyu'u mëtëy yë'ë, ets ja mëti'ipë të twinwanën jyëkyejpy n'a'ijx njëjp'ijxmëty. Tios kyuwäämpy nyixäjpy yë ja'ay mëti'ipë tuk'ijxpäjtëpën.

³¹¿Jää jëtää wiinkpë Tios jëtu'unpë tä Wintsënënë? ¿Jää jëtää muum yë tios mëti'ipë mëpaat xykyuwa'anëmë?

³²Yë Tios yë'ëjës xymyëjaawmoopy, ets yë'ëjës xypyutëjkëp ets oy nja'ay'atëtyës,

³³mëti'ipës yë nkë'ë nteky yajyu'unkëpën ijxtëm yë jëtyu'u ets mëti'ipës kujk xyajtënääpyën oyës muum këjxm ntänë;

³⁴mëti'ipës xytyukni''ijxëpën wi'ixës ntsiptunëty ets mëti'ipës xymyoopyën yë mëjaaw etsës yë npujxn nti'pxn mëk nwo'onë'ëkëty.

³⁵Mijtsës xykyuwaanp etsës xyajnitso'oky. Yë m'a'oykyë'ë yë'ëjës xytyukmajts'ijtp, ets mëët yë m'oyjot m'oywyinma'any ni'ikyës nnäjyawëty nyeeky npety maas winë nmëëtëtyën.

³⁶Janty këtii tsyipëty yë në'ë ntu'ujës të xyaj'oyë, ets nkë'ë ntekyës ka'ap ma të jyëxëxy.

³⁷Koos yë nmëtsip të npapo'oy tëës najtspaatë; ets koonëmës të nyajkutëkoy täänëmës të nwinpity.

³⁸Piw nuukës të ntuunta'ay ets ka'ap të y'ëkpëtë'knëtë. Mon tuk të kya'ata'atë maas yë ntekpya'tkën.

³⁹Tëës mijts xymyo'oy yë mëk'ajtën jap tsipjoty; ets mijts të xy'a'ixë ets käjpxy kumëtoownajxpë xywyinkoxtänëtëtyës,

⁴⁰ets nmëtsiptëjkës xykyukä'äkëtyës. Jëtu'unts të tjëkyepy nyajkutëkooytya'ajëtyës ja mëti'ipës ënäty xy'ëxëëk'ijxtëpën.

⁴¹Tëë tja'amëtowtë ja putëjkën, e ka'ap ni pën të pyutëkëtë; ojts tjamëkajpxtë ja Wintsën, ka'ap ojts y'ëtsowëtë.

⁴²Way wayës të ntuunta'ay tä naaxwayën mëti'ipë pojë'kpën. Tëës n'ateeny ntukteeny tä mo'ontsën tu'ujotypë.

⁴³Tëës mijts xyajnitso'oky ma ja naax kajpnën mëti'ipë käjpxy kyumëtoownajxpën. Tëës xypyëjktä'äky yajkutujkpë ma ja naax kajpnën ets të xymyëtunyës ja ja'ay ka'apës ënäty n'ixy'ätyën.

⁴⁴Je'eyës tu'k aaw nkäjpxy täätsës xymyëmëtowtë; jëkämpaat muum yë ja'ay të tsyoontë mëti'ipës të xymyëmëtowtën.

⁴⁵Yë ja'ay mëti'ipë jëkäm tso'ontëpën jëtu'unyë wyinkumon jyotkumonëtë, tsëtyu'unmëët jap pyëtsëëmnëtë ma y'ijtaknëtyën.

⁴⁶Juuky yë Tios. Kënu'kxy yë xyëëw y'ity mëti'ipës xykyuwaanp xynyixajpën. Wä'än mëj'äämpy tyajpëjktä'äky yë Tios mëti'ipës xyajkäktsokpën.

⁴⁷Yë Tios yë'ëjës të xynyitsiptuny etsës yë naax kajpn të xytyukwinkuwowë.

⁴⁸Yë'ëjës xyaj'ëwaatsëpëtsëëmp oyës jënu'un yë nmëtsip xyjyatukjoot'anpëky, ets oy ja ja'ay käjpxy kumëtoownajxpë të xyjyanipëtë'ëktës. Mijts Wintsën, mijtsës xyajnitsokp ma ja'ayëtyën mëti'ipë ëxëëk tsyiptuna'antën.

⁴⁹Paaty nmëjpëjktä'äky ma ja naax kajpnën ets nkuuy'iyës ja mxëëw.

⁵⁰Yajmëta'ak tsipjoty ja m'ënä'ämpë mëti'ipë kë'ëm të xywyin'ixyën; mëët'at xëmë yë David ets y'u'unk y'ok mëët yë tsojkën ja'awën.