Read Biblia Mixe de Quetzaltepec Salmo 88 Bible Online

Salmo 88 - Biblia Mixe de Quetzaltepec bible

Salmo 88

¹Wintsën mëti'ipës nWintsën'ajtypyën ets mëti'ipës xyajnitsokpën, jopy ux mijts n'amëtoy npëjktsoy yë putëjk pupäjtën,

²ëxajë kupëk yë ntsajpkäjpxyës. Ëxajë kupëk näjyëtu'un yë nwaantsow npëjktso'owënës.

³Mëj këjääjës yë ëyo'on jotmay të xytyukkëtä'äky, janty o'kën jëjp'amës nyajpaaty;

⁴tyam jyëkyäjpnëp pën y'ëna'anëty ko ookyës nyajpatnë, jä'ä ko tëës ntimmyëjaawkëxy näjyawëty.

⁵Ëjts mon tukës atu'uk nyajpaaty o'kpë akujky, jëtu'unës të njaty të nkëpety tä ja'ayëtyën mëti'ipë o'ktëpën tsipjoty ets jämyë yajnitajëtë, jëtu'un tä ja'ay ka'apë xy'ëkkuwanën ets xyaj'ijtnë ijxtëkoy ja'atyëkoy.

⁶Japës mijts të xytyimpëjktä'äky ma jutën wäänë këkpë, ma yajxon kyëkëtyën ets nijënu'un jap kyajajy kyatë'kxy.

⁷Jam yë mjoot'an të xyajnajxta'ay maas ëjtsën, ets tëës mijts xyajmony xyajtuky mëët ja ëyo'on jotmay mëti'ipës të xytyuknikexyën.

⁸Mijts të xy'ëwa'atsy, etsës yë njëëkytyëjk nmëku'uktëjk xynyikäkta'ajëty, je'eyës mijts të xypyëjktä'äky ets xymyëtsipkä'äxtëtyës. Ëjts jëtu'unës nyajpaaty tä yë ja'ayën mëti'ipë tsumy matsy ijtpën ets ka'ap tjëkyepy wi'ix kyä'äkëtyën.

⁹Ëjts koos je'eyë xëmë një'ëy nyä'äxy, jëtu'unës nnäjyawëty moonëp yowë n'ijxënës. Winjëpom npa't'ëy npa'tkäjpxy Wintsën, ets jam ma mijtsën jamës yë nkë'ë nyujkxajy.

¹⁰¿Tii wä'än jëtää mëj'ajtën xyaj'ixëtëty ma o'kpën? ¿Ëkë wä'än jëtää yë o'kpëtëjk tkukajpxëtëty winë ma mijtsënë?

¹¹¿Wä'än jëtää jap pën tkajpx tmëtya'akëty yë mtëyajtën ets ja mtsojkën mja'awën jap jutjotyë, ma ja o'kën y'ëne'emyënë?

¹²Jap ma ja o'ktaknën ets ma winë y'ityën ijxtëkoy ja'atyëkoy. ¿Jap'atëp jëtää pën mëti'ipë jyä'ämyätsëp ja mtëyajtën ets ja mëj'ajtënë?

¹³E ëjts Wintsën, mijts xëmë nmëkajpxäämpy ets nja'amyätsäämpy, ko jyopyëp'aty janty tsojk mijts nmëkajpxkojy.

¹⁴¿Wintsën, wi'ixës ko mijts xy'ixtijy? ¿Wi'ixës ko xywyinkuyu'utsy?

¹⁵Yë jëtu'unpë jää ojts tsyo'ontä'äky koos n'ëna'k'ajty ets jëtu'un tyampaat tyu'uye'ey, mon tukës nyajpaaty, o'kën jëjp'amës näjyawëty; tëës yë këjääjëtypë ëyo'on jotmay nyajnaxy mëti'ipës të xytyuknikexyën, e maas tyam ja ëyo'on npaatyën ka'apës n'ëkmëmëta'akanë.

¹⁶Yë m'ëwa'an'ajtën ëjtsës të xytyukkëtakpäjta'ay, ets tëës xymyëmëtä'äky;

¹⁷jëtu'unës janaam jatsojk xynya'ëwtity tä yë ja'ay nyëë akoomtukyën.

¹⁸Tëë jëkäm xyajnëjkxta'ay yë nmëku'uktëjkës mëti'ipës ënäty mëët oy nnäjyawëtyën, tyam yi'iyës tu'uk njaakmëku'uk'ajtyp yë kootsajtën.