Read Biblia Mixe de Quetzaltepec Salmo 63 Bible Online

Salmo 63 - Biblia Mixe de Quetzaltepec bible

Salmo 63

¹Tios mëti'ipës nTios'ajtypyën, mijts nTiosniwäämpy, jëtu'un nyajmëyäty tä yë ja'ay nyëtëëtsën; tëkokyë yë njot nini'kxës mijts myajmëyajtëp, jëtu'un tä yë të'ëtsnaax nëë tyajmëyätyën.

²Jëtu'un njajanty'ixa'any ma mtsajptëjkën, etsës njatukxoonta'aka'any ja mmëkajtën m'oyajtën,

³jä'ä ko yë mtsojkën mja'awën ni'ik yë tsyowpaaty këtiinëm jyëtu'unëty yë juukyajtën. Paatykyëjxm mijts nwin'ëwa'any nwinya'axa'any mëët yë n'aawës;

⁴mapaatës njuuky'ätyën yaa naaxwiiny naaxkëjxy, jëtu'un mijts nikajpxa'any nimëtya'aka'any, ets nxajë'ëka'anyës ja nkë'ë ko ënäty mijts npa'tmëkäjpxy.

⁵Täätsës jëtu'un nnäjyawëtëty janty akëtä'äky janty jotkëtä'äky, jëtu'un tä yë ja'ay akëtä'äky jotkëtä'äky nyäjyawëtyën ko kyäy y'uuky, ets ja n'aaw nyä'änës mëjpëjkta'akëtëty mëët ja xoontakën.

⁶Koots, koos nma'ajanë; ënätës yë nwinma'any jyä'ty ma mijtsën ets nja'amyetsy;

⁷jä'ä ko mijts xypyutëjkëpës. Jotkujkës nnäjyawëty mkäknpa'tkë'p.

⁸Mijtsës oy tsuj xyajjuuky'ajtp, ets mijtsës xykyuwaanp xykyënu'kxp.

⁹Mëti'ipës xyaj'ookantëpën, kë'ëm nëjkx o'kpëjutjoty kyuka'anaxtë;

¹⁰Kupuxy y'ooka'antë, ets pa'uk nëjkx tsyu'utsëtë.

¹¹E ja yajkutujkpë xoonta'akaanp jä'ä ma Tiosën; y'ëwantëp ja ëy mëti'ipë oy nimëtyakëpën, e ja mëti'ipë win'ë'ëntëpën amë'pxy y'ita'antë.