Read Biblia Mixe de Quetzaltepec Salmo 19 Bible Online

Salmo 19 - Biblia Mixe de Quetzaltepec bible

Salmo 19

¹Yë tsajp yë'ë nyikäjpxyp nyimëtyäkpy yë Tios yë myëj'ajt y'oyajtën. Yë niwits nijuux, yë'ë ijxpäjtën yäjkpy tääts yajnijawë wi'ix yë Tios winë të tyajkojyën.

²Ko tu'kxëëw nyäxy tääts nija'awëmëty wi'ix ja xëëw myiny kyëtä'äky, näjyëtu'un ko ja kootspë nyäxy tääts nija'awëmëty wi'ix ja kootsajtën myiny kyëtä'äky.

³Oy nitii ayuk kyayajmëtoy ets ni kyayaja'akyukë tii,

⁴yë nyija'awën ja'ajtp oy tyimmaajëty mapaat jyëjpkëxyën yë naaxwiinyëtë. Jam ja Tios tu'uk ja ijtakn të tpëjktä'äky ets ja xëëw jam yajpaatëty.

⁵Ënät ja xëëw jyajtä'äky jëtu'un tä tu'uk yë ye'etyëjk pyëka'anyën, ets xyoontä'äky ko ye'eytsyoony tä pëyë'kpën.

⁶Tä ja xëëw pyëtsimy ets tukye'eyë ja tsajp, ko kyëtaknë wiinktsow kyëtaknë, ko tyi'kxy jyäjy ka'ap tjëkyepy pën tkukä'äkëty.

⁷Yë Wintsën yë y'ijxpëjkën tëy yë'ë, jä'ä ko yäjkpy jempyë juukyajtën. Yë Wintsën yë y'ënä'ämën aak tëyajtën yë'ë, paaty yë ja'ay mëti'ipë yu'unk naxym juukyajtpën wijy tyaj'awinpity.

⁸Yë Wintsën yë y'ënä'ämën wa'ats yë'ë, paaty tyajminy yë xoontakën ma jot winma'anyën. Yë Wintsën yë y'ënä'ämën yë'ë mëti'ipë oyën, paaty oy yaj'ixy ko yajpatuny.

⁹Yë näwyinkutsë'ëkë mëti'ipë yajmëët'ajtpën ma Wintsënën ka'ap nyätyuktëkëty mëët yë ëxëëkpë. Yë Wintsën yë y'aaw y'ayuk tëyajtën yë'ë, ets tëkokyë aak mëtëy.

¹⁰Tsoowpatp ni'ik këtiinëm jyëtu'unëty yë pu'ts pujxn. Ni'ik pya'akëty këtiinëm yë jompya'ak.

¹¹Ya'atë mëtuunpë oy ko jëtu'unpë aaw ayuk yajtukmëtoy, ets oy nyäjyawëty ko tpatuny.

¹²¿Pën jëtää kë'ëm y'ëkja'awëy'ijtyp ko tii oy tkatuny? Wintsën, mä'kxkës yë ntuuntëko'oy nkajpxtëko'oyën mëti'ipë yu'utsy ijtpën.

¹³Jëpëk ma ya'atë mtuunpën yë amëj'ajt akëjxmajtën, ets këtii xy'ëwa'atsëty etsës amëj akëjxm nja'ay'atëty. Jëtu'unës ka'ap ëxëëk nyajpaatëty; nmëjëkäm'atëpës ja mëjpoky.

¹⁴Kupëky nyaxëty mijts mwintum yë n'aaw n'ayukës ets njot nwinma'anyës. Wintsën, yajtsokpë ets yaj'ëwaatsëpëtsëëmpë.