Read Biblia Mixe de Quetzaltepec Salmo 33 Bible Online

Salmo 33 - Biblia Mixe de Quetzaltepec bible

Salmo 33

¹Tukxoonta'aktë yë Wintsën, miitsëty oyjyä'äytyëjkëty; Ko ja oyjyä'äytyëjk y'ëwtë, janty'oy ja y'iy yajmëtowtë.

²Mo'otë yë Wintsën yë jya'awëkyëtakën ets win'ëw winya'axtë mëët yë kepykyow,

³tukwin'ëwtë yë jemyëtypë ëy, ëwtë kowtë ko xymyëkajpxtëty jotkujk yajpaatë.

⁴Yë Wintsën yë y'aaw y'ayuk tëyajtën yë'ë; yë'ë ntuk'ijxmëp ko winë të tyajkojy ko yë'ë mëtëy ets wa'ats.

⁵Yë Wintsën tsyojkpy jya'ap tëkokyë mëti'ipë oyën ets mëti'ipë tëyajtënën. Ujts yë naaxwiinyëtë yajpaaty mëët yë tsyojkën jya'awën.

⁶Yë tsajp ets tëkokyë jënu'un jam yajpaatyën tsajpwinm, yë Wintsën të tyajkojy mëët yë y'aaw y'ayuk, ets mëët ko të nyasxajë.

⁷Yë'ë yajtu'ukmujkpy ets yajnipejtyp yë komnëë ma mëjnëë mejyën.

⁸Mëjjawëtë kënukxyjyawëtë yë Wintsën tëkokyë jënu'un naaxwiinyëtë myajpaatën; kënukxyjyawëtë miitsëty naaxtsënääpyë kajpntsënääpyë.

⁹Ko ojts kyäjpxy, ënät ojts winë kyojy; ko ojts winë tni'ënä'ämë, ënät ojts winë wyi'imy ta'tspëky.

¹⁰Yë Wintsën yë'ë yajijtääpy yajma'tääpy yë winma'any mëti'ipë yë naax kajpn të tjatuknipëjktaakëtën ma ja'ayëtyën ka'apë Wintsën t'ëwtatën.

¹¹Mëti'ipë Wintsën të tuknipëjktaakën, ijtëëp xëmë.

¹²Jotkujk yë naax kajpn yajpaaty mëti'ipë yë Tios Wyintsën'ajtypyën, ja naax kajpn mëti'ipë Tios të twin'ixyën ets yë'ë nyätyukjä'ätijyë.

¹³Yë Wintsën wa'ats t'ixy jam tsajpjotm ets tku'ijxnaxy tëkokyë yë naaxwiinyëtë ja'ay;

¹⁴jam ma jyuuky'ätyën wa'ats t'ixy tuny ninu'un yë ja'ay tsyëënëtën naaxwiiny.

¹⁵Yë'ë ojts t'oytyuny yë jot winma'any ets yë'ë y'ijxyp tyuunpy tiijaty ja'ay tyuuntëpën;

¹⁶Nitu'uk yë yajkutujkpë kyatso'okëty oy jënu'un ja tsyiptuunpëtëjk jyanimayëty, ets oy jënu'un yë ja'ay jyotmëkëty ka'ap myëta'akëty mëët yë myëk'ajtën;

¹⁷ka'ap tjëkyepy yë kwaay yajtso'okëtëty; oy jënu'un jyamëk'atë nitii tkatuntëty.

¹⁸E yë Wintsën Kyëwent'ajtyp xëmë mëti'ipë tukjotkujk'ajtëpën ets mëti'ipë tyukjotkujk'ajtëpën tsyojkën jya'awën;

¹⁹tääts tyajtso'oka'any o'kpë akujky, ets tmo'oja'any yë juukyajtën oy jënu'un yuu xëëw y'itëty.

²⁰Ëëtsëty yë'ëjës yë Wintsën ntukjotkujk'ajtëp; yë'ëjës xypyutëjkëtyëp ets xykyuwantëp.

²¹Yë njot nwinma'anyëtyës xoontä'äky yajpaaty ma Wintsënën, paaty ëëtsëty yë'ë ntuk'ijxpätës yë kyënu'kxy myëjxëëw mëti'ipë wa'atsën.

²²Wintsën, wä'änës xëmë xyjyämyëët'atë yë mtsojkën mja'awën, jëtu'un tä yajjëjp'ixyën ma mijtsën.