Read Biblia Mixe de Quetzaltepec Salmo 32 Bible Online

Salmo 32 - Biblia Mixe de Quetzaltepec bible

Salmo 32

¹Xoontä'äky yë ja'ay yajpaaty mëti'ipë nyëë pyoky tëë yajme'kxyën tu'kë'ëyë.

²Xoontä'äky yë ja'ay yajpaaty mëti'ipë ka'ap nëkoo ëxëëkjaty myäy tyäjyën ets mëti'ipë ka'ap tjëkyepyën wi'ix yë Wintsën pyoky'ixëtëty.

³Maas ënäty ka'ap yë npoky nmaaywyätsynyëmën, yë njot nini'kxës jëtu'unyë ënäty nyapëky nyäy'ixyë koos xëëwpaaty n'ëjy ntu'uky,

⁴jä'ä ko xëëny koots ja mkë'ë je'emtypë xytyuknipëtë'ëkyës. Jëtu'un tä yë pëjy xyootyën xëkopkjoty, jëtu'unës yë njuukyajtën njawë y'amutsktëjkënë.

⁵Ënät të nmëmaaywyätsy ets ka'apës nitu'uk ja mpoky të nkuyu'utsy; tëës ja npoky nmaaywyajtsta'ay e mijts, Wintsën, tëës xypyokymye'kxy.

⁶Paaty ko ënäty jyääjëty yë monyëtukyë, yë wa'ats ja'aytyëjkëty jää mëkajpxa'anëtë, e oyts ënäty jënu'un yë nëë jyanëje'etsy jyayujkje'etsy ka'ap nëjkx jam jyä'ty ma yë'ëjëtyën.

⁷Mijts ntsoktakn'ajtyp, jä'ä ko mijtsës xykyëwent'ajtp ma kyutsë'ëkëtyën, etsës xytyukna'ëwtita'any yë xoontakën koos ënäty ëwaatsëtuuy nwë'ëmy.

⁸Yë Wintsën jëtu'un y'ënä'äny: Ëjts jamës yë nwiin ntimyajtëëynyë ma mijtsën. Ëjts mijts ntukni''ixëjäämpy winë, ets n'ëëwwijäämpy nkajpxwijjäämpy, ntukni''ixëjäämpy yë në'ë tu'u mëti'ipë mëpaat xypyanëjkxyën.

⁹Këtii jëtu'un mja'ay'atëty ijxtëm yë mëkjëyujkën ëkë kwaayën, ka'apë jyä'äkyukëtën. Koonëm yë tejpxy yajtuk'ajäänë'ëky täänëm wya'ak'oyë, ko jeexyë tii kyayajtuk'apëkë ka'ap jeexyë niwi'ixtsow wya'ak'oyë.

¹⁰Yë ëxëëkja'aytyëjk kanaakpëky yë pëjkën ijxën tyajnaxa'antë, e yë Wintsën yë tsyojkën jya'awën jam xëmë y'ita'any ma ja'ayëtyën mëti'ipë tukjotkujk'ajtëtëpën.

¹¹Xoonta'aktë jam ma Wintsënën, miitsëty naaxwiinyëtë ja'ayëty ninu'un oy mja'ay'atën ets ninu'un winë mëtëy xytyuntën. Xoonta'aktë ets tukyaax tukjokëtë ko jotkujk myajpaatë.