Read Biblia Mixe de Quetzaltepec Salmo 56 Bible Online

Salmo 56 - Biblia Mixe de Quetzaltepec bible

Salmo 56

¹Pa'ëyoowkës, Tios mëti'ipës nTios'ajtypyën, tää yë ja'ay kanaak mëti'ipës xy'ixjëtijt xypyajëtijtëpën; janaam jatsojkës xytyukjoot'anpëktë etsës ëxëëk xytyuntë xy'ënëëmëtë.

²Oyjyëna'ajëty xy'ixjëtit xypyajëtitës yë ja'ayëty mëti'ipës xymyëtsip'ajtëpën; nimay nyäpyaatëtë mëti'ipës xynyipëtë'ktëpën ets janty mëj këjxm jyä'äy'atë.

³Koos näjyawëty ntsë'ëkëja'any, ënetyës yë nwinma'any jam jyä'ty ma mijtsën.

⁴Tiosës tu'uk ntuk'ijxpejtyp, ets yë'ëjës nmëjja'ap njaantyjya'ap yë y'aaw y'ayuk; Tiosës ntukjotkujk'ajtyp, paatyës ka'ap ntsë'ëkë. ¿Wi'ixës yë naaxwiinyëtë ja'ay xy'ëktunëty?

⁵Oyjyëna'a xëëwëty ëxëëkjatyëty yë aaw ayuk xytyuknipëtsëmtës; yi'iyë myëmaay myëtajtëp wi'ixës ëxëëk xy'ëktuntë.

⁶Xii yaa muum nyäpyëjkta'akëtë ayu'utsy ame'tsyë, xy'ixjëtit xypyajëtitës maas muum nnaxyën, t'ixtë tuntë jëna'a t'ëkjëkyepy muum xyaj'ooktës.

⁷¿Wä'än jëtää tjëkyepy tkukä'äktëty yë y'ëxëëk'ajtënëtyë? Nijënu'un tkajëkyepy. Mijts Tios, naxkutijë naxkumatsë yë naax kajpn mëët yë mtsip m'äkë.

⁸Mijts mëtyoopy naak'okës nke'ekyën; ets jënu'unës nyä'äxyën, ¿Ti ka'ap jap këxja'ay xymyëëtëty mnokyjyotyë?

⁹Nëjkxëp jëna'a yë nmëtsiptëjkës kyäkta'atë ko ënäty yë putëjk pupäjtën jam n'amëtoyës ma mijtsën. Ëjts wa'atsës nijawë ko yë Tios yë'ëjës xypyukajpxëp.

¹⁰Tios yë'ëjës ntuk'ijxpejtyp, ets nmëjpëjktakëpës yë y'aaw y'ayuk; yë Wintsën yë'ëjës ntuk'ijxpejtyp, ets nmëjpëjktakëpës yë y'aaw y'ayuk;

¹¹Tiosës ntukjotkujk'ajtyp, paatyës ka'ap ntsë'ëkë. ¿Wi'ixës yë naaxwiinyëtë ja'ay xy'ëktunëty?

¹²Ja waantakën mëti'ipë të ntukwinwanën, nkuuytyunäämpyës ma mijts mëj'äämpy nyajnaxa'anyën,

¹³jä'ä ko mijts tëës xyajtso'oky jam o'kënjëjp'am, ets tëës xyajpëtsëmy maas ënäty nka'ajanën etsës njuuky'atëty kutë'kxy kujajy ma Tiosën.