Read Biblia Mixe de Quetzaltepec Salmo 69 Bible Online

Salmo 69 - Biblia Mixe de Quetzaltepec bible

Salmo 69

¹Yajtsokës, Tios, mëti'ipës nTios'ajtypyën, mëpaatëpës nji'kxnë ets nnëë'o'knë;

²tsyapës nkënajxnë këk mo'ontsjoty, ets ka'ap ma t'ëkjëkyäjpnë maas nwa'kta'atsëty. Tëës nkiinë këkmejyjoty, ets nëëkap yë'ëjës xytsyëëmnëjkxnëp ma nëë mëk pyëyi'ikyën.

³Tëës yë nyo'kn nyatimtsyëtsnë koos nyä'äxy njoky; jajnëp tooynyëpës yë nyaxn; ets nwiinës tëë nya'ënu'kxënë koos njajantyjyëjp'ixy yë Tios.

⁴Nimay yë ja'ayëty mëti'ipës nanëkoo xy'ëxëëk ijxtëpën, këtiinëm jyëtu'unëty yë nkuwaayës; yajxon të nyimayëtë yë nmëtsiptëjkës, nanëkokyëjxmës ëxëëk xytyuntë xy'ënëëmëtë, etsës xytyukmatstë nyajwinpitëty mëti'ipës ka'ap të nmeetsyën.

⁵E mijts Tios, mëti'ipës nTios'ajtypyën, wa'ats xynyijawë ko nëkoos nitsuu nipoj tii ntuny; yë npokyës ka'ap tjëkyepy ntukwinkuyu'utsëty.

⁶Wintsën, mëti'ipë maaytyääyëpën winë, Ka'ap mëpaat tsyëyu'unpaatë yë ja'ayëty mëti'ipë mijts mtuk'ijxpäjtëpën, mëët ëjtskyëjxm yë npoky. Tios, mëti'ipë yë Israel ja'ay Tyios'ajtypyën, tëkokyë mëti'ipë m'ixtaayëpën ets myajmëyajtëpën jëtu'un tä yë ja'ay nyëëtëëtsën, ka'ap mëpaat jëtu'unyë kyumon kyutukëtë mëët ëjts kyëjxm yë npoky.

⁷Mëët mijtskyëjxm tëës nmënaxy nyajnaxy yë näy'oj näyya'axë; tëës nyajpaaty wintsëtyu'un jëjptsëtyu'un;

⁸jëtu'unës të nyajpëjktä'äky maas yë njëëky nmëku'ukën tä tu'uk yë jaaypyaat jaaypyo'kxyën mëti'ipë ka'ap pën y'ixy'ätyën.

⁹Mëët yë'ë koos niku'ëwa'an'aty yë mtsajptëjk, wiinkës nnäjyawëty ko pën ëxëëkjaty tnikäjpxy tnimëtyä'äky, janty ëjtsës ntimjya'ap xytyimpatp ko pën ëxaty y'ënä'äny.

¹⁰Koos një'ëy nyä'äxy ets koos ka'ap nkay n'uuky, je'eyës xynyëxi'ik xytyukxi'iktë;

¹¹e koos ënät nnäxyoxyë mon tuk etsës ntuktëkë yë wit mëti'ipë kuump u'kxpën, je'eyës nyajnëxi'iky nyajtukxi'iky.

¹²Aak ëjts yë ja'ay xy'ëëwpat xykyajpxpatp oymyaajëty, ets ëmu'ukyë ja'ay tëës xyaj'ëypyëtsëëmnëtë.

¹³E ëjts, Wintsën, mijtsyë nmëyäxy nmëjojkpy, Tios, mëti'ipës nTios'ajtypyën, putëjkëkës. Mëët yë mëjpë m'oyjot m'oywyinma'any, ëtsoowkës. Mëët yë mputëjkën xëmëpë y'ityën, yajtsokës.

¹⁴Këtiis xy'ëxmatsëty ëyo'ontum. Mijtsës xyajtso'okëp ma ja'ayëtyën mëti'ipës xy'ëxëëk'ijxtëpën, etsës xyjyëwow xyjyëwitsëty ma ja monyë tukyën.

¹⁵Këtii xyajkutukëty etsës yë nëëkom xymyënëjkxëty. Këtii xyajkutukëty etsës nja'tëty jap ma nëëxujtykyën etsës jëtu'unyë xyajnikoompätëty.

¹⁶Wintsën, ëtsoowinpijtkës; mijts janty'oy mTios'aty ets mëj këjää yë tsojkën ja'awën xymyëët'aty. Mëët yë janty yu'unkpë yë mjot mwinma'any ni''ijxkëtakës;

¹⁷këtii xy'ixtijëty ya'atë m'ëyoopë mmëtuunpë. Ëtsoowinpijtkës tsojkyë, jä'ä ko ëjts o'kën jëjp'amës nyajpaaty.

¹⁸Mëwinkoonkës ets yajtsokës; ju'tkës maas yë nmëtsip yë kyë'ë y'aawën.

¹⁹Mijts Wintsën wa'ats xynyijawë wi'ixës ëxëëk nyajtuny nyaj'ënëëmën, wi'ixës ja tsëtyu'un nmënaxy nyajnaxyën ets wi'ixës ka'ap pën xymyëj'ixyën; mnija'ap pënjatyës xymyëtsip'ajtëpën.

²⁰Koos nyaj'ojy nyajyä'äxy, jëtu'unës nnäjyawëty tim tsëtyujtp yowë njuukyjotës ets tim këjxp yowë njot nmëjaawës; Natëkës nëkoo të n'ixta'ay pënës jeexyë xyajjotkujktakpën ets xypya'ëyoopën.

²¹Maas yë n'uuky ntojkxën tëë jap t'apëkëtë mëti'ipë yaj'o'kpën, koos të ntëëtsë yë'ëjës të xytyuk'uuktë nëë mëti'ipë xunën ets ta'amën.

²²Wä'än jämyë nämyëtsiptsoonëtë aak yë'ëjëty, ma jam kyäytyën y'uuktën jënu'un oy nyäjyawëtën.

²³Mijts myajwiintsëtya'ajëp ets ko ye'eya'antëty je'eyë yë tyeky tsyëyuuypyëktëty.

²⁴Yajkëta'ak ma yë'ëjëtyën mijts yë mjoot'an; ets wä'än pyaatëtë mijts yë mtsip m'äkë.

²⁵Ma tsyëënëtën, wä'än jam tyajpaaty aanë'ëk tëëtsë'ëk, këtiipë jam pën tsyëënëty jyuuky'atëty ma jyëën tyëjkëtyën.

²⁶Jä'ä ko yë'ëjëty je'eyë t'ixjëtit tpajëtitë mëti'ipë mijts mon tuk të xypyëjktä'äkyën, ets të tnëxi'ik të tukxi'iktë ja pyëjkën y'ato'onënëty mëti'ipë të xyajtsëtyuty të xyajwintëkoyën.

²⁷Mijts näjyëtu'un ëxëëk myajjatëp ijxtëm yë'ëjëty yë jyiiky myëku'uk ëxëëk të tun t'ënëëmëtën; yë'ëjëty ka'ap pyaatëtë pokymyä'kxën.

²⁸Jo'tsëtë yë xyëëwëty mëti'ipë jap këxja'ay ijtpën ma ja nokyën juukyajtën mëëtpë, këtii jap xypyëjkta'akëty ma myinyën ja xyëëwëty ja wa'ats ja'aytyëjk.

²⁹E ëjts, maas npëkyë n'ixyën ets maas mon tuk nyajpaatyën, yajpëtë'kës, Tios mëti'ipës nTios'ajtypyën, yajtsokës.

³⁰Nmëjpëjkta'akäämpyës yë Tios yë xyëëw mëët yë ëy yä'äxy, ntukxoonta'akäämpyës mëët yë kukajpxën ja'awëkyëtakën,

³¹yë Wintsën wäänëni'ik yë jëtu'unpë oy tjawëja'any, këtiinëm tääjës jeexyë yë tsajpkaayä'äy ntukwintsë'ëkën ëkë ni'kx mëti'ipë wajmëëtën ets tekyxyookymyëëtën.

³²Ko jëtu'un t'ixtëty, tääts jotkujk nyäjyawëja'anëtë mëti'ipë ënäty mon tuk yajpatëpën, ets jyot wyinma'any oy tsuj tjawëja'antë mëti'ipë Tios y'ijxtaaytyëpën.

³³Tios myëtoopy yë y'aaw y'ayuk yë ëyoopëja'aytyëjk, ka'ap t'ixtijy yë y'u'unk myääy mëti'ipë tsumy matsy ijtpën.

³⁴Mëjjawë jaantyjawë yë Tios y'itëty jam tsajpjotm, naaxkëjxy ets nëëjoty, ets maajaty yajpaatyën yë juukyajtën.

³⁵Tios yë'ë yajtso'okäämpy yë Sión kajpn ets tkoj'oyëja'any jatëkok yë nyaax kyajpn yë Judá. Yë y'u'unk y'ëna'k yë tyuunpëtëjk, yë'ë tyukumayäämpy yë naax kajpn; jam tsyëënëtëty jyuuky'atëty ets yë'ë jam winë jyä'ä'atëp; tëkokyë jënu'un tmëjjawëtën yë xyëëw, yë'ë nëjkx jam y'itë tsyëënëtë.