Read Biblia Mixe de Quetzaltepec Salmo 77 Bible Online

Salmo 77 - Biblia Mixe de Quetzaltepec bible

Salmo 77

¹Mëkës yë Tios nmëkäjpxy, ets tmëtowëty mëti'ipës nnikäjpxypën.

²Koos ëjts mon tuk nyajpaaty, yë Wintsën yë'ëjës pojën n'ixtääpy ets ninu'unës nkapo'kxy, nxajë'kpyës yë nkë'ë xëëny koots ets njanty Tyios mëkäjpxyës. Yë njot n'anëmës ninu'un kyajjotkujk'aty.

³Koos yë Tios nja'amyetsy, täätsës ntëkë yaxpë; ntëkës ënät määpyë tajpë etsës jëtu'unyë nkumon nkutukë.

⁴Wintsën, këtiis xy'ëxmatsëty etsës yë tsuu ma'ay xynyiminëty; janty ëtukyës yë njot nwinma'any yajpaaty, ni yë'ë tkajëkyepy wi'ixës nkajpxëty.

⁵Yi'iyës nmëmääpy nmëtäjpy yë xëëw jëmëjt mëti'ipë të nyäxyën;

⁶wa'atsës nja'amyetsy koos ijty n'ëy nyä'äxy koots. Maas yë njot nwinma'anyën nmay ntajyës etsës kë'ëm näyyajtëyë.

⁷¿Wä'än jëtää yë Wintsën xëmë äjkëp yajpaata'anyë? ¿Ka'ap jëtää nijëna'a jatëkok xy'oyjya'awëmëtyë?

⁸¿Tëë jëtää jäpaat kyixy nyäxy yë tsyojkën jya'awënë? ¿Tëë jëtää kyixy nyäxy ja wyaantakën xëmëkyëjxmë?

⁹¿Tii tëë jëtää Tios tja'atyëkooynyë yë y'oyjyot y'oywyinma'anyë? ¿Tëë jëtää yajxon tu'ukyë tyimjoot'anpëkyë ets ënät ka'ap ja pa'ëyo'owën t'ëkmëët'ajnë?

¹⁰Mëti'ipës ëjts ni'ik nmëkja'apën yë'ë ko ni'ik këjxmëpë ka'ap tyam jëtu'un xy'ëkja'awëmënë tää ijty tëëyëpën.

¹¹Tyam je'eyës njaakja'amyätsa'any wi'ix ojts yë Wintsën winë mëj këjää tunyën tkäjpxyën;

¹²yë'ëjës nmëmayäämpy nmëtajäämpy mëti'ipë të tyajkojy të tpëjktä'äkyën.

¹³Mijts Tios, aak'oy winë xytyuny xykyäjpxy; ¿mëti'ipë tios jëtu'un jaakmëj tä mijtsën?

¹⁴Mijts Tios, mëj këjää winë xytyuny. Ojts xyajnikëxë'ëky mmëjajtën ma naax kajpnën.

¹⁵Mëët yë mmëkajtën ojts xyjyuuty yë mnaax mkajpn jam o'kënjëjp'am, yë y'u'unk y'ëna'k yë Jacob ets José.

¹⁶Mijts Tios, ko yë mëjnëëmejy jëtu'un m'ijxë, tääts ojts tsyë'ëkë ets ojts tsyëtyuuypyëjkta'atë yë nëëmejy këkëtypë yajpaatën;

¹⁷yë yoots nëëma'a ojts tnajtsmatsëtë yë nyëë tyuu, ets y'ënaantäky yë ënääw jam tsajpjotm ets wëtsuk xii yaa muum y'ëtëtstë y'ënantë.

¹⁸Yajmëtoop ja m'ënääw ma pojxujtykyën; ets ja wëtsuk tyukjajëtyääpy ja naaxwiinyëtë, ënät ja naaxwiinyëtë të tyëkëtë yu'kxpë mëët ja ujx.

¹⁹Ojts yë mnajxtakn xyajni'ëwaatsë mëjnëëjoty; ojts xytyuknaxy kanaak yë nëëmejy, e ni pën të tkapaaty ja mtu'u'ateeny.

²⁰Jëtu'un yë mnaax mkajpn të xywyinye'ey tä yë ja'ay twinye'eyën yë kyupixyny, mëët yë Moisés ets Aarón.