Read Biblia Mixe de Quetzaltepec Salmo 26 Bible Online

Salmo 26 - Biblia Mixe de Quetzaltepec bible

Salmo 26

¹Wintsën, paye'eykyës yë npoky, yë njuukyajtënës ka'ap tii ëxëëkpë tmëëtëty. Mijts Wintsën, mijts tu'ukyë ntuk'ijxpejtyp;

²Ix yë njuukyajtënës, winma'any'ijxkës, ijxmats yë njot nwinma'anyës. Tëkokyë xy'ijxta'ajëty wi'ixës nmay ntajyën.

³Ëjts nmëët'ajtypyës yë mtsojkën mja'awën, tëë oy nmëtuny;

⁴nijëna'ajës mëët të nkaye'eymyuky të nkanajxmuky yë ja'ay mëti'ipë antaktëpën ets ni të nkapuwa'akës yë ja'ay ka'apë winë aaw winëjot tii tnikäjpxyën.

⁵Ëxëëkëmës n'ixy ko muum nyëëmuk tyu'ukmuktë ja'ayëty mëti'ipë ëxëëk yë jyot wyinma'anyëtyën, nijëna'ajës mëët të nkapo'kxy të nkapëky yë ja'ayëty mëti'ipë ka'ap yujy tëtä'äky jyä'äy'atën.

⁶Wa'atsës yë nkë'ë nmëëtëty ets ka'apës tii poky të ntuuntëkoy. Yë'ëjës nmëwinkonäämpy yë mwintsë'këntyakn,

⁷ets nimëtya'aka'anyës yë mëj'ajtën, etsës ntukxoonta'aka'any mëti'ipë të xytyunyën.

⁸Wintsën, ëjts yë'ëjës ntsojkën'ajtyp yë mtsajptëjk ma m'ity mtsëënën, ma ja mëj'ajt m'oyajtën yajpaatyën.

⁹Këtiis yë njuukyajtën xypyëjkëty jëtu'un tä pokyjä'äytyëjkën; këtiis xy'ëxmatsëty etsës näjyëtu'un njatëty tä yë yajja'ay'o'kpëtëjkëtyën.

¹⁰Mëti'ipë myëët'ajtëpën yë kyë'ë y'aaw ujts mëët yë ëxëëkpë ets je'eyë wyin'ëën wyinxajtë.

¹¹Yë njuukyajtënës ka'ap tii ëxëëkpë tmëëtëty. Yaj'ëwaatsëpëtsëëmkës ets pa'ëyoow najts'ëyo'owëkës.

¹²Ëjts ta'tspëkyës ntänë naaxkëjxy; nmëjjawëjäämpyës yë Wintsën ma yajpaatyën yë nyaax kyajpn.