Read Biblia Mixe de Quetzaltepec Salmo 37 Bible Online

Salmo 37 - Biblia Mixe de Quetzaltepec bible

Salmo 37

¹Këtii mjoot'anpëkëty ko jyää'atë ëxëëkja'aytyëjk, këtii xy'ëxëëk'ixëty yë ja'ay mëti'ipë ëxëëk ëtëtstëp ënantëpën,

²jä'ä ko yë'ëjëty pojën tyëtskëta'aktë tä aaykyëta'akën; ets xyootstë tä aay ujtsën.

³Jam tu'ukyë këx'ix ma Wintsënën ets kuuytyun mëti'ipë oyën, juuky'at naaxwiiny naaxkëjxy ets näyaj'itët oy.

⁴Tsok yë Wintsën mëët yu'unk aaw yu'unkjot ets yë'ë kyuuytyunäämpy mëti'ipë mëk mtsojkën'ajtypën.

⁵Yë Wintsën yë'ë mjuukyajtën tukkë'ëwanë; yë'ë tuk'ijxpät ets mniminëtëty ko ënäty yë putëjkën xyajmëyäty.

⁶Yë'ë yajnikëxë'ëkäämpy ko ënäty oy tsuj mjuuky'äty, jëtu'un tä yë xëëw y'änyën kujkxyëëw.

⁷Ko myajpaatëty Wintsën wintuuy amonyë m'itëty; je'eyë ëwxit mä'kxtuk, xy'a'ix xyjyëjp'ixëty jëna'a mputëkëty. Këtii xy'ëxëëkjawëty ko yë ja'ay nyämyëmëta'akëtëty ma jyuuky'ajtënën, ets ko pën ëxëëk winë tuknipëjktaakëty.

⁸Ixmats yë äkë toyë, ets ja'atyëkoy yë ëwa'an'at; këtii mjoot'anpëkëty, jä'ä ko yë joot'an ni'ikyë winë tyajma'aty.

⁹Yë ëxëëkja'aytyëjk nëjkxëp yaj'ixkäxtë ma ja naax kajpnën, e mëti'ipë Wintsën tyuk'ijxpäjtëpën yë'ë nëjkx ja y'ijtakn tpaatë ma ja naax kajpnën.

¹⁰Tyimpatyp yë xëëw jëmëjt ma ëxëëkja'aytyëjk ka'ap maa y'ëkyajpatnëtëty; oy jënu'un pën tja'ixta'ajëty ka'ap nëjkx maa y'ëkyajpatnëtë.

¹¹Yë'ë tëy yë ja'ayëty mëti'ipë yu'unk naxym juuky'ajtëpën, nëjkxëp tkuma'ayën'atë yë naaxwiinyëtë ets nëjkx akujk jotkujk jyuuky'atë.

¹²Yë ëxëëk ja'ay yë'ë myëmääpy myëtäjpy wi'ix t'ëxëëk tunëty yë ja'ay mëti'ipë oy tsuj juukyajtpën, ets ënät twintë'kxpety jëpyëkëm ko t'ëxëëk ixy.

¹³E yë Wintsën je'eyë tukxi'iky, jä'ä ko nyija'ap ko yë ëxëëkja'aytyëjk miimp wiinkoontëp yë xyëëw pyo'ojëty jëna'a ëxëëk jyata'antën.

¹⁴Yë ëxëëkja'aytyëjk janty jëtu'un yë tëypyujxn tjakë'ëkë'ë'atë, ets tyi'pxnëty wo'onë'ëky tjatimyaj'itë ets tyajtsëtyuta'antë ja ëyoopëja'ay mëti'ipë yu'unk naxym yajpatëpën.

¹⁵Ko tpaatëty ja xëëw jëmëjt kyë'ëm tëypyujxn nëjkx nyätyukyaj'ookëtë, ets tyi'pxnëty nëjkxëp atëj tuktëjë jyajta'ay.

¹⁶Yë yiinpë wäänpë tmëët'atën yë oyjyä'äytyëjk, oy yë jëtu'unpë ni'ik këtiinëm yë ëxëëkja'aytyëjk ko kyumeeny'atë.

¹⁷Jä'ä ko yë Wintsën yajkutëkoyäämpy yë ëxëëkja'aytyëjk, e ja oyjyä'äytyëjk jotkujk tyaj'ita'any.

¹⁸Yë Wintsën kyëwent'ajtyp yë ja'ay mëti'ipë wa'ats juukyajtpën, mëti'ipë të yajtukumaytyën xëmë y'ita'any.

¹⁹Ko ënäty tsip ja juukyajtën, yë'ëjëty jotkujk yajpaata'antë, ko ënäty ja yuu xëëw y'ity, yë'ëjëty ka'ap y'ayuu'ata'antë.

²⁰Yë ëxëëkja'aytyëjk jëtu'un nëjkx tyoytyë jyämtë tä aaytyë'ëts ujtstë'ëtsën; tëkokyë mëti'ipë yë Wintsën y'ëxëëk'ijxtëpën ets myëtsip'ajtëpën, jëtu'un pyojwa'kxa'antë tä yootsën.

²¹Yë ëxëëk ja'ay je'eyë winë t'amëtoy nu'kxy ets ka'ap t'ëk këpäjnë, yë ja'ay mëti'ipë winma'any jyëkyejpyën pya'ëyoopy yë myëku'uk ets nyayäjkpy winë.

²²Pënjaty yë Wintsën të tkënu'kxyën, yë'ë jyä'ä'atantëp yë naaxwiinyëtë, e pënjaty të tpokyën nëjkxëp kyutëkooytya'atë.

²³Yë Wintsën yë'ë naaxwiinyëtë ja'ay yajtu'uye'epy, ets yë'ë tyu'uwinwoopy ma tsojkën'atyën;

²⁴wä'än jëtää kyunäpëty, je'eyëp ko ka'ap kyëtawa'any, jä'ä ko Wintsën yë'ë majts'ijtëp kyë'ëkëjxm.

²⁵Ëjts tëës n'ëna'k'aty e tyam tëës nmëjja'ayënë, nijëna'ajës të nka'ixy yë oyjyä'äy atu'uk y'amëjë, ëkë y'u'unk y'ëna'k t'amëtoy yë meeny muum në'ë'aay tu'u'aay.

²⁶Oy tyimjëna'ajëty xëmë pya'ëyoy; ets yäjkpy winë nu'kxtsoy; yë y'u'unk y'ëna'k yë'ë tyukmëët'ajtyp yë näkyënu'kxën.

²⁷Kukä'äk yë ëxëëkpë, aakyë'ë oypyë tun, jëtu'un xëmë xymyëët'atëty tii mtukjuuky'atëpën.

²⁸Yë Wintsën yë'ë xëmë tsyojkpy mëtëypyë ets oypyë, ka'ap nijëna'a t'ëxmatsy mëti'ipë oy mëtuunëpën; yajkutëkoopy mëti'ipë ëxëëk ja'ay'ajtpën ets ka'ap nitu'uk yë y'u'unk y'ok tyajwë'ëmë.

²⁹Yë oyjyä'äytyëjk nëjkxëp tkuma'ayën'atë yë naaxwiinyëtë, ets xëmëkyëjxm nëjkx tsyëënëtë naax wiinkëjxy.

³⁰Ja'ay mëti'ipë oyjyä'äyën niwijy nikejy winë tkäjpxy; näjyëtu'un yë oyjyä'äypë aak mëtëy winë tkäjpxy.

³¹Jä'ä ko myëët'ajtyp ma jyot wyinma'anyën mëti'ipë yë Tyios tukni''ijxëyëtëpën; yë ye'eyën nyajxën xëmë ta'tspëky y'ity, nijëna'a kyakëtay.

³²Yë ëxëëk ja'ay je'eyë tpa'ixy tpawoony yë ja'ay mëti'ipë oy juukyajtpën, ets nimay nitajë wi'ix tyaj'ookëtyën;

³³e yë Wintsën ka'ap nijëna'a y'u'unk y'ëna'k tmajtstu'uty, ets ka'ap tkupëky nëkoo ajotkumonë yajniwaanpätëty.

³⁴Mijts jämyë këx'ix ma Wintsënën, ets yi'iyë mëmëtow, yë'ë mkumayanëp ets mo'oja'anyë tu'uk yë naax kajpn tä tu'uk yë näkyumayën. Nëjkxëp kë'ëm xy'ixy wi'ix ënäty ja ëxëëkja'aytyëjk kyutëkoytyën.

³⁵Tëës n'ixy ko yë ëxëëk ja'ay kë'ëm janty mëj nyäyajnaxyë, ets nëkooyë wyinma'any nyätyuk mëjpëjktakënë tä tu'uk yë mëj kepyën nëkooyëpë yoonwä'kxyën,

³⁶e tëë ja jyëwa'knë, ka'ap ma y'ëkyajpatnë; tëës njajaak'ixta'ay, ka'apës ma të n'ëkpatnë.

³⁷Yë'ë ënät ëk'ix ëktun yë ja'ay mëti'ipë ka'ap tii tuuntëkoyën ets oypyë xëmë jyä'äy'ätyën: yë jëtu'unpë ja'ay yë'ë y'a'ijxyp jyëjp'ijxyp yë akujk'ajt jotkujk'ajtën.

³⁸Yë ja'ay mëti'ipë käjpxy kyumëtoownajxtëpën tsojk'am nëjkx kyutëkoytyë; yë'ë y'a'ijx jyëjp'ijxtëp o'kën tëko'oyën.

³⁹Yë putëjkën mëti'ipë oyjyä'äytyëjk yajmo'ojantëpën jam tsyoony ma Wintsënën, mëti'ipë tsoktakn wyantëpën ko tii ëyo'on tpaatë.

⁴⁰Yë Wintsën yë'ë putëjkëyëtëp ets kyä'äktëty tsipjoty. Yë'ë tukukäkëtëp yë ëxëëkja'aytyëjk ets tsyo'oktëty, jä'ä ko ma yë'ëjën jam t'ixta'atë ja kuwa'anën.