Read Biblia Mixe de Quetzaltepec Salmo 49 Bible Online

Salmo 49 - Biblia Mixe de Quetzaltepec bible

Salmo 49

¹Mëtoow'itë ya'atë yajxon, miitsëty naax kajpnëty ets tëkokyë ja'ay naaxwiinyëtë apëtsëmy,

²jëtu'un mëti'ipë kuwit kumeenyëtyën ets mëti'ipë ëyoow jotëkooytyëpën, näjyëtu'un mëti'ipë mëj'äämpy ijtëpën ets mëti'ipë yu'unk naxym ja'ay'ajtëpën.

³Tyamës nkajpxa'any mëët yë wijyajtën kujk'ajtën, yë'ëjës nimëtya'akäämpy mëti'ipës nmääpy ntäjpyën, mëti'ipë yäjkpyën mëj këjää ja nija'awën.

⁴Tyamës nikajpxa'any tëkokyë yë aaw ayuk mëti'ipë tsipëtyën, etsës nimëtya'aka'any mëti'ipës yu'utsy nmëët'ajtypyën jëtu'un tä yë kow y'ënä'änyën.

⁵¿Wi'ixës ko ntsë'ëkëty pën ëxëëk yë xëëw jëmëjt wyinkony, ëkë pën ëxëëk y'ëtë'ëtstë y'ëna'antë yë nmëtsiptëjkës nwintuuy npë'aayës?

⁶Yë'ëjëty yi'iyë tyukjotkujk'ajtëp ko kyuwit'at kyumeeny'atë ets jyä'äy'atë amëj akëjxm ko tmëët'atë winë,

⁷e oyts tii may tjamëët'atë ka'ap yë'ëjëty yajtso'onka'anëtë, ets ka'ap tjëkyepy yë Tios tukmëjuytyëty ets ja jyuukyajtën nyitso'oktëty.

⁸Ka'ap tjëkyepy yë naaxwiinyëtë ja'ay tjuyëty yë jyuukyajtën mëët yë wit meeny.

⁹Ets jyuuky'atëty xëmëkyëjxm ets kajëna'a yë o'kën kyatukja'tëtëty.

¹⁰Jä'ä ko tëkokyë yë ja'ayëty kwanë ko y'ooka'antë tu'knax, jëtu'un mëti'ipë wijyën ets mëti'ipë ka'ap wyijyëtyën, e ja wyit myeenyëty wiinkpë tyuk'oy'atäämpy.

¹¹Oy ja nyaaxëty të tjaxëëwmo'otë tä yë xyëëwëtyën, jap o'kpëjutjoty xëmë yajpaata'antë: Jap nëjkx winë xëëw winë jëmëjt yajpaatë.

¹²Yë naaxwiinyëtë ja'ay ka'ap xëmëkyëjxm jyuuky'äty oy jënu'un jyakumeenyëty; näjyëtu'un y'ooky tyëkoy tä jëyujkën.

¹³Jëtu'un kyëxtë nyaxtë mëti'ipë näkyumaayëtëpën ets jëtu'un kyëxa'an nyaxa'antë mëti'ipë nämyëjpëjktakëtëpën.

¹⁴Jëtu'unpë ja'ayëty o'kën tu'uwinye'eyëtëp jam ma o'kpëjutën, jëtu'un tä ja'ay yë kupixyny twoowye'eyën. Ko ënäty xyiintyä'äky, yë oyjyä'äytyëjk yë'ë mëta'akantëp ma yë'ëjëtyën; yë jyot myëjaawëty nëjkxëp kyukëxë, ets o'kpë jut nëjkx xëmë tuktsëënëtë.

¹⁵E ëjts yë'ëjës Tios xyajtso'okaanp o'kënjëjp'am ets yë'ëjës xyajnëjkxaanp ma tsyëënën.

¹⁶Këtii xywyiink'ixëty ko pën kyumeenytya'akëty ets ko pën oy yë jyëën tyëjk tkojëty.

¹⁷Ko y'ooky tyëkoyëty ka'ap tii tmënëjkxa'any, ni yë'ë nëjkx tkamënëjkxy oypyë tsujpë mëti'ipë të tpaatyën.

¹⁸Oyxyëp janty'oy nyäjyawëty maanëm jyuuky'ätyën ets janty may yë ja'ay kumay yajnaxyë mëët ko kyumeenyëty,

¹⁹miimp yë xëëw jëmëjt ma y'ooka'anyën ets kajëna'a yë xëënyajtën tka'ëk'ixanë.

²⁰Yë naaxwiinyëtë ja'ay ka'ap xëmëkyëjxm jyuuky'äty oy jënu'un jyakumeenyëty; näjyëtu'un y'ooka'any tä jëyujkën.