Read Biblia Mixe de Quetzaltepec Salmo 71 Bible Online

Salmo 71 - Biblia Mixe de Quetzaltepec bible

Salmo 71

¹Wintsën, jam ma mijtsën jamës n'ixta'ay yë kuwa'anën; ka'ap mëpaat nijëna'a tsëtyu'unmëët nwë'ëmyës maas ja nmëtsiptëjkën.

²Yaj'ëwaatsëpëtsëëmkës ets yajtsokës; jä'ä ko mijts wa'ats mTios'aty. Tun yë mëyajtën, mëtoowkës yë n'aaw n'ayuk ets yajnitsokës.

³Mijts jëtu'un mnax tä yë mëjtsaakopkën mëti'ipës xykyuwaanpën, mijts jëtu'un mnax tä tu'uk yë mëjpotsyën mëti'ipë tsoktaknën. Mijts jëtu'un tä tu'uk yë mëjtsaakopkën ets tä tu'uk yë mëjpotsyën mëti'ipës xykyuwaanpën.

⁴Tios, mëti'ipës nTios'ajtypyën, yajpëtsëëmkës ma kyë'ë y'aawën yë ëxëëk ja'ay, ma kyë'ë y'aawën yë yaja'ay'o'kpë ets mëti'ipë tsiptuump tsip kajpxpën.

⁵Wintsën, jëtu'unyëm mijts ntuk'ijxpety koos nmëxu'unk'ajty ets tyampaat maas të nmëj ja'ayënën, mijts n'a'ijxyp njëjp'ijxyp ets mijts näjyëtu'un ntukjotkujk'ajtyp.

⁶Tapnëmës ënäty nyajpaaty ntaakës jyootjoty ko mijts ntukjotkujk'aty. Mijtsës ojts xyajminy naaxwiiny paaty mijts xëmë nmëjpëjkta'aka'any.

⁷Janty mëj'ixyës yë ja'ay muum xyjyawë, e jam ma mijtsën Wintsën jamës yë tsoktakn npaaty.

⁸Jëtu'unës yë xëëw nyajnaxy, yë mmëjajtën m'oyajtën yë'ëjës nmëjpëjktäkpy;

⁹këtiis xy'ëxëëkjawëty koos ënäty tëë nmëjja'ayënë; këtiis xy'ëxmats xymyajtstu'utëty koos ënäty ka'ap yë jot mëjaaw n'ëkmëët'ajnë.

¹⁰Yë nmëtsiptëjkës mëti'ipës xyaj'ookan xyajtëkoyantëpën, aakyë'ë të nyäpyëk të nyämyatsëtë ets të nipëjktaakëtë wi'ixës xyaj'ooka'antën.

¹¹Tyaa y'ëna'antë: Ixta'atë ets xymyatstëty, yë Tyios mëti'ipë y'ëwtajtypyën tëë jyä'äytyëkooyënë, paaty tyam ka'ap t'ëkmëët'ajnë pën yajtso'okëtëp.

¹²Tios, mëti'ipës nTios'ajtypyën, këtiis xymyëjëkämke'eky; nimiinkës tim tsojkyë ets putëjkëkës.

¹³Wä'än twë'ëmtë tsëtyu'unmëët ets wä'än tkutëkooytya'atë mëti'ipë myëtsip'ajtëpën yë njuukyajtënës. Wä'än yë'ëjëty nëxi'iky tukxi'iky twë'ëmtë mëti'ipë tsyojktëpën ets jeexyë ëxëëk njaty nkëpetyës.

¹⁴E ëjts, mijts xëmë n'a'ixäämpy njëjp'ixäämpy, ets ni'ikyë mijts nmëjpëjkta'aka'any;

¹⁵jëtu'unës nyajnaxa'any yë xëëw jëmëjt, nikajpxa'any nnimëtya'aka'anyës koos mijts të xyajtso'oky ets koos të xynyipaye'ey ijxtëm tyim'ixë'atyën. E tëkokyë ya'atë mëti'ipë të xytyuny të xykyäjpxyën, ka'apës yajxon nja'akyukë wi'ix ko jyëtu'unëty.

¹⁶Nimëtya'akäämpyës wi'ix winë mëj këjää të xytyunyën Wintsën, ntukyaaxëjäämpy ntukjojkëjäämpyës ko mijts aak'oy ets aak mëtëy winë xytyuny.

¹⁷Tios, mëti'ipës nTios'ajtypyën, mijtsës të xytyukni''ixë winë koos të n'ëna'k'aty, e tyam je'eyëmës ka'ap ntuk'ëmony wi'ix winë të xyajkojy të xypyëjktä'äkyën.

¹⁸Tios, mëti'ipës nTios'ajtypyën, këtiis xy'ëxmats xymyajtstu'utëty oyës ënäty të nmëjja'ayënë etsës të nkupo'ojënyë, jä'ä ko ëjts njaaknimëtya'akäämpyës yë mmëjajtën ma ja'ayëtyën tyampë jyuuky'atën ets mëti'ipë juuky'atantëpnëm.

¹⁹Yë mëtëypyë mnipaye'eyën, mijts Tios, jajtp jam tsajpwinm; mëjwiin këjää winë të xytyuny, kamaa jëtu'unpë tios tä mijtsën.

²⁰Oyës të xy'ëktuk'ixy yë ëyo'on jotmay etsës të një'ëy të nyä'äxy, nija'apës wa'ats koos jatëkok xyajjuuky'ata'any, ets koos jatëkok jap xyajpëtsëma'any ëyoowtaknjoty maas ënäty jap ëxëëk njatyën nkëpetyën.

²¹Mijts myajmëjëjäämpy yë njotkujk'ajtënës etsës jatëkok akujk jotkujk nyajpaatëty.

²²E ëjts, mëti'ipës xypyatpën, n'ëwäämpyës yë ëy ets nmëjpëjkta'aka'anyës ko winë oy xytyuny, nyaj'ëna'anäämpyës yë xijn ets kow, Tios, mëti'ipës nTios'ajtypyën, Wa'atspë mëti'ipë yë Israel ja'ay y'ëwtajtëpën.

²³Jotkujkës näjyawëja'anyë ko ënäty mijts nwin'ëy nwinyä'äxy, ets näjyëtu'un tëkokyë yë njot nini'kxës, mëti'ipë mijts të xyajtso'okyën.

²⁴Näyjyëtu'unës xëmë nikajpxa'any ko jëtu'un winë xynyipaye'ey ijxtëm pyaat'atyën, jä'ä ko mëti'ipë ënäty tsyojkën'ajtëpën etsës ëxëëk njatëty nkëpätëty, yë'ë të y'ëkwë'ëmtaaynyëtë tsëtyu'unmëët.