Read Biblia Mixe de Quetzaltepec Salmo 55 Bible Online

Salmo 55 - Biblia Mixe de Quetzaltepec bible

Salmo 55

¹Tios, mëti'ipës nTios'ajtypyën, mëtoow'ijtkës yë ntsajpkäjpxy, ets këtii jëtu'unyë xynyakumëtoownaxy mëti'ipës niwaantäkpy ninu'kxtäkpyën.

²Mëtoow'ijtkës, ëtsoowkës; mon tukës nyajpaaty, paaty yam mijts nmëkäjpxy, janty oytsyë'kënës nmëtoownë yë nmëtsiptëjkës yë y'aaw yo'kn. Yë'ëjëty je'eyës xyajjë'ë xyajya'axtë etsës xynyipëtë'ktë.

⁴Mëpaatëpës yë njuuky pyëtsëëmnë; yë tsë'ëkë mëti'ipë yaj'o'kpën yë'ëjës të xytyukkëtä'äky.

⁵Tëës yë mëktsë'ëkë xytyuktëkë ets janty tsëyuuypyës mëët yë tsë'ëkë.

⁶Etsës n'ëna'any: Jëtu'unpëk jeexyë n'ëkmëët'atyës yë nkäknës tä yë pakën; kääkë'kpës jeexyë etsës jeexyë wäänë npo'kxy.

⁷Koos jeexyë n'ëkkääkjëtity, nëkooyës jeexyë muum jëkäm nëjkxnë, ets jamës jeexyë nwë'ëmnë tsënääpyë ma muum y'aanë'ëk tyëëtsë'ëkëtyën.

⁸Pojënës jeexyë nkuke'ek yë mëk tuu mëkpoj.

⁹Yajkutëkooytya'a yë ja'ay jënu'unës xymyëtsip'atën, Wintsën, mijts yë y'aaw y'ayuk myajjo'opëp, yi'iyë yaj'ijxp xëmë tsip käjpxy ets näy'ëxëëk'ixë,

¹⁰xëëny koots ja'ay nyaxtë tyëkëtë kajpnjoty, tmënax tmëtëkëtë ja y'ëxëëkjot y'ëxëëk winma'any; yi'iyë myëmaay myëtajtëp wi'ix yë wit meeny ka'ap nimëjaaw tpaatëtyën;

¹¹tu'ujoty ma nyaxtë tyëkëtën, yë'ë xëmë tuunëp jajtëp yë tsip ets näwyin'ëën näwyinxajë.

¹²Koos yë nmëtsip xyajjoot'anpëky këtii myëmëtaknëty, koos yë nmëtsip xynyipëtë'ëky wi'ixës n'ëknäyu'utsëtëty.

¹³Mijts tëy tu'uk n'oyjya'ap, ets mijts janty'oy nmëku'ukja'ap,

¹⁴mëti'ipës mëët tu'ukyë të nye'eymyuky ma Tios ja tsyajptëjkën ets mëët tu'ukyë të nxony të n'ityës oy mëët ja näjyiiky'at näymyëku'uk'atë, ets mëët të nnaxy të ntëkës mayjyä'äy itkujky.

¹⁵Jääpëk yë nmëtsiptëjkës yë o'kën tyukja'tëtë ajotkumonë, ëkë jeexyë ajuukyë kyuka'anaxtë jutjoty, jä'ä ko yë'ëjëty yi'iyë yë ëxëëkajtën jap jyootjoty wyinma'anyotyëty.

¹⁶Ëjts, Tios ënätyë nmëkajpxäämpyës, jä'ä ko yë Wintsën yë'ëjës xyajtso'okaanp.

¹⁷Jopyëp, kujkxyëëw ets uxëp një'ëja'any nya'axa'anyës, ets yë'ë myëtowäämpy.

¹⁸Ko muum yë tsip tyunëtëty yë'ëjës xyaj'ëwaatsëpëtsëmaanp, yë'ë yajtso'okäämpy yë njuukyajtënës oy jënu'un jyanimayëty yë nmëtsiptëjkës.

¹⁹Yë Tios mëti'ipë xëmëkyëjxm yajkutujkpën, yë'ë myëtoow'itäämpy yë një'ëyënës nyaxënës, ets nëjkx o'ktëy tyunëtë, ko ënäty ka'ap ja jyot wyinma'any tyajtëkatstë ets ko ka'ap ja tmëët'atë tsë'ëkë ma Tiosën.

²⁰Tyuknipëtë'ktëp ja myëku'uk ja kyë'ë y'aaw, ka'ap tkuuytyuntë tä ënäty ja myëku'uk mëët tii të njakäjpxy'atën.

²¹Janty oy yajmëtoy kyajpxtë myëtya'aktë, ets tsojk xytyukmëpëjkmëty jyot wyinma'anyëty, ëk'ix yë on ko tii ntukniku'tsmëty. Yi'iyë myëmaay myëtajtëp tsip. Janty xu'kx yajjawë ja y'aaw y'ayukëty jëtu'un tä tojkxën ontsa'aypyë, e nëkoopë tyajmëtowëtë, jä'ä ko yë'ëjëty yë'ë nyipëjktakëtyëp wi'ix m'ëyo'onpaatëty.

²²Pëjkta'ak tëkokyë yë mma'ayën mtajën ma Wintsënën, yë'ë xëmë myaj'itanëp amëk jotmëk; yë'ë ka'ap tmajtstu'uty yë ja'ay mëti'ipë mëmëtoowëpën ets ëxëëk jyatëty.

²³Tios mëti'ipës nTios'ajtypyën, ka'ap jeky jyuuky'ata'any yë yaja'ay'o'kpë ets win'ë'ëmpë; mijts kë'ëm myajkutukëp ets kyuka'anaxtëty jap o'kpëjutjoty, e ëjts ënät, mijts tu'ut ntuk'ijxpätäämpy.