Read Biblia Mixe de Quetzaltepec Salmo 64 Bible Online

Salmo 64 - Biblia Mixe de Quetzaltepec bible

Salmo 64

¹Tios, mëti'ipës nTios'ajtypyën, mëtoow'it maas n'ëjy ntu'ukyën; mijts kuwa'an yë njuukyajtënës maas yë nmëtsipën kutsë'ëkëpë.

²Yu'tskës maas yë ëxëëkja'aytyëjk ëxëëk xy'ixyën, ets ma tii ëxëëkjaty tnimay tnitajëtën; mijtsës xyajtso'okëp ma tmëmay tmëtajtën xyaj'ooka'antës.

³Jëtu'un yë y'aaw yä'än tyajjëjpëtë tä yë tëypyujxnën ets ënät yë y'aaw y'ayuk tkajpxtë tsaaty ma'at ets yajtsëtyuty jëtu'un tä ti'pxnën mëti'ipë yaj'o'kpën.

⁴Jap muum yu'utsy tyi'pxë'ëktë ets tyajtsëtyut tyajwintëkoytyë mëti'ipë ka'ap tii tuuntëkoyën; yë'ëjëty nijënu'un tsë'ëkë tkamëët'atë, ajotkumonë muum tyi'pxë'ëktë.

⁵Aakyë'ë nyäjyotmëkmo'ojëtë ets winë ëxëëk tuntëty; yajxon tnimay tnitajëtë wi'ix muum yë myëku'uk yu'utsytyuuy tyajkëtaw tyajkëpiptëty ets ënät myäytyë tyajtë ko ka'ap pën y'ixëtë,

⁶paaty ka'ap tjëkyepy pën tpaye'eyëty mëti'ipë tyuuntëkooytyëpën. E ja mëti'ipë tëkokyë winë nyija'awëtyääpyën wi'ix tu'uktu'uk yë naaxwiinyëtë ja'ay yë jyot wyinma'anyën, jä'äts nëjkx winë tnipaye'eytyä'äy.

⁷Tios yë'ë nëjkx yajtsëtyutëtë mëët yë tyi'pxn, ajotkumonë nëjkx yajtsëtyutëtë;

⁸kyë'ëm aaw kyë'ëm ayuk nëjkx tyiytyunëtë, e ja ja'ayëty mëti'ipë ijxëtëpën je'eyë nëjkx nyëxi'ik tyukxi'ikëtë.

⁹Jäänëm nëjkx tëkokyë ja'ayëty tmëjjaw tkënu'kxjyawëtë yë Tios, ets tnikäjpxy tnimëtya'aktë tii ko Tios winë të tuny të tkäjpxyën; ets tja'akyukëtëty tiikyëjxm ko ënäty winë të tyajkojyën.

¹⁰Yë oyjyä'äy tyukxoonta'akäämpy yë Tios ets jam yë kuwa'anën t'ixta'aja'any ma yë'ëjën; tëkokyë ja'ayëty mëti'ipë oy tii tyuuntëpën jotkëtä'äky jyuuky'ata'antë.