Read Biblia Mixe de Quetzaltepec Salmo 36 Bible Online

Salmo 36 - Biblia Mixe de Quetzaltepec bible

Salmo 36

¹Yë ëxëëkajtën yë'ë myëkäjpxyp yë ëxëëk ja'ay ets jap tyimtëkë ma jyot wyinma'anyën. Ka'ap myäy tyäjy nijëna'a ko kopkpëky ko Tios nwinkutsë'këmëty.

²Yë ëxëëk ja'ay jëtu'un nyäjyawëty oy yowë winë tuny ets aak y'oy'ixëp yowë ja'ay, ka'ap nimaa t'ixy mya'atëty ja y'ëxëëktu'un y'ëxëëk kajpxën.

³Ëxëëkjatyëty yë aaw ayuk tyajpëtsëmy ets antakp, të tyajtëkooynyë yë y'oyjyot y'oywyinma'any ets ka'ap tii oy t'ëktuunë.

⁴Ko jam wyiitykyëjxm kyo'knë, tääts myäy tyäjy wi'ix ja ëxëëkpë tunëtyën; jä'ä ni'ik ja ëxëëkpë tsyojkën'ajtyp ets ka'ap t'ëk'ëxmatsanë.

⁵E yë mtsojkën mja'awën, Wintsën, jampaat tsajpwinm jyä'ty; ets mwa'atsajtën pyätyp yë tsuxk tsajp.

⁶Yë mtëyajtën jëtu'un yë'ë ijxtëm mëj kopkën; yë m'aaw m'ayuk jëtu'un yë'ë tä këk mejyën. Wintsën, mijts mkëwent'ajtyp yë naaxwiinyëtë ja'ay ets jëyujk tsajpkaa.

⁷Oytyukxootaknë yë mtsojkën mja'awën, Wintsën. Yë naaxwiinyëtë ja'ay jëtu'un jam myintë ma mijtsën tä këtsey u'unkën ma tyaak kyäknpa'tkën.

⁸Ku'uxyë wyë'ëmtë mëët ja ka'ayën ukën mëti'ipë jam yajpatpën ma mjëën mtëjkën; e ja nëë mëti'ipë mtuk'ukpyën yë'ë mëti'ipë tso'onpën ma taxnëëjën mëti'ipë jämyë mu'tpën,

⁹jä'ä ko jam yajpaaty ja juukyajtënkopk ma mijtsën, ets mëët ja mkutë'kxn yaj'ijxp ja të'kxën jajën.

¹⁰Yajnikëxë'ëk xëmë yë mtsojkën mja'awën ets mëtëypyë ja nipaye'eyën, ma ja ja'ayëtyën mëti'ipë m'ixy'ajtëpën ets mëti'ipë mëtëy juuky'ajtëpën.

¹¹Këtii nijëna'a xy'ëwa'atsëty ets xy'atään xytyuktääntëtyës yë ja'ay mëti'ipë nämyëjja'aw näjyääntyja'awëtëpën, ets ka'ap mëpaat yë ëxëëkja'aytyëjk xytyijtës xykyotës.

¹²Ixtë wi'ix jyatën kyëpätën yë ëxëëkja'aytyëjk. Ko kyëtawtë ka'ap y'ëkpëtë'knëtë.