Read Biblia Mixe de Quetzaltepec Salmo 85 Bible Online

Salmo 85 - Biblia Mixe de Quetzaltepec bible

Salmo 85

¹Wintsën, janty'oy yë mwinma'any xyajnikëxë'ëky mëët ya'atë mnaax mkajpn. Ix tëë jatëkok xymyo'oy yë jyotkujk'ajtën yë Jacob yë nyaax kyajpn,

²tëë mnaax mkajpn xypyokymye'kxy ets tëë xymyä'kxtaayë tëkokyë ja y'ëxëëk'at;

³tëë mjotxeemy jatëkok ets tëë mjoot'an xyajnaxy.

⁴Tios, mëti'ipë ëëtsëty nnitsokpë'ajtëpën, yajnitsoktëkës tyam ets këtiis xy'ëktukjoot'anpëjknëtë.

⁵¿Ëkë winë xëëw winë jëmëjt xyaj'ita'any yë mtsip m'äkë mëët ëëtsëtyë?

⁶¿Tii këtii ëëtsëty xy'ëkyajjuuky'atanëtë, ets ja mkajpn mtukxoonta'akëtëtyë?

⁷Wintsën, tuk'ijxtëk ëëts yë m'oyjot m'oywyinma'any, ets yajnitsoktëkës.

⁸Nmëtoow'itäämpyës yam wi'ix yë Tios y'ënä'änyën; jä'ä ko yë'ë nyikajpxäämpy wi'ix mëpaat yë nyaax kyajpn jotkujk y'ityën, ets ja'ayëty mëti'ipë oy mëtuunëpën, këtiipë t'ëktuunëtëty ka'apë tyuunëtyën.

⁹Janty tëyajtën jëtu'un, ko yë Tios winkon yajpaaty, ets tyajnitso'oka'any mëti'ipë mëjpëjktakëpën, ets myëj'ajt y'oyajtën yaa yajpaata'any ma naax'ajt nkajpn'ajtëmën.

¹⁰Yë tsojkën ja'awën ets tëyajtën tu'knax y'ita'antë, itaanp näjyëtu'un ja jotkujk'ajtën ets ja mëtëypyë,

¹¹ja tëyajtën wiinkëxë'ëkaanp naaxwiiny, ets ja mëtëypyë jam tsajpjotm kyu'ijxnaxa'any.

¹²Yë Wintsën, yë'ë kë'ëm yajminäämpy yë nëë tuu, ets pyëtsëma'any jam kamjotm yë jë'kxy pëky.

¹³Ja tëyajtën yë'ë jëyëjp naxaanp, ets nipëjktaakëja'any ja në'ë tu'u.