Read Biblia Mixe de Quetzaltepec Salmo 39 Bible Online

Salmo 39 - Biblia Mixe de Quetzaltepec bible

Salmo 39

¹Ëjts jëtu'unës ënäty të nmay të ntajy koos oy njuuky'ata'any, ka'apës nëkoo nëë poky ntuna'any nkajpxa'any, mëkës yë n'aaw nyä'än nkëwent'ata'any ko ënäty ja ëxëëkja'aytyëjk nwintuuyës yajpaatë.

²Uumës ojts näpyëjktä'äkyë, ka'apës tii nkäjpxy; yë'ëpaatës ka'ap oypyë nkäjpxy. E ja npa'amës ni'ikyë të myëjtä'äky.

³Yë njuukyjotës toopy jäämp ijty, koos nmëmay nmëtajy, ko tu'uk yë mëj jëën jap të myëjë njootjotyës, täätsës mëk të nyujk'ëna'any:

⁴Wintsën, tuknija'awëkës wi'ixës nëjkx nkukëxë ets nu'unës njaakjuuky'ata'any; yë'ëjës nijawëjäämpy pën jawäänës njaakjuuky'ata'any.

⁵Janty wäänës yë njuukyajtën të xytyimmooynyë; yë njuukyajtënës mijts mwintuuy ka'ap nijënu'un tii tkëjxmëty. Tëkokyë yë ja'ayëty jëtu'un yaa naaxwiiny jyuuky'ajtkojtë tä yë ja'ay myëkxejyën.

⁶Tëkokyë yë naaxwiinyëtë ja'ay jëtu'un nyäxy poj'am tä tu'uk yë äpkën; ka'ap nijënu'un tuk'oy'atëty oy jënu'un yë wit meeny nipëjkpät nituumpätëty, jä'ä ko ni yë'ë tkanijawë pën nëjkx tmëwë'ëmy.

⁷E ko jyëtu'un'aty, Wintsën, ëjts ¿tiijës njaak'ëwxitëp? Ëjts jämyës yë n'ëwxijtën nmä'kxtujkën njaakpëjktä'äky ma mijtsën.

⁸Yajpëtsëëmkës pokyjoty; ets këtii xyajkutuky ets xynyëxi'ik xytyukxi'iktëtyës yë tsuuja'aytyëjk.

⁹Uumës të näpyëjktä'äkyë, ka'apës yë n'aaw nëkoo të nyajwä'kxy, jä'ä ko mijts tii winë mtuumpy.

¹⁰Këtiis nëkoo ëxëëk xytyuny xy'ënëëmë; ëjts janty yun janty këtawës näjyawëty koos xywyopy xykyä'ätsy.

¹¹Mijts m'ojpy yë ja'ay, mtukumëtoopy yë pyoky; naaxway xyaj'awinpity mëti'ipë tsyojkpy jya'apën. Tëkokyë yë naaxwiinyëtë ja'ay tu'kmëkxejyë je'eyë jyuuky'äty.

¹²Wintsën, mëtoow'ijtkës yë ntsajpkäjpxy, ja'akyukë tiijës ko një'ëy nyä'äxy, këtii amonyë m'itëty maas një'ëy nyä'äxyën. Ëjts jëtu'unës nnäjyawëty tä jaaypyaat jaaypyo'kxyën ma mijtsën, tä yë joon kyääkjëtityën, tääjës yë n'ap n'okën.

¹³Këtiis nëkoo xywyintë'kxy, yajpo'kxkës; maanëmës ka'ap n'ooky ntëkoynyëm.