Read Biblia Mixe de Quetzaltepec Salmo 6 Bible Online

Salmo 6 - Biblia Mixe de Quetzaltepec bible

Salmo 6

¹Wintsën, këtiis xy'ojëty, këtiis xytyiytyunëty mëët yë mtsip m'äkë.

²Pa'ëyoowkës Wintsën, tëës näjyawëty nmëjaawkëxy. Wintsën, yajtsok yaj'akëtakës jatëkok, aak tsëyuuynyëpës yë nini'kx nja'awënë.

³Tsëyuupyës mëët tsë'ëkë, e mijts Wintsën, ¿jëna'a mmina'any?

⁴Min Wintsën, yajtsokës yë njuukyajtën, Yajtsokës mëët ko xytsyokyës.

⁵Ko pën y'ooky, ¿wi'ix m'ëkja'amyäjtsënëty? Jap o'kpëjutjoty ¿pën jap mkuuy'ëwanëp?

⁶Tëës n'ënu'kxënë koos nyä'äxy. Xëëny kootsës një'ëy nyä'äxy, nkoy npä'änës tëë nyatsa'amëtyääynyë mëët yë nwiinnëëjës.

⁷Tëës yë n'ijxën jyaamënë mëët yë pëjkën ato'onën; Yë'ë nmëtsipës poky myëët'ajtëp koos yë nwiin të jyaamënë.

⁸Mëjëkämkäktëkës, miitsëty, ëxëëkpë tii xytyuntën xykyajpxtën, yë Wintsën tëë tmëtoy koos një'ëy nyä'äxy.

⁹Yë Wintsën tëë tmëtoy koos të nmënu'kxtä'äky, tëë t'ëxaj tkupëky yë nnu'kxtakënës.

¹⁰Yë nmëtsipës tsë'këtya'ajantëp ets nëxi'iky tukxi'iky wyë'ëma'antë; tu'k'ijxmi'kxyë kyäkta'aja'antë wintsëtyu'un jëjptsëtyu'un.