Read Biblia Mixe de Quetzaltepec Salmo 41 Bible Online

Salmo 41 - Biblia Mixe de Quetzaltepec bible

Salmo 41

¹Jotkujk yë ja'ay yajpaaty mëti'ipë y'ijxpatypën yë ëyoopëja'ay ets o'ktëypyë yajpaatyën ets tputëkë; yë Wintsën yë'ë yajtso'okanëp ko ënäty ëxëëk ja xëëw po'o wyinkony.

²Yë Wintsën yë'ë kuwa'ananëp ets myo'oja'anyë yë juukyajtën ets jotkujk'ajtën yaa naaxwiiny, ka'ap y'ëxmatsa'anyë ets kya'ajëty jam ma myëtsipën.

³Yë Wintsën yë'ë mmo'ojanëp yë mëk'ajtën ma ënäty yuujoty pa'amjoty yajpaatyën ets myo'oja'anyë tsokën akëtakën ma ënäty pyikyë y'ixyën.

⁴Jëtu'unës të n'ëna'any: Wintsën, pa'ëyoowkës najts'ëyo'owëkës; yajtsokës oy të nmëpokytyuny.

⁵Yë nmëtsiptëjkës oy tjatsoktë jeexyë ëxëëk njaty nkëpetyës: Jyatsojktëp ets jeexyë muum n'ookyës ets ka'ap nyajja'amyätsëtyës.

⁶Koos xynyimintë ka'ap tëyajtën kyajpxtë; jap wyinma'anyjoty ëxëëk jap myäytyë tyajtë, ko muum nyëjkxtë tääts tmëtyakpëtsëmtë.

⁷Mëti'ipës xy'ëxëëk'ijxtëpën aakyë'ë nyämyukëtë ets ëxëëkjaty xynyikajpx xynyimëtya'aktës; jëtu'un myäytyë tyajtë koos npokyës nkëpejtyp,

⁸ets y'ëna'antë: Ku'oypyë pa'am mooyëp; tëë pa'am mëk myätsyë, ookaanp yë'ë.

⁹Yë'ëpaat yë nmëku'ukës mëti'ipës ënäty mëët oy nnäjyawëtyën, mëti'ipës ënäty mëët tu'ukyë nkay n'uukyën, nän tëës xymyëtsiptsoony.

¹⁰E mijts Wintsën, pa'ëyoowkës; yajtsok yaj'akëtakës, ets nmëtsip ntukumëtowëtëtyës ijxtëm të xytyimtuntënës.

¹¹Jëtu'un'äämpyës nijawëty ko mijts xyjyänty tsyojkpës ko ka'ap ja nmëtsipës xyoonta'akëty ko ëxëëk njaty nkëpetyës.

¹²E ëjts, maas oy të njuuky'ätyën, mkë'ëjotyës yaj'ijtk, ets mijtsës xëmë mmëët'ajtk.

¹³Kënu'kxy yë Wintsën y'itëty mëti'ipë yë Israel y'ëwtajtypyën tyam ets xëmëkyëjxm. Jëtu'un'atëp.