Read Biblia Mixe de Quetzaltepec Salmo 83 Bible Online

Salmo 83 - Biblia Mixe de Quetzaltepec bible

Salmo 83

¹Mijts Tios, këtii mwë'ëmy amonyë, këtii tu'k'ityë wyë'ëmy ets ka'ap tii ayuk xykyäjpxy.

²Ëk'ix yë mmëtsiptëjk, mëti'ipë m'ëxëëk'ijxëpën: janaam jatsojk tyu'ukmuktë ets myajnimëtyä'äky tëkatsyjyäty.

³Ëxëëkjaty yë mnaax mkajpn të tnimay të tnitajëtë, mëti'ipë mkuwäämpyën.

⁴Tëë tuknipëjktaakëtë ko ja mnaax mkajpn tyajkutëkoya'antë, e jëtu'un ëëtsëty ka'ap n'ëk'ijt n'ëktsënaaynyëtëty maas ja naax nkajpnëtyën, këtiipë nijëna'a yë Israel xyëëw yajja'amyätsëty.

⁵Tëë mijts myajnikäjpxytyunë, ets tu'kmukyë të tkäjpxy'atë jëtu'un ijxtëm jeexyë tu'uk je'eyë ja'ay myäy tyäjyën,

⁶yë Edom ja'ayëty, Ismael ja'ayëty, tëkokyë yë Agar ets Moab y'u'unk y'ëna'këty,

⁷näjyëtu'un yë Guebal ja'ayëty, Amón ja'ayëty, Amalec ja'ayëty, ets filistejë ja'ayëty mëti'ipë tsënaaytyëpën jam Tirë,

⁸ets yë'ëpaat yë Asiria ja'ayëty tëë tyu'ukmuktë mëët yë'ëjëty, ets yë'ë tyukjotmëk'ajtëp yë Lot yë y'u'unk y'ëna'k.

⁹Jëtu'un yajjat yajkëpät ijxtëm ojts ja Madián xytyunyën, ijxtëm näjyëtu'un xytyuunyën ja Sísara, ets Jabín jam wokjotm ma txëëwatyën Quisón,

¹⁰mëti'ipë jam Endor kutëkooytyën, ets apu'ut y'awinpijtaaytyë.

¹¹Jëtu'un xyajjat xyajkëpätëty mëti'ipë mëj jyëkyäjptëpën tä ojts xyajjaty xyajkëpetyën yë Horeb ets Zeeb; wä'än jëtu'un tjatë tkëpätë yë wyintsëntëjkëty ijxtëm ojts xytyunyën yë Zébah ets Zalmuná,

¹²mëti'ipë ojts tjaniwa'ana'antën ja it mëëynyak jotpë mëti'ipë Tios jyä'ä'ajtypyën.

¹³Tios, mëti'ipës nTios'ajtypyën, mijts m'a'ixëp ets jëtu'un kyëtawtëty kyëpiptëty tä wyinkëpipyën yë zarsa koxy, ets jëtu'un tä aaytyë'ëts ujtstë'ëtsën wyimpapojyën.

¹⁴Jëtu'un tä yë jëën jyëtityën tunkëjxm kopkëjxy, ets tëkokyë tno'kta'ay winë,

¹⁵jëtu'un ixjëtit pajëtit tä wyëtsukyën, ets ëtsë'ëkë mëët yë mëkpoj mëk yoots.

¹⁶Wintsën, yajtsëtyu'unpaat ets jëtu'un mja'amyätsëtëty.

¹⁷Wä'än twë'ëmtë tsëtyu'unmëët winë xëëw winë jëmëjt wä'än tsëtyuntë tjaapyätë ets y'ooktëty.

¹⁸Jëtu'un nijawëtëty ko mijts tu'ukyë mWintsën'ajtp, ko mijts tu'ukyë Ni'ik Këjxmëpë ma tëkokyë yë naaxwiinyëtë y'ëwtityën.