Read Biblia Mixe de Quetzaltepec Salmo 81 Bible Online

Salmo 81 - Biblia Mixe de Quetzaltepec bible

Salmo 81

¹Kuuy'ëwtë mëët yë jotkujk'ajtën yë Tios, jä'ä ko yë'ë tu'ukyë ntukjotkujk'ajtëm. Tukxoonta'aktë yë Tios mëët yë yaxën jojkën ets xoontakën mëti'ipë Jacob Tyiosajtën.

²Tukpakoxtë yë xijn yë m'ëyëty ets tukpa'ëna'antë yë kow.

³Myaj'ëna'antëp yë xuxn ko yë po'o myutsk'atëty, ets myaj'ëna'antëp näjyëtu'un ko tsyuukijpxëty, jä'ä ko jää ja nmëj xëëwajtëm nyäxy.

⁴Jä'ä ko ya'atë jëtu'un ënä'ämën'ajtp mëti'ipë ja Tios ojts tmo'oyën ja Israel kajpn, mëti'ipë Tyiosajtën yë Jacob;

⁵yë'ë ya'atë José ojts näjyëtu'un yajtuk'ëne'emy ko ja Tios tëytyuuny ja Egiptë kajpn. Tëës tu'uk yë aaw yo'kn nmëtoyës mëti'ipës ënäty ka'ap n'ixy'ätyën

⁶Tëë ntuknipëjktu'uty ja mtsëmy mkejkykyijxy, tëë nyajyu'unkëmë ja mtuunk ma ënäty mëk mtuny m'ëyoyën.

⁷Jam mijts të xymyëkäjpxyës ma ënäty ëxëëk mjaty mkëpetyën, e tëë nyajtso'oky; jap ojts n'ëtsoy jokjoty yootsjoty ma ja ënääw yä'äxy jyokyën; ojts näjyëtu'un nwinma'any'ixy wi'ix mja'ay'ätyën ma ja Meribá nëëjën.

⁸Mëtoow'itë ënät miitsëty mëti'ipës nnaax'ajtyp nkajpn'ajtypyën, mëti'ipë yam ntuk'ëwaanëjantëpën; jääpëkës jeexyë xy'ëkjantymyëmëtoy, mijts Israel ja'ay.

⁹Këtii xymyëët'atëty wiink tios mëti'ipë muum jëkäm ja'ay myëtso'ontëpën; këtii xy'ëwtatëty yë wiink tios ka'apë xy'ixy'ätyën.

¹⁰Ëjts jëtu'un Wintsën, mijts yë mTios, mëti'ipë ojts mjuutyën jap Egiptë; ëwë'ëk ets nyaj'itëty ku'uxyë.

¹¹E ja nnaax nkajpnës ka'apës ja n'aaw n'ayuk të xymyëtoow'ijtë: yë Israel ja'ay ka'apës të xymyëmëtoy.

¹²Paatyës të ntimy'ëxmatsy, wä'än t'ixtë tii tyuuntëp, ets jëtu'un të jyuuky'atë ijxtëm yë'ëjëty t'oyjyawëtën.

¹³Koos jeexyë yë nnaax nkajpn të xymyëmëtoy ets ko jeexyë Israel kajpn të tpanëjkxy yë nnë'ë ntu'ujës,

¹⁴tu'k ijxmi'kxyë jeexyë yë myëtsiptëjk të nyajkutëkoyës etsës jeexyë të ntëytyuunta'ay tëkokyë mëti'ipë mëtsip'ajtëpën.

¹⁵Mëti'ipë myëtsip'ajtëpën yë Tios, tsë'ëkë mëët jeexyë të wyë'ëmta'atë, ma të yajtëytyuntën, tsa'ay jeexyë të wyë'ëmtë.

¹⁶Tios yë'ë jeexyë nyaax kyajpn yajkääpy yaj'ukpy mëët yë tsajpmok, ets yë'ë jeexyë tyëëtsë tyukyajmoonëp yë uuxpa'ak.