Read Biblia Mixe de Quetzaltepec Salmo 46 Bible Online

Salmo 46 - Biblia Mixe de Quetzaltepec bible

Salmo 46

¹Tios yë'ë xykyuwa'anëm xyajtsokëm ets yë'ë xymyëkmo'oy xymyëjaawmo'oyëm; mëti'ipë putëjkëpën ko mon tuk nyajpatmëty.

²Paaty ka'ap tii yajtsë'ëk yajjawë, oyxyëp jeexyë yë naaxwiinyëtë wi'ix jya'ajtpë, oyxyëp jeexyë yë tun kopk tyimnëëkujijtääpyë këknëëjoty,

³oy jënu'un yë nëëkom y'iitsy kyom, oy jënu'un jyä'tsmin jyä'tsxëpëty yë nëë'o'pyky ets tun kopk y'ëtëtsta'akëty mëët yë joot'an.

⁴Jää tu'uk yë mëjnëë mëti'ipë jëtu'un xajwa'kxpën tä ja'ayën, yajxoontäkpy yë Tios yë nyaax kyajpn, tääpë naax kajpn këjää wya'atsëty, yë'ë kyajpn ja ni'ik Këjxmëpë.

⁵Tios yë'ë jam itkujky ijtp ets yë'ë kyuwäämpy; Tios yë'ë putëkëjanëp ko xëëw po'o tsyo'onta'akëty.

⁶Yë mëjëtypë naax kajpn jëtu'un jyänty y'ëtë'ëts jyänty y'ëna'antë, tëkokyë mëti'ipë kutujkën'ajtëpën janty tsë'këtyëp, ets naaxwiinyëtë ka'ap jotkujk yajpaaty ko y'aaw y'ayuk tyajmëtoyë.

⁷Yë Wintsën mëti'ipë maaytyääyëpën winë, yaa tyam yajpaaty mëët ëëts'ajtëmë. Yë'ë ntsoktakn'ajtëm mëti'ipë Jacob y'ëwtajtën.

⁸Min ixtë mëti'ipë yë Wintsën të tunyën mëj këjää yaa naaxwiiny,

⁹tëë tyajkëxy tyajnaxy yë tsip käjpxy naaxwiinyëtë apëtsëmy, tëë tëjtakta'ay yë ti'pxn, tëë piw nuuk tyajjajta'ay yë ku'umën. Të tyajnitooytyä'äy yë kepy wintëkäämpë mëti'ipë ja'ay myëtsiptuuntëpën.

¹⁰Näkyë'ëyakëtë. Ijxkajptëkës koos ëjts nTiosëty. Ëjts mëj'äämpy ijtp ma mëjëtypë naax kajpnën, Mëj'äämpyës n'ity ma naaxwiinyëtë y'ëwtityën.

¹¹Yë Wintsën mëti'ipë maaytyääyëpën winë yaa tyam yajpaaty mëët ëëts'ajtëmë. Yë'ë ntsoktakn'ajtëm mëti'ipë yë Jacob y'ëwtajtën.