Read Biblia Mixe de Quetzaltepec Salmo 72 Bible Online

Salmo 72 - Biblia Mixe de Quetzaltepec bible

Salmo 72

¹Mijts Tios, mo'o yë myajkutujkpë ja winma'any ets tii mëtëy tnipaye'eyëty ets tëyajtën winë tunëty mëti'ipë mijts mjä'ä'ajtypyën,

²jëtu'un mëtëy ja naax kajpn t'ënä'ämëty ets oy tii tnipaye'eyëty ma ëyoopëja'aytyëjkën.

³Tuk'ixëty ja naax kajpn ja jotkujk'ajtën ets oy yajpaatëty.

⁴Nyipaye'eyëp ja ëyoopëja'aytyëjk, ets tmo'ojëty ja jotkujk'ajtën ja y'u'unk y'ëna'k ets tukumëtowëty ja ja'ay ja nyëë pyoky mëti'ipë ja myëku'uk tyiytyuunpyën ets wyojpy kyä'tsypyën.

⁵Xëmë ja yajkutujkpë mwinkutsë'ëkëtëty maanëm jyaakjää'atënëm ja xëëw po'o.

⁶Jëtu'un nyaxëty tä tuunikën ëkë tä maanikën mëti'ipë jopyëp yajxo'kojpyën yë naaxwiinyëtë ets aay ujts.

⁷Mapaat y'ëne'emyën ets yajkutukyën, wä'än tmëjë tkëjääjë yë akujkajtën jotkujk'ajtën ets tëyajtën, ijxtë koonëm yë po'o y'atëkoyëty.

⁸Wä'än yë'ë t'ënä'ämta'ay yë naaxwiinyëtë ja'ay mapaat yë mëjnëëmejy nyäxyën ets mapaat jyä'tyën, tsyo'onta'akëty jam ma Éufrates mëjnëëjën ets jampaat ma naaxwiinyëtë jyëjpkëxyën.

⁹Wä'än yë myëtsiptëjk Näkyë'ëyakëtë ma yë'ëjën, tëkokyë jënu'un jam y'itën tsyëënëtën të'ëts'itum.

¹⁰Wä'än myëmi'inxëty yë ayajk ako'onën ets näynyamo'ojë yë yajkutujkpëtëjk mëti'ipë tso'ontëpën jam Tarsis ets ma naaxwiinyëtë y'ityën kuwitsë nëëjoty, ets näjyëtu'un yë yajkutujkpëtëjk mëti'ipë jam ijtëpën Sabá ets Seba.

¹¹Wä'än tëkokyë yë ënä'ämpëtëjk tkoxtänëtë ma yë'ëjën. Ets wä'än tëkokyë yë naax kajpn jam myëtuntë kyupëktë ma yë'ëjën.

¹²Jä'ä ko yë'ë ëyoopëja'ay pyutëkëjäämpy mëti'ipë mëpëjktsoowëpën, ets ja'ay mëti'ipë winë kakajtxëyëpën, ets mëti'ipë ka'ap pën pyutëk pyupetyën.

¹³Pya'ëyowäämpy tëkokyë mëti'ipë yaj'ëyow yaj'ama'at ja'ay'ajtëpën, ets yë'ë yajtso'okanëp yë jyuukyajtën mëti'ipë ëyoow jotëkooytyëpën.

¹⁴Yajpëtsëmäämpy jam ma ënäty ëxëëk yajtun yaj'ënëëmëtën ets ma ënäty ka'ap jyotkujk'atën, jä'ä ko jyuuky'ajtënëty këjää tsyowpaaty.

¹⁵Juuky'ajtp yë yajkutujkpë. Wä'än tyajmo'oy yë pu'ts pujxn mëti'ipë tso'onpën Sabá. Wä'än xëmë tyajninu'kxtä'äky ma Tiosën. Kënu'kxy y'itëty xëmëkyëjxm.

¹⁶Wä'än may'äämpy tyajpaaty yë tsajpmok ma naax kajpnën, ets wä'än jam tmayë tunkëjxm kopkëjxm. Wä'än yë tsajpmokpajk tyajpëky may'äämpy tä jamën Líbano, ets wä'än yë tyëëmpt jëtu'un tyäky tä yë aay ujts myäykyëxë'ëkyën kamjotm tu'ujotm.

¹⁷Wä'än yë yajkutujkpë yë xyëëw xëmëkyëjxm t'ity; wä'än jëtu'un tjeky yë myëj'ajtën ets xyoontakën tä xëëwën. Wä'än kanaak yë naax kajpn t'itë kënu'kxy mëët yë'ëkyëjxm. Wä'än tëkokyë yë naax kajpn yajnimëtya'aktë akujk jotkujk.

¹⁸Kënu'kxy mëjjawë yë Tios y'ity, yë Wintsën, mëti'ipë yë Israel ja'ay Tyios'ajtypyën, yë tu'ukyëpë mëti'ipë mëj këjää winë tyuunpyën;

¹⁹kënu'kxy mëjjawë xëmë y'itëty yë myëjxëëw. Wä'än yë naaxwiinyëtë tyajpaaty mëët yë myëj'ajtën y'oyajtën. Ets jëtu'un tyunëtëty jyatëtëty.

²⁰Yaa jëtu'un jyëjpkukëxë yë tsajpkäjpxy, mëti'ipë yë David kyajpxën, Jesé myaank.