Read Biblia Mixe de Quetzaltepec Salmo 65 Bible Online

Salmo 65 - Biblia Mixe de Quetzaltepec bible

Salmo 65

¹Mijts Tios, mëti'ipë yajpatpën jam Sión, mijts mpatëp myajkuuy'ëw myajkuuyya'axëty ets mpatëp yajpatunëty ja waantakën ma mijtsën,

²jä'ä ko mijts wa'ats xymyëtoow'ity yë tsajpkäjpxy. Tëkokyë yë naaxwiinyëtë ja'ay jam myintë ma mijtsën.

³Xymyëmëtaktëp ëëtsëty ja nëë poky mëti'ipë yajtuunp yajkajpxpën, e mijts mme'kxyp yë tuuntëko'oy kajpxtëko'oyën.

⁴Janty xoontä'äky yë ja'ay yajpaaty mëti'ipë mijts kë'ëm mwin'ijxypyën ets jam xyajnëjkxy tsënääpyë winkon ma m'ityën, ma ja tsënaaytyaknën mëti'ipë jam ma mtsajptëjkën. Jotkujk ëëts nnäyjyawëtë mëët ja xoontakën mëti'ipë jap ma mtsajptëjkën, ets ko jyap'aty ja oyajtën.

⁵Tios, mëti'ipës xyajnitsoktëpën, ko m'ëtsoy jam xyajnikëxë'ëky ko tii mëtëy xynyipaye'ey, paaty nitëkokyë yë naaxwiinyëtë ja'ay mijts mtuk'ijxpetyë jampaat mejy awinaxy;

⁶mijts jëtu'un myaj'oy'ijtyp yë tun kopk mëët ja mjot mmëjaaw ets ja mmëkajtën.

⁷Mijts yë nëëmejy amonyë myaj'ijtyp, ets ko yë naax kajpn ka'ap jyotkujk'aty mijts näjyëtu'un myajjotkujktäkpy;

⁸oy yë'ëpaatëty mëti'ipë muum jëkäm tsënaaytyëpën kwanë ko tsyë'ëkëtë ko t'ixtë wi'ix mijts winë mëj këjää xytyunyën. Aakmijts yë ja'ay mtukxoontakëp oymyaajëty, jëtu'un maatsow yë xëëw pyëtsimyën ets maatsow kyëtä'äkyën.

⁹Mijts yë naaxwiinyëtë mkëwent'ajtyp; mijts yë nëë tuu mkejxyp ma yë'ëjën ets winë myuxëty yonëty; mijts myajyoompy myajji'tsyp yë tsajpmok mëët yë mëk tuu mëknëëkom. Jëtu'un ja naax kam xytyukni'oytyunë yajxon.

¹⁰Mijts myajxo'kpy yë naaxwiinyëtë maajaty të yajtuktajtu'utyën ets xyajwin'utsy maajaty nyäxymyëtyën; mijts myajyu'unkëtyä'äpy yë naax, ets kënu'kxën xyajnaaxkëtä'äky ma winë y'ity wyintëyën kamwinm tu'uwinm.

¹¹Mijts yë mkënu'kxën myajkëtäkpy naaxwiiny naaxkëjxy, nyäxy yë xëëw jëmëjt. Ko jyää'aty yë yoots nëma'a, ënät winë y'ity wyintëy;

¹²yë mëëynyak mëti'ipë jamën ma të'ëts'itën tsuxk yaj'ixtë, ets ja tun kopk janty'oy kyëxë'ëktë;

¹³Ma yë joyjyotën tam jyätyë tsajppax ets kupixyny, tam näjyëtu'un tsajpmok kam, xoontakp yajjawë yë jot winma'any ko jam winë yajpaaty.