Read Biblia Mixe de Quetzaltepec Salmo 84 Bible Online

Salmo 84 - Biblia Mixe de Quetzaltepec bible

Salmo 84

¹Wi'ixpëm y'oyëty yë mtsajptëjk, Wintsën mëti'ipë maaytyääyëpën winë.

²Janty itaanpës ets janty nëjkxaanpës ma mtsajptëjkën, winë aaw winëjot nkuuy'iy nkuuyä'äxyës mëti'ipë juukyajtën yäjkpyën.

³Näyjyëtu'un yë joon jëyujkëty pyatëp yë y'ijtakn jap ma mijts mwintsë'këntyaknën, ets japts yë y'u'unk y'ëna'k yë pyä'än t'oytyuunë, mijts Wintsën mëti'ipë maaytyääyëpën winë, mijts nkutujkpë'ajtyp ets mijts nTios'ajtyp.

⁴Janty jotkujk yë ja'ay yajpaatë mëti'ipë ijtëpën ma mtsajptëjkën ets jap xëmë mkuuy'iy mkuuyä'äxyë.

⁵Janty jotkujk yë ja'ayëty yajpaatë mëti'ipë putëjkën jam pyatëpën ma mijtsën, mëti'ipë nëjkxantëpën ye'epyë jampaat ma ja mtun mkopkën.

⁶Ko nyaxtëty jam ma it naaxwiinyëtën ma jyam'atyën ja jë'ëyën yaxën, jëtu'un tyaj'awinpitëty tä tu'uk yë it naaxwiinyëtën ma ka'ap y'ëmaaytyä'äkyën yë nëë, ets näjyëtu'un yë'ëpaat yë nëë tuu nëjkxëp yë kënu'kxën tyajkëtä'äky;

⁷yë jyot myëjaawëty ni'ikyë kyëjääjëja'any, e jam ma Sión kopkën, jam nëjkx t'ixtë ja Tios mëjpë.

⁸Wintsën, mëti'ipë maaytyääyëpën winë, mëti'ipë Tyiosajtën yë Jacob, mëtoow'ijtëkës yë ntsajpkäjpxy.

⁹Mijts Tios, ni''ijxkëta'ak mëti'ipës xy'akëëytyujk xy'axajtujktëpën, mëti'ipë mijts kë'ëm mwin'ijxën ets yajkutukëty.

¹⁰Tsoowpatp ni'ik ja tu'kxëëwpë nyajpaatyës tsajptëkoty, këtiinëm koos jeexyë jëmëjt'am nyajpaaty tëja'p. Ëjts jotkujkës näjyawëtëty oy jeexyë je'eyë ntimy tyëjkëwent'ajtpës ma ja tsajptëjk yajnitëkën, ets këtii koos ënäty ëxëëktum nyajpaaty.

¹¹Jä'ä ko yë Tios mëti'ipë yajwintsën'ajtpën, yë'ë xykyutë'kx xykyujajëm ets xykyuwa'anëm; yë Wintsën tsyojkpy jya'ap ets yajmëj'ajtyp yë ja'ay mëti'ipë juuky'ajtëpën wa'ats, ka'ap nitii tukwintuk'ooky.

¹²Wintsën mëti'ipë maaytyääyëpën winë, janty jotkujk yë ja'ay yajpaaty mëti'ipë mijts mtuk'ijxpäjtëpën.