Read Biblia Mixe de Quetzaltepec Salmo 76 Bible Online

Salmo 76 - Biblia Mixe de Quetzaltepec bible

Salmo 76

¹Yë Tios wa'ats yajnijawë jam Judá ets xyëëw mëj yajëkyepy jam Israel.

²Yë tsyajptëjk jam yajpaaty ma Sión kopkën, jam Jerusalén;

³jam ojts tuktëj tukwäxë yë ku'umën, ti'pxn, tëypyujxn ets ja akëëytyuk mëti'ipë ja'ay ijty myëtsiptuuntëpën.

⁴Mijts Tios, janty'oy janty tsuj mijts. Ni'ik mmëjëty këtiinëm jyëtu'unëty yë tun kopk mëti'ipë kë'ëyxyëëw kë'ëyjyëmëjt ijtpën.

⁵Yë ja'ayëty mëti'ipë ënäty näjya'awëtëpën jotmëk, ojts winë yajpëjkëtya'atë; mëti'ipë ënäty kumëjaawëtyën nitii ojts tka'ëktuunëtë. Ojts jyaak ma'a jyaak po'kxtë oy ets jääyë jëtu'un.

⁶Niwi'ixtsow tkajëkyepy yu'kxtëty yë kepy wintëkäämpë ets kwaay ko mijts Tios, mëti'ipë Jacob Tyiosajtën, xykyajpx'ëtsë'ëkë.

⁷Mijts mkutsë'ëkë oy. ¿Pën mëpaat m'ëk wiinkuwa'akëty ko mjoot'anpëky?

⁸Jam tsajpjotm jampaat xyajnikëxë'ëky wi'ix winë xynyipaye'eyën; yë naaxwiinyëtë tsë'këp ja'awëp yë'ë paaty tu'k'ityë y'ity.

⁹Mijts Tios, ko mpëtë'ëky ets xytyuna'any ja nipaye'eyën, ets xyaj'ëwaatsëpëtsëma'any tëkokyë, mëti'ipë ëxëëk yajtuun yaj'ënëmaaytyëpën yaa naaxwiiny naaxkëjxy.

¹⁰Ko yë naaxwiinyëtë ja'ay jyoot'anpëky, mijts ni'ikyë mxoontä'äky, oyxyëp janty tu'k nu'unën jyoot'anpëky, mijts jëtu'un xyjyawë tä jeexyë tu'uk yë kujän myajtukujenyën.

¹¹Tuntë yë waantakën ma Tiosën, mëti'ipë m'ëwtajtëpën, je'eyëp ko mkuuytyuntëp jëtu'un. Miitsëty, jënu'un xynyatänëtën mëti'ipë patëpën yajwinkutsë'ëkëty, yë'ë tukmëyoxtë winë.

¹²Yë'ë pyëjkëp yë jyuukyajtën mëti'ipë ënä'ämtëpën ets yajkutujktëpën, y'ëtsë'këp yë ënä'ämpëtëjk naaxwiinypë yajpaatën.