Read Biblia Mixe de Quetzaltepec Salmo 42 Bible Online

Salmo 42 - Biblia Mixe de Quetzaltepec bible

Salmo 42

¹Jëtu'un tä jëtyu'u u'unk tyëëtsën, nëë'ëkë'pë nyijkxyën nëë ukpë, jëtu'un n'ixta'ay mijts Tios, mëti'ipës n'ëwtajtypyën.

²Ëjts nyajmëyäjtypyës yë Tios yë näpyutëkë, Tios juukpyë. ¿Jëna'ajës jëtää jatëkok jam nëjkxëty Tios wintum?

³Xëëny kootsës të një'ëy të nyä'äxy, jëtu'un yaj'ijxnë yë'ëjës yowë nwiin nëë xykyuxp. Ja nmëtsipës jëtu'un y'ëna'antë: ¿Maa ënät ja mTios?

⁴Koos jëtu'unpë nmëmay nmëtajy, japës ntimjyawë pyëjkë'ëky njootjotyës. Je'eyës njaakja'amyetsy ko ijty mëët yë mayjyä'äy nnëjkxyës jam tsajptëkotm, maas ijty ëjts jëyëjp nëjkxyën akujk jotkujk ets nyajnaxtës ja kukajpxën ja'awëkyëtakën. Mëj ja xëëw ijty tyunyë.

⁵¿Wi'ixës ko nkumon nkutukëty, ¿wi'ixës ko nkumay nkutajëty? Ëjts Tiosës ntuk'ijxpejtyp, mëti'ipës je'eyëm nyajmëjnaxäämpyën. Tääpë Tios yajtsokp yë'ë ets yaj'ëwaatsëpëtsëëmp.

⁶Mon tukës nnäjyawëty, paaty mijts nmëmay nmëtajy. Jampaat ma Jordán mëjnëëjën, ma Hermón kopk ets ma Misar kopkën.

⁷Yamëtoop yë mnëëtax ko kyëtä'äky jap wokjoty, yë nëëkom mëti'ipë të xykyexyën jam të nyajxta'ay maas yë nini'kxën.

⁸Yë Wintsën xytyuknikäjxpës yë tsyojkën jya'awën xëëny; e ko kyoots'aty ëëp yaxpës jää, etsës yë Tios nmëkäjpxy mëti'ipës xyajjuuky'ajtpën.

⁹Jëtu'unës Tios n'ënëëmë mëti'ipës xykyuwaanpën: ¿wi'ixës ko xyjyä'äytyëkoy? ¿Wi'ix koos nyajpaatëty jë'ë ya'ax ko ja nmëtsipës ëxëëk y'ëti'itsy y'ënä'äny?

¹⁰Jëtu'unës yë nwaay mpajk pyëjknë y'atoonë koos xyajjoot'anpëktë yë nmëtsiptëjk, ets janaam jatsojk xyajtëwtës: ¿Ma ënät ja mTios?

¹¹¿Wi'ixës ko nkumon nkutukëty? ¿Wi'ixës ko nkumay nkutajëty? Ëjts Tiosës ntuk'ijxpejtyp, mëti'ipës je'eyëm nyajmëjnaxäämpyën. Tääpë Tios yajtsokp yë'ë ets yaj'ëwaatsëpëtsëëmp.