Read Biblia Mixe de Quetzaltepec Salmo 47 Bible Online

Salmo 47 - Biblia Mixe de Quetzaltepec bible

Salmo 47

¹Tukë'ë'apo'kxmuktë, miitsëty naax kajpn; mëk yë Tios mmëkajpxtë mëët yë xoontakën.

²Jä'ä ko yë Wintsën, Ni'ik Këjxmëpë, atsë'ëk ajawë yë'ë, yajkutujkpë y'ity naaxwiinyëtë apëtsëmy.

³Kanaak ojts yë naax kajpn mëjëtypë tyajkutëkoy, ets tyaj'awinpijty ëyoopë mëtuunpë ma ëëtsajtëmën.

⁴Tëë kë'ëm twin'ixy mëti'ipë nëjkx nkuma'ayën'ajtëmën, yë'ë mëti'ipë mëpaat yë Jacob yajtukja'amyetsyën, mëti'ipë ojts tsoky tjawën.

⁵Yë Tios mëti'ipë Wintsën'ajtpën tëë yë y'ënyääytyakn tpëky ma jam yajkutukëtyën mëët yë xuxpë wojpë ets mëët yë xoontakën mëjpë këjääpë.

⁶Ëwtë ya'axtë; yë'ë ëwtë mëti'ipë Tios yajtukuuy'ëëpën. Ëwtë ya'axtë; win'ëwtë nyajkutujkpë'ajtëm.

⁷Tukkuuy'ëwtë yë Tios oyëtypë ëy ets aaw ayuk oyëtypë yajmëtoyën, jä'ä ko yë'ë yajkutujkp ma tëkokyë yë naaxwiinyëtë y'ëwtityën.

⁸Tios yë'ë yajkutujkp ma tu'kë'ëyë naax kajpnën. Jam yë Tios y'u'unyë ma y'ënyääypyäjnën wa'atspë.

⁹Tëkokyë yë ja'ayëty mëj'äämpyë y'itën ma naax kajpnën, tëë tyu'ukmujkta'atë ma Tios ja nyaax kyajpnën, mëti'ipë Abraham Tiosajtën,

¹⁰jä'ä ko tëkokyë yë kutujkën yaapë naaxwiinyë yajpaatën Tios yë jyä'ä ets yë'ë kyëwentëpëjktääpy oy tyimtiijëty.