Read Biblia Mixe de Quetzaltepec Salmo 25 Bible Online

Salmo 25 - Biblia Mixe de Quetzaltepec bible

Salmo 25

¹Wintsën, mijts yam nmëkäjpxyp.

²NTiosës, mijts ntuk'ijxpejtyp, këtii xy'ëwa'atsëty etsës ntsëtyun njaaypyätëty. Ka'apës mëpaat yë nmëtsip xytyukxi'iky.

³Ka'ap mëpaat nijëna'a tsëtyu'unmëët wyë'ëmtë mëti'ipë mtuk'ijxpäjtëtëpën. Yë'ë tsëtyu'unmëët wë'ëmtëp, mëti'ipë mkäjpxykyumëtoownajxëtëpën.

⁴Wintsën, tukni''ijxëkës yë mnë'ë mtu'u ets winwoow winwijtskës ma mnajxtaknën.

⁵Tu'uwinwoowkës ets tukni''ijxëkës ja mtëyajtën. Jä'ä ko mijts nTios'ajtyp ets mijts xyajnitsokpës. Mijts ntuk'ijxpejtyp oyjyëna'ajëty.

⁶Wintsën, ja'amyäts ja mtsojkën mja'awën ets ja m'oyjot m'oywyinma'any mëti'ipës xëmë të xytyuk'ixtën,

⁷ka'ap xyjyä'äymyätsëty ja nnëë npokyës ets oyës tii të ntuuntëkoy të nkajpxtëkoy koos të n'ëna'k'aty. Wintsën, ja'amyäjtskës koos xytsyoky xyjyawë ets ko xymyëët'aty ja oyjyot oywyinma'any.

⁸Yë Wintsën, oy ets mëtëy winë tuny tkäjpxy; yë'ë yaj'o'oyëp yë nyë'ë tyu'u yë pokyjyä'äy

⁹ets tyu'uwinwoopy tyu'uwinwijtsyp yë ja'ay mëti'ipë yu'unk naxym ja'ay'ajtpën. Tyukni''ijxëp wi'ix winë oy tunëtyën.

¹⁰Yë'ë ko tii tuny, aak mëtëy winë tuny ets mëët yë tsojkën ja'awën ma ja ja'ayën mëti'ipë kuuytyu'unxëyëpën ja y'aaw y'ayuk ets ja y'ënä'ämën tyiyajtën.

¹¹Wintsën, mëj këjääjës yë ntuuntëko'oy nkajpxtëko'oyën, pokymyä'kxkës, yajmëjnax yë mxëëw.

¹²Ja ja'ay mëti'ipë ja Wintsën yajmëjnajxypën, yë'ë tukni''ijxëyëp ja në'ë tu'u mëti'ipë pyanëjkxëpën;

¹³Mëët yë oyajtën mëk'ajtën tyajjuuky'äty ets ja y'u'unk y'ok myoopy ja nyaax kyam mëti'ipë tyukjuuky'atëpën ma naax kajpnën.

¹⁴Yë Wintsën y'oyjya'ap yë ja'ay mëti'ipë mëjpëjktakëpën, ets tyuknija'ap ja käjpxytyu'unën.

¹⁵Ëjts jamës xëmë nkëx'ixy ma Wintsënën, jä'ä ko yë'ëjës xyjyëwoop koos atsë'ëkëtuuy nyajpaaty.

¹⁶Wintsën, Wintë'kxkës, ets mëët'at pa'ëyo'owën najts'ëyo'owën mëët ëjts, atu'ukës nyajpaaty ets mon tuk.

¹⁷Yë njot nwinma'anyës ni'ikyë tyëkë moonpë tujkpë; yajpëtsëëmkës ma jëtu'unpë ma'ayën tajënën.

¹⁸Ijxkës yë nmonyë ntukyë, mä'kxkës yë npoky nkëtyey.

¹⁹Ix nu'unës yë nmëtsip nmëëtëty, ookyës xy'ixa'antë koos xymyëtsip'atë.

²⁰Këwent'ajtkës ets yajtsokës yë njuukyajtën. Këtii xy'ëwa'atsëty etsës tsëtyu'unmëët nwë'ëmëty, jä'ä ko jam ma mijtsën, jamës n'ixta'ay yë kuwa'anën.

²¹Wä'än yë'ë tkuwa'antë koos ka'ap tii ntuuntëkoy ets ko ka'apës npokymyëëtëty, jä'ä ko mijts të ntuk'ijxpety.

²²Tios, mëti'ipës nTios'ajtypyën, yajtso'ok yë Israel ja'ay ma jotmayjoty yajpaatën.