Read Biblia Mixe de Quetzaltepec Salmo 74 Bible Online

Salmo 74 - Biblia Mixe de Quetzaltepec bible

Salmo 74

¹Tios, ¿wi'ix koos xëmëkyëjxm xy'ëxmats xymyajtstu'utë? ¿Wi'ix ko nëkooyë të xytyimtukjoot'anpëky yë m'u'unk m'ëna'k mëti'ipë jëtu'un mmëët'ajtypyën tä yë kupixyny ëna'k myäytyänëtën mëëykyijxy ujtskëjxy?

²Ja'amyäts yë mnaax mkajpn mëti'ipë ojts xypyäätyën ets xyjyä'äniwany; mëti'ipë ojts xyajpëtsëmyën ma ënäty ëxëëk jyätyën kyëpetyën ets mijts xyjyä'ä'ata'any. Ja'amyäts yë mtun mkopk mëti'ipë txëëwajtpën Sión, ma mijts ojts m'ity mtsëënën.

³Min ix wi'ix ya'atë naax kajpn xit ko'ow yajpaatyën ets ka'ap tii a'ijxën jëna'a jyëjpkëxy. Yë mëtsip yë'ë të tyajkutëkooytyä'äy winë mëti'ipë ënäty jap yajpatëpën tsajptëkoty.

⁴Yë mmëtsiptëjk janty jotkujk nyäyjyawëtë ma mtsajptëjkën ko myëta'aka'antë, ets jap të tpëjkta'aktë kajpn wintëy mëti'ipë wiink naax wiink kajpn yë ja'ay kyajpn wintëy'ajtëpën,

⁵ma ja nyi'akajën ja tëjkëtyakn. Jëtu'un yaj'ijxnëtë tä yë ja'ayëtyën mëti'ipë ja'axytyo'ktëpën, mëti'ipë yuukjoty ja'axy ixtaaytyëpën.

⁶Tëë tpujxtakta'atë mëti'ipë ënäty jap tsajptëkoty yajmëët'ajtpën kënu'kxy, mëti'ipë kepy mëët y'oytyunyëtyën.

⁷Tëë jap yë jëën tpëjkta'aktë tsajptëkoty; ka'ap nijënu'un yë winkutsë'kën të tmëët'atë ma mtsajptëjkën, tëë yajxon tim nyaaxkujijtëtya'atë.

⁸Jä'ä ojts tjatuknipëjktaakëtë ets jeexyë ëëtsëty tëkokyë xyajkutëkooytyääytyë, ojts tu'kë'ëyë tnino'kta'atë yë it naaxwiinyëtë mëti'ipë ënäty yë naax kajpn myëët'ajtypyën ma ja niye'eypyät y'ityën ets mijts myaj'ëwtaty.

⁹Ka'ap maa tii n'ëk'ijxnëtës ja mëti'ipë kënu'kxyën, ka'ap ma pën käjpxynyajxpënë mëti'ipë nyikajpxëpën tii ja Tios tyunäämpyën, ets ka'ap ëëtsëty nijawëtë mapaat jëtu'un y'ita'any.

¹⁰Mijts Tios, ¿Jëna'a jëtää ëëts yë nmëtsip ka'ap xy'ëkyajjoot'anpëjknëtëty? ¿Jëna'a jëtää ka'ap ëxëëk m'ëk tijënëty?

¹¹¿Wi'ix ko yë mkë'ë xyu'utsy xykyi'iy mëti'ipë mëk'ajtën mëëtën? ¿Wi'ix ko je'eyë mnäkyë'ëmëkijtënë?

¹²Ko pya'tkë'p'ajty ets tyampaat, mijts jëtu'un n'ënä'ämpë'ajtyp. Mijts Tios, ojts kanaak ok mmëtä'äky tsipjoty yaa naaxwiiny naaxkëjxy.

¹³Mijts ojts xyajnäwyä'kxyë yë mëjmejy mëët yë mmëjajtën, ojts xyajkë'tstëëwë yë kyëpajk yë mëjëtypë jëyujk nëëjotypë y'itën,

¹⁴ojts xynyaaxkutäänë yë kyëpajk yë mëj jëyujk mëti'ipë xyëëwajtypyën Leviatán, ets yë'ë ojts wyintsu'tsta'ayë yë jëyujk mëti'ipë jamën të'ëts'itjotm.

¹⁵Mijts ojts xyajkupëjy yë nëë wok ets mëjnëë, ojts näjyëtu'un yë nëë muum xyajtë'ëtsy ma ënäty ka'ap y'ëmaaytyä'äkyën.

¹⁶Mijts mjä'ä'ajtyp yë xëënyajtën, kootsajtën; mijts ojts xypyëjktä'äky yë xëëw, po'o;

¹⁷mijts ojts xy'a'ixë mapaat yë naaxwiinyëtë jya'tëty; ets mijts ojts näjyëtu'un xyajnäwyä'kxyë yë xëëw jëmëjt, jëna'a xyëkopk'atëty ets jëna'a pyotm'atëty.

¹⁸Mijts Wintsën mja'amyätsëp wi'ix yë mmëtsip myajjoot'anpëkyën ets wi'ix yë ja'ay winma'anytyukpë ëxëëk mnikäjpxy mnimëtyä'äkyën.

¹⁹Këtiis nëkooyë xyjyä'äytyëkoytyëty. Amaay amutskës nyajpaatë jëtu'un tä kuukën; këtiis xykyë'ëyaktëty ma jëyujkën mëti'ipë tsu'tspën.

²⁰Ja'amyäts yë mkäjpxytyu'unën mëti'ipë mtuunën mëët ëëtsëty, jä'ä ko yaa naaxjoty kajpnjoty aak tsip yowë xii yaa muum këxë'knëp ets aakjëtu'un oy tyimmaajëty.

²¹Këtii xyajkutukëty ets ja'ay ëxaty jyat kyëpätëty mëti'ipë ëxëëk yajtuunp yaj'ënëmääpyën; jä'ä ko yë ëyoopëja'ayëty ets yu'unkpë naxymyëpë jyuuky'atën nëjkxëp mëjpëjktä'äkyë.

²²Pëtë'ëk mijts, Tios, näkyukajpxët. Ja'amyäts ko yë ja'ayëty mëti'ipë winma'anytyukëtyën ka'ap pyo'kxtë ets wiinkjaty mtijyë.

²³Këtii xyjyä'äytyëkoyëty ko ya'axtë jyoktë mmëtsip, ets ka'ap mëpaat ni'ikyë y'o'ktëwtë ja'ayëty mëti'ipë käjpxy kyumëtoownajxtëpën.