Read Biblia Mixe de Quetzaltepec Salmo 82 Bible Online

Salmo 82 - Biblia Mixe de Quetzaltepec bible

Salmo 82

¹Tios yë'ë tyu'uwinwoopy ja käjpxy mëtyä'äky ma ja nätyu'ukmukë y'ityën jam tsajpjotm, ets tnipaye'eyä'äny tëkokyë winë wi'ixjaty pën të tyuny të kyäjpxyën:

²¿Jëna'apaat miitsëty aak tëkatsy winë xynyipaye'eya'antë, ets jä'ä mputëkäjantëp ja ja'ayëty ëxëëkpë winë tuntën tkajpxtën?

³Yë'ë nipaye'eytyë mëti'ipë mon tuk yajpatpën ets mëti'ipë ku'ooky u'unkën. Nipaye'eytyë yë'ë mëti'ipë ëyoop jotëkoopyën ets mëti'ipë winë kakajtxëyëpën.

⁴Mo'o yë nitsokën yë ja'ay mëti'ipë ëyoowtëp jotëkooytyëpën, ets mijts mniwaantu'utëp ko yë ëxëëkja'aytyëjk wi'ix tyuna'anëtëty.

⁵E miitsëty ka'ap xynyijawëtë ets nän ka'ap mja'akyukëtë, akootstuuy mijts myajpaatë. Yu'kxtëp mëti'ipë pya'tënaaytyëpën ja naaxwiinyëtë.

⁶Täätsës të n'ëna'any, ko miitsëty jëtu'un mja'ay'atë tä tiosën, ets aakyë'ë m'u'unk'ajtëtëp Ni'ik Këjxmëpë.

⁷E jëtu'un m'ooka'an mtëkoya'antë tä oy pën y'ooky tyëkoyën, jëtu'un mka'aja'antë o'këntum tä oy pën ënä'ämpë ëxëëkpë jyä'äy'ätyën ets y'ooky jam tsipjotm.

⁸Tios, mijts winë paye'epy yaa naaxwiiny naaxkëjxy, jä'ä ko mijts jëtu'un mniwintsën'ajtääpy tëkokyë yë naax kajpn mëjëtypë këjääjëtypë.