Read Biblia Mixe de Quetzaltepec Salmo 73 Bible Online

Salmo 73 - Biblia Mixe de Quetzaltepec bible

Salmo 73

¹Janty oy yë Tios Tyios'aty ma Israel ja'ayëtyën, mëti'ipë wa'ats yë jyot wyinma'anyëtyën.

²Jawäänës ëxëëk të nkajaty, yë nkë'ë ntekyës jëtu'unës ënäty nja'awënë tëë yowë tyim'ënu'kxënë ets mëpaatëpës ntä'änjëxëjxnë.

³Jä'ä ko ëxëëkës të nmëtsip'aty yë ëxëëkja'aytyëjk mëti'ipë winë pyatëp y'ijxtëpën, mëti'ipë amëj akëjxm ja'ay'ajtëpën.

⁴Yë'ëjëty ka'ap tmëmay tmëtajtë yë o'kën, jä'ä ko aak'oy aak mëkëty jyä'äy'atë;

⁵yë'ëjëty ka'ap nitii pëjkën ato'onën tmënax tyajnaxtë ets ka'ap nijëna'a yaj'ixtë yuu mëët pa'am mëët ijxtëm yë wiinkëtypë jyatën kyëpätën.

⁶Paaty yë'ëjëty jëtu'un oy yaj'ixtë ko nyämyëjaw nyäjyääntyjyawëtë ets ja tsiptu'unk, jä'ä jya'awëtyëp tä wit xoxën;

⁷je'eyë janty ni'kxëty kyëxë'knëtë, mëpaatëp wyiintsaa pyëtsëëmnëtë; kanaak yajxon mëti'ipë ëxëëk myëmaay myëët'ajtëpën.

⁸Mëët yë nëxikën tukxikën, nämyëjja'aw näjyääntyjya'awën ets kanäwyinkutsë'ëkë, yë'ë mëët t'ëtsu'uxya'axtë yë myëku'ukëty ets tsip käjpxy je'eyë t'ixta'atë;

⁹y'ëtsu'uxyaxtëp yë tsajp mëët yë y'aaw y'ayukëty, y'ëtsu'uxyaxtëp yë naaxwiinyëtë mëët yë y'aaw yä'änëty.

¹⁰Paaty yë ja'ay y'oyjyawëtë ets ka'ap nitii poky yajtuknipëktë.

¹¹Tääts kë'ëm nyäyajtëwëtë: Wä'än jëtää Tios t'ëknijawëtyë?, Ëk wä'än jëtää tnijawëty yë Ni'ik Këjxmëpë?

¹²Ixtë ya'atë ëxëëk ja'ayëty. Akujk jotkujk yë wyit myeenyëty tyajmëj tyajmayëtë.

¹³Nëkoopës natëkë njot nwinma'any nmëët'ajtpëty janty wa'ats ets janty nitii pokyës nka'ëktuunëty.

¹⁴Jä'ä ko janty janaam jatsojkës nyajkoxy nyajtsiiky, ets jopy jopyës xëmë nyajtëytyuny.

¹⁵Koos jeexyë ëjts jëtu'un yë nwinma'any n'ëkmëëtëty tä yë'ëjëtyën, jëna'ajëpës jeexyë yë m'u'unk m'ëna'k të njakë'ëyajktaaynyëtë ëxëëktum.

¹⁶Tëës ya'atë yajxon njaja'akyukëja'any e ni kä'äpyëmës të nja'akyukë jä'ä ko tsip oy.

¹⁷Jäänëmës të nja'akyukë koos të ntëkë ma Tios yë tsyajptëjkën, ko yë'ëjëty ëxëëk të jyat të kyëpätë:

¹⁸jam të xykyuwow të xykyuwitsë ma ëxëëk jyatëty kyëpätëtyën, ets jam ja ëyo'on tmënax tyajnaxtëty.

¹⁹Tsojkyë nëjkx kyutëkoytyë. Yë tsë'ëkë yë'ë nëjkx yajkëxëtë.

²⁰Ko ënäty mijts mpëtë'ëky, Wintsën, jëtu'un tä ja'ay myä'äypyëti'ikyën, ënät nëjkx ka'ap ninu'un xy'ixa'any tääpë ja'ayëty mëti'ipë tëkatsy ja jyot wyinma'anyëtyën.

²¹Tëës nyajpaaty jë'ë ya'ax, ets njot nwinma'anyës janty pëjkp janty atoonpës të njawë,

²²jä'ä ko juunës yë njot nwinma'any të npëjktä'äky, ka'apës të nkäjpxyjyä'äkyukë: jëtu'unës ënäty të nnäpyëjktä'äkyë mijts mwintum tä tu'uk yë jëyujkën.

²³E ëjts ka'ap mijts të ntimy'ëxmatsy tu'ukyë, xëmë të nmëjwa'kpety. Ojtsës mijts xymyätsy mëët yë m'a'oykyë'ë,

²⁴tëës mijts xytyu'uwinye'ey mëët yë m'ëëwij mkajpxwijën, e ko ja xëëw jëmëjt tpaatëty mijtsës xy'ëxajëjaanp mëët yë xoontakën.

²⁵¿Pën jam tsajpjotm nmëët'ajtypyës? Mijtsyë tu'ukyë. Ko ëjts nyajpaaty mëët mijts, nitiijës yaa naaxkëjxy nkatsojkën'aty.

²⁶Tëkokyës yë njot nwinma'any jëtu'unyë tyëkooytyä'äy, e ëjts Tiosës nkuma'ayën'ajtyp xëmëkyëjxm ets mëti'ipë myajts'ijtypyën yë njot nwinma'anyës.

²⁷Mëti'ipë mijts mëjëkämkäkëpën, kopkpëky ko nëjkx y'ooktë; myajkutëkoyäämpy yë ja'ay mëti'ipë ka'ap oy mmëmëtoyën.

²⁸E ëjts ni'ikyës yë Tios nmëwinkona'any, jä'ä ko maas ëjtsën, yë'ë tu'uk n'oyjya'apës. Mijts, Wintsën, mijts ntsoktakn'ajtyp, e ëjts kopkpëkyës koos nnikäjpxy mëti'ipë të xytyuny të xykyäjpxyën.