Read Biblia Mixe de Quetzaltepec Salmo 34 Bible Online

Salmo 34 - Biblia Mixe de Quetzaltepec bible

Salmo 34

¹Kënu'kxyës yë Wintsën yë xyëëw njawëjanëyë oy tyimjëna'a xëëwëty, xëmës nikajpxa'any oy.

²Ëjts amëj akëjxmës nnäjyawëty ma Wintsënën; mëtoow'itë ets jotkujk itë miitsëty naaxwiinyëtë ja'ayëty ninu'un mja'ay'atën yu'unk naxym.

³Mëjpëjkta'aktë yë Wintsën mëët ëjts, yajmëjnaxtë xyëëw.

⁴Ëjts, Wintsënës të n'apëky, e tëës xy'ëtsoy, yë'ëjës të xytyukniwa'atsy ja tsë'kën ja'awën.

⁵Mëti'ipë këx'ijxtëpën ma Wintsënën, jotkujk wyiin jyëjp kyëxë'ëktë ets ka'ap nijëna'a ëxëëk wyë'ëma'antë.

⁶Tëë ya'atë ëyoopëja'ay yujkyä'äxy ets Wintsën të tmëtoy, tääts të yajjotkujktä'äkyë ma ënäty jë'ë ya'ax yajpaatyën.

⁷Yë Wintsën kyukäjpxy kyuwäämpy ets yajtsokpy mëti'ipë oyjya'awëyëpën.

⁸Ëk'ijxmatstë ets xy'ixtëty ko Wintsën oy yë winma'any tmëëtëty. Jotkujk yë ja'ay yajpaaty mëti'ipë Tios tyukjotkujk'ajtypyën.

⁹Oyjyawëtë yë Wintsën, miitsëty ninu'un të mnatyukë'ëpëkëtën, jä'ä ko ka'ap nitii tyajtëkoy'ata'antë ja ja'ayëty mëti'ipë y'oyja'awëtëpën ja Tios.

¹⁰Yë kumeenyjyä'äytyëjkëty ëyoopëja'ay y'awinpita'antë, ets nëjkxëp yuu'ooktë, e mëti'ipë ja Wintsën y'ijxtaaytyëpën, ka'ap tii tyëkoy'ata'anxëtë.

¹¹Mintë, u'unk ëna'këty ets mëtoow'ijtëkës yë n'aaw n'ayuk: tyam ntukni''ixëja'antë wi'ix yë Wintsën xy'ëwtatëtyën.

¹²¿Mjuuky'ataanp jekyë? ¿Mtukxoonta'akäämpy yë juukyajtënë?

¹³Këtii ëxëëkpë aaw ayuk xykyajpxëty, ets nijëna'a mka''anta'akëty.

¹⁴Näjyëpëkët ma ëxëëkpën, ets tun yë oypyë; ixta'a akujkajtën jotkujk'ajtën, ets yë'ë panëjkx.

¹⁵Yë Wintsën Kyëwent'ajtyp yë ja'ay mëti'ipë oyjya'awëyëpën ets y'amëtoow'ijtyp ko mëktä'äky myëkäjpxyë

¹⁶Yë Wintsën mëtsip nyäyajnaxyë ma ja'ayën mëti'ipë ëxëëk ëtëtstëp ënantëpën, ets jëtu'un tpo'otan tjo'otsanë yë xyëëw yaa naaxwiiny.

¹⁷Yë Wintsën kyëwentëpëjkpy yë wa'ats ja'ay ko wyanë tsyowë ets yajjotkujktäkpy ko jë'ë ya'ax yajpaaty.

¹⁸Yë Wintsën winkon yajpaaty ma ja'ayëtyën mëti'ipë jya'awëtëpën yë jyot wyinma'any ama'ats tukma'atsë ets ka'apë tii t'ëkjëjp'ijxnëtën.

¹⁹Yë ja'ay mëti'ipë oy juukyajtpën kanaakpëky yë ëxëëkpë tmënaxy tyajnaxy, e yë Wintsën yë'ë putëjkëyëp ma tëkokyë ëxëëkpën.

²⁰Yë'ë këwent'ajtaayëp tëkokyë yë pyajk; nitu'uk kyatëja'any.

²¹Yë ëxëëkja'aytyëjkëty y'ëxëëk winma'any kë'ëm nätyuk yaj'o'këtëp; mëti'ipë y'ëxëëk'ijxypyën ja ja'ay oypyë jyuuky'atën kopkpëky ko nëjkx yajtëytyuny.

²²Yë Wintsën yajtsokpy yë jyuukyajtën yë ja'ay mëti'ipë mëtuunëpën; ka'ap nëjkx yajtëytyuntë mëti'ipë tuk'ijxpäjtëpën.