Read Biblia Mixe de Quetzaltepec Salmo 30 Bible Online

Salmo 30 - Biblia Mixe de Quetzaltepec bible

Salmo 30

¹Wintsën tyam mijts nkuuy'iy nkuuyä'äxy, jä'ä ko mijtsës të xyajtso'oky ets ka'ap të xy'ëwa'atsy etsës yë nmëtsiptëjk xynyëxi'ik xytyukxi'iktëty.

²Wintsën mëti'ipës nTios'ajtypyën, tëë yë putëjkën n'amëtoy npëjktsoy, e tëë xyajtso'okyës;

³mijts Wintsën, mijtsës të xyajpëtsëmy o'kpë akujky; tëës xymyo'oy yë juukyajtën, ets tëës ntso'oky o'kënjëjp'am.

⁴Miitsëty, ninu'un yë Wintsën oy xymyëtuntën, win'ëw winya'axtë, mëjpëjkta'aktë wa'atspë xyëëwën.

⁵Yë'ë tsojk'am yë tsyip y'äkë tmëët'aty, yë'ë y'oyjyot ijtëëp xëmë maapaat njuuky'ajtëmën. Pën jë'ëyëm yaxëm koots, komjëpom jotkujk nyajpaata'anëmë.

⁶Ëjts jotkujkës të näjyawëty, ets të nmay të ntajyës: Ni pënës ëjts ëxaty xykyatun xykya'ënëëmëty.

⁷Mijts, Wintsën, mëët ko ja oyjyot oywyinma'any xymyëëtëty tëës mijts kë'ëm xy'ënëëmë koos jotkujk n'itëty. E mijts ka'ap ja mputëjkën të xy'ëkyajnikëxë'knë ma ëjtsën, ja tsë'kën ja'awën jä'äs të xyajkumon të xyajkutukë.

⁸Mijts Wintsën, mijts nmëyäxy nmëjojkpy, mijts nmëpëjktsoopy:

⁹koos n'ookëty tii mnapaat mna'ixëp, koos ënäty nyajmënëjkxnë jutjoty? Yë naaxway ka'ap tjëkyepy mtukxoonta'akëtëty, ni yë'ë mëpaat tkanikäjpxy wi'ix tii oy xytyunyën.

¹⁰Wintsën, mëtoow'ijtkës yë n'aaw n'ayuk, ets pa'ëyoow najts'ëyo'owëkës; Wintsën, putëjkëkës.

¹¹Jä'ä ko tëë xyaj'awinpity yë një'ëyënës nyaxënës äjtsën pujtën; tëës yë nwit xytyuknijääntu'uty mëti'ipë kuumpën u'kxpën etsës të xtyukxoxy mëti'ipë ja'ay myëxëëw'ijxypyën.

¹²Paatyës n'ëna'any Wintsën, ko ka'apës njëkyepy amonyë n'itëty: mijts nkuuy'ëëwäämpy ets nmëjpëjkta'aka'any, xëmë nkukajpxëja'any winë.