Read Biblia Mixe de Quetzaltepec Salmo 87 Bible Online

Salmo 87 - Biblia Mixe de Quetzaltepec bible

Salmo 87

¹Ja nyipotsy ëjx yë Tios yë nyaax kyajpn, jam pyojtsë'ëkyëty ma ja kopkën wa'atspë.

²Yë Wintsën janty'oy ni'ik tsoky tjawë ja tsajptëjk ja nyitëjk'aaw këtiinëm yë Jacob yë jyëën tyëjk.

³Tios yë kyajpn, janty'oy myajnikäjpxy myajnimëtyä'äky

⁴Ja kajpn mëti'ipës xy'ixy'ajtëpën, jyëkyejpyës nikajpxëty Egiptë ets Babilonyë, Filistejë, Tirë ets Etiopíë; tëkokyë yë'ëjëty jam ojts myintë jya'të ma mijtsën.

⁵Ma Sión kajpnën jëtu'un y'ëna'ana'antë: Ya'atë kajpn ets xi'itë kajpn yam ojts tsyoony. Yë Ni'ik Këjxmëpë yë'ë të tnikäjpxy.

⁶Yë Wintsën yë'ë kyëxjaaytyääpy ma nyokyën tëkokyë yë naax kajpn yë xyëëw: Ya'atë naax kajpn ma yë'ëjën.

⁷Ets mëti'ipë ëëwtëp äjtstëpën, jä'ä y'ëna'antë: Yë n'ijtaknës jam yajpaaty ma mijtsën.