Read Biblia Mixe de Quetzaltepec Salmo 52 Bible Online

Salmo 52 - Biblia Mixe de Quetzaltepec bible

Salmo 52

¹Mijts jotmëkja'ay ets jotkujk ja'ay, ¿wi'ix ko janty mëj janty këjxm mnäjyawëty ko winë ëxëëk xytyuny xykyäjpxy? Yë Tios yë tsyojkën jya'awën xëmë y'ijtëy.

²Yi'iyë mmëmääpy mmëtäjpy wi'ix winë ëxëëk xytyunëtyën; yë m'aaw myä'än jëtu'un yajtsëtyuty tä tsujknën jëjpëpë.

³Yi'iyë ëxëëkpë mtsojkën'ajtyp tä oypyën, ets mwin'ëëny tä jeexyë mëtëy winë xykyäjpxyën.

⁴Aaw yä'än mëti'ipë tëë t'ijxwë'ëmyën ko ëxëëkjaty y'ënä'äny, yë'ë mkäjpxyp mëti'ipë ja mmëku'uk y'ëxëëkmëtowëpën.

⁵Tios yë'ë nëjkx näjyëtu'un myajkutëkoyë xëmëkyëjxm; nëjkxëp myajpëtsëmyë ma mjëën mtëjkën ets m'ixkäxëtëty, nëjkxëp ja mjuukyajtën mpëjkxëty.

⁶Pënjaty myëmëtoopyën yë Tios, y'ixantëp ets wyinkutsë'ëkëjantëp, tääts nëjkx je'eyë nëxi'ik tukxi'iktë ja jëtu'unpë ja ja'ay; ets y'ëna'ana'antë:

⁷Ix wi'ix jyäty kyëpety ja ja'ay mëti'ipë ka'ap ja Tios nyätyukë'ëwanëtyën, mëti'ipë yi'iyë tyuk'ijxpejtypyën ja wyit myeeny, ets ni'ikyë winë ëxëëk ttuun'ëtë'ëtsy.

⁸E ëjts jëtu'unës tä tu'uk yë olivë kepyën tsuxkpë, jëtu'unës nyajpaaty ma Tios yë tsyajptëjkën, xëmës yë tsyojkën jya'awën ntukjotkujk'atanë.

⁹Tios, kë'ëyxyëëw kë'ëyjyëmëjtës nkukajpxëja'any ma mijtsën mëët ko oy winë xytyuny; mijts xëmë n'ëwxitäämpy ma ja'ayëtyën mëti'ipë wa'ats juuky'ajtëpën, jä'ä ko mijts janty'oy janty tsuj mTios'aty.