Read Biblia Mixe de Quetzaltepec Salmo 68 Bible Online

Salmo 68 - Biblia Mixe de Quetzaltepec bible

Salmo 68

¹Ko yë Tios tyëkë tsiptuunpë, yë myëtsiptëjk jëtu'unyë kyääkwa'kxta'atë; mëti'ipë ëxëëk'ijxëpën pojën kyukäkta'ayë;

²jëtu'un pyojwa'kxta'atë tä jok pyojwä'kxyën tsajpkëjxm, ets jëtu'un yaj'ixtë jëtu'unyë yowë jyiiywya'kxnëtë tä onën jëënjoty, jam ma Tiosën yë ëxëëkja'aytyëjk ijxtëkoy ja'atyëkoy y'itë.

³E ja'ayëty mëti'ipë oy yë jyot wyinma'anyëtyën, akujk jotkujk nyäyjyawëtë; xoontakp jam yajpaatë Tios wintum, ets y'ätstë xyoonta'aktë mëët ja jotkujk'ajtën.

⁴Win'ëwtë miitsëty yë Tios, ëwtë yë ëy yä'äxy oyëtypë ets jëtu'un yë xyëëw mëjjawëtë, tukxoonta'aktë mëti'ipë jam tsajpjotm ijtpën tsënääpyën. Xoonta'aktë jam ma Wintsënën. Xoontä'äky yajpaatë ma yë'ëjën.

⁵Tios, mëti'ipë ijtpën ma tsyajptëjkën, yë'ë nyiteety'äjtyp yë ku'ooky u'unk ets yë'ë näjyëtu'un pyutëjk pyupejtyp yë ku'ookytyo'oxy.

⁶Tios yë'ë myoopy yë jyëën tyëjk mëti'ipë atu'uk yajpatpën ets mëti'ipë winwa'atstuuy juukyajtpën, yajpëtsëëmpy yë tsumjyä'äy pujxn tëkoty ets tyajjotkujkë ma jyuuky'ajtënën; Ja ja'ayëty mëti'ipë käjpxykyumëmëtoownajxtëpën jam nëjkx tsyëënëtë ma ka'ap tii y'ity wyintëyën.

⁷Mijts Tios, ko ojts xywyoowtsoony ja mnaax mkajpn ets ojts xywyoownëjkxy të'ëts'itjotm,

⁸ojts yë naaxwiinyëtë yu'kxy ets ojts yë mëk komtuu kyëtä'äky naaxkëjxy mëti'ipë tsajpwinm tso'onpën, yë Sinaí kopk näjyëtu'un jyänty yu'kxtäky Tios wyintuuy, ma ja Israel ja'ay Tyiosëtyën.

⁹Mijts Tios, tëë xyajtu'uy xyajpojy mëj këjää, ets të xyajxooky ja naaxwiinyëtë ma ënäty tsyë'ëtsëtyën ets jëtu'un jatëkok y'ajämë.

¹⁰Jam ojts yë mnaax mkajpn tsyëënaaytyaknpëky, e mijts Tios, mëët ko xymyëët'aty yë oyjyot oywyinma'any, tëë xyajkay xyaj'uuky ja ëyoopëja'ay.

¹¹Ojts yë Tios tu'uk yë ayuk tkäjpxy, ets kanaak ojts yë to'oxytyëjktëjk y'itë mëti'ipë kyajpxnajxtën:

¹²Tam kyä'äktë ja yajkutujkpëtëjk mëët ja tsyiptuunpëtëjkëty. Jam tëjkwintum, yë to'oxytyëjkëty yë'ë jam pyëjkwa'kxtëp mëti'ipë ja mëtsiptëjk të yajtukniwojptu'utën,

¹³e mijts ojts myajyu'utsy. Jëtu'un ojts mkëxë'ëky tä tu'uk yë pakën mëti'ipë kyäkn këxë'kpën poop pujxn nikoypyën. Ets ja jyëmk yaj'ixy pu'ts pujxn nikuutsypyën.

¹⁴Ko ja mëti'ipë maaytyääyëpën winë tyajkäktaay ja yajkutujkpëtëjk, tëë ënäty tip yajxon kyä'äy ma Salmón kopkën.

¹⁵Këjxmëty yë kopk kyëxë'ëktë jam Basán itjotm, këjxmëty yajxon ma jam kyëpetyën.

¹⁶Miitsëty jënu'un jam mnaxtën mtëkëtën tunkëjxm kopkëjxm, ¿wi'ix ko ëxëëk xy'ixtë ja kopk ma ja Tios tsyëënëja'anyën? Yë Wintsën xëmëkyëjxm jam y'ita'any.

¹⁷Yë Tios may yë kepy wintëkäämpë tmëëtëty mëti'ipë myëtsiptuunpyën; ko jam Sinaí tsyo'ony kepy wintëkäämpë akujky ojts myiny ma tsyajptëjkën.

¹⁸Mijts Tios, janty këjxm ojts mpety ets xyajnëjkxy ja mtsumjyä'äy; ojts ja'ay winë mmo'oyë, yë'ëpaat ja'ay mëti'ipë käjpxy kumëtoownajxtëpën ojts mwinkoxtänëty, Wintsën.

¹⁹Mëjjaw kënu'kxyjyawë y'ity yë Wintsën, mëti'ipë nTios'ajtëmën, mëti'ipë xyajnitsokëmën, mëti'ipë winjëpom myënëjkxypyën yë ntsëmy'ajt nkë'ëy'ajtëmë.

²⁰Yë Tios, mëti'ipë nTios'ajtëmën yajnitsokp yë'ë, ets yë'ë mëti'ipë xyjyu'tmëpën o'këntuuy.

²¹Tios jëtu'unyë tkë'tswa'kxa'any yë kyëpajk yë myëtsip, ja kyëpajk mëti'ipë ni'ikyë pokytyuun'ëtëtstëpën.

²²Jëtu'un yë Wintsën të y'ënä'äny: Nyajtsoonäämpy jam Basán; njuutäämpy jam ma ëxëëk mjaty mkëpetyën,

²³ets xy'atään xytyuktäänëty yë mmëtsip yë nye'pyny, ets m'uk twe'eymyukëty.

²⁴Tios, mëti'ipës nTios'ajtypyën, ets mëti'ipës nkutujkpë'ajtypyën, ma mtsajptëjkën xëmë tajnax y'ity ko mijts myajmëjjawë.

²⁵Mëti'ipë ëëwtëpën jëyëjp nyëjkxtë, e mëti'ipë xuxtëpën koowtëpën ix'am ye'eytyë, itkujky yë'ë nëjkxtëp yë to'oxy'ëna'këty mëti'ipë yaj'ënantëpën yë xijtn.

²⁶Tëkokyë miitsëty mëjjawëtë yë Tios, mëti'ipë Wintsën'ajtpën. Tëkokyë miitsëty Israel ja'ayëty jënu'un të mniye'eypyätën.

²⁷Wintuuytsyow yë'ë nëjkxp yë Benjamín, ja tim mutskpë, ja kutëëm mëët kanaak ja yajkutujkpëtëjk mëti'ipë Judá ja'ayën, ma Zabulón ja'ayën, ets ma Neftalí ja'ayën.

²⁸Tios, mëti'ipës nTios'ajtypyën yaj'ixëty yë mëj'ajtën; kajpxkëxë'ëk jatëkok mëti'ipë të xytyunyën ma ëëtsëtyën.

²⁹Jam këjxm tsyo'ontä'äky ma ja mtsajptëjkën jam Jerusalén, ma ja yajkutujkpëtëjk tyajmintën ja mnänyamo'ojë,

³⁰oj yë Egiptë ja'ayëty, mëti'ipë ja'ay'ajtëpën tä mëj jëyujkën aayjoty ujtsjotypë, tä tsajpkaa yä'äyën inpë, mëti'ipë näjya'awëyëpën tsajpkaa ëna'kën, mëti'ipë yi'iyë myëmääpy myëtäjpyën wi'ix ja wit meeny may'äämpy tpaatëty oy ja naax kajpn ëxëëk tyajjatëty; oy ja naax kajpn tsyiptun tsyippaatëty.

³¹Jap Egiptë tsyoona'antë yë ja'ayëty mëti'ipë këjxmëty yë kutujkën myëët'ajtëpën; yë Etiopíë ja'ayëty nëjkxëp t'ëwtatë yë Tios.

³²Kuuy'ëwtë yë Tios tëkokyë miitsëty jënu'un m'ënä'ämtën myajkutuktën naaxwiiny naaxkëjxy, ëwtë ya'axtë yë y'iy yä'äxy yë Wintsën,

³³mëti'ipë jam ënyääpyën tsajpjotm mëti'ipë kë'ëyxyëëw kë'ëyjyëmëjt ijtpën. Mëtoow'itë wi'ix yë y'aaw y'ayuk yajmëtoyën, yë y'aaw y'ayuk mëti'ipë mëj'ajtën mëëtën.

³⁴Mëjpëjkta'aktë yë Tios yë myëk'ajtën; yë myëj'ajtën yë'ë yajwintujktääpy tëkokyë yë Israel kajpn, ets myëk'ajtën pyätyp yë tsuxk tsajp.

³⁵Janty oytyukxootaknë yë Tios jap yajpaaty ma tsyajptëjkën; yë Tios mëti'ipë Israel Tyios'ajtypyën, yë nyaax kyajpn yë'ë myëkmoopy myëjaawmoopy. Paaty yë Tios kënu'kxy mëjjawë mëpaat y'ity.