Read Biblia Mixe de Quetzaltepec Salmo 89 Bible Online

Salmo 89 - Biblia Mixe de Quetzaltepec bible

Salmo 89

¹Wintsën, xëmës n'ëna'ana'any n'ëyjyotyës ko mijts janty'oy yë jot winma'any xymyëëtëty, janaam jatsojkës nikajpxa'any nnimëtya'aka'any ko mijts aak'oy winë xytyuny.

²Nikajpxäämpyës ko yë mtsojkën mja'awën xëmëkyëjxm y'ity; ets mwa'atsajtën ka'ap tyëkatsy, jëtu'un tä tsajpën ka'ap nijëna'a tyëkatsy.

³Ojts tu'uk yë käjpxytyu'unën xytyuny mëët yë David, ets ojts xytyukwinwanë ja mtuunpë mëti'ipë ojts kë'ëm xywyin'ixyën:

⁴Ëjts nyajkutukäämpyës ets m'u'unk m'ok xëmë y'ënä'ämtëty, ma ënäty mijts mkutëkats xyajmëyätyën.

⁵Mijts Wintsën, tëkokyë jënu'un jam yajpaatën tsajpkëjxm, myëjpëjktaktëp yë m'oyajtën ets mmëjajtën.

⁶Ka'ap maa wiinkpë tios tsajpjotm, jëtu'unpë Tyiosëtyën tä mijtsën Wintsën.

⁷Tios yë mëjpë ets kutsë'ëkëpë, itkujky ets natuky yajpaaty mëët tëkokyë jënu'un yajpaatën jam tsajpjotm.

⁸Wintsën, mëti'ipë maaytyääyëpën winë, tëkokyë yë mëj'ajtën kutujkën mijts yë mjä'ä, mijts jä'ä m'ity natuky mëët yë tëyajtën; paaty ka'ap ma wiinkpë Tios jëtu'unpë tä mijtsën.

⁹Mijts pojën yë nëëmejy xyajyu'kxmony ko ëxëëk yë nëë'o'pyky y'ëti'itsy, jëtu'unyë xyajkëëy'awë oy jënu'un jyä'tsmin jyä'tsxëpëty,

¹⁰ojts xykyutä'änë'ëky yë jëyujk mëjëtypë nëëjotypë y'itën, tä o'kpën, ojts xy'awojpwa'kxta'ay yë mëtsiptëjk mëët yë mmëjajtën.

¹¹Yë tsajp ets naax mijts yë mjä'ä, mijts ojts yë naaxwiinyëtë xyajkojy xypyëjktä'äky ets tëkokyë jënu'un winë yajpaatyën ma yë'ëjën.

¹²Mijts ojts xyajkojy yë anëkëjxytsyowpë y'ityën ets anajnytsyowpë yajpaatyën, yë Tabor kopk ets Hermón kopk, akujk jotkujk tkuuy'ëw tkuuyya'axtë yë mxëëw.

¹³Yë mmëkajtën maayëp winë, yë m'a'oykyë'ë mëk yë'ë ets mëtakp oymyaajëty.

¹⁴Yë mkutujktakn, yë'ë mëët xëmë y'ity ja oypyë ja nipaye'eyën ijxtëm pyaat'atyën. Mëët ja tëyajtën ets ja tsojkën ja'awën mëët winë xytyuny.

¹⁵Wintsën, janty jotkujk yajpaaty yë naax kajpn mëti'ipë nyija'apën wi'ix akujk jotkujk myajwin'ëy myajwinyä'äxyën ets nyëye'ey tyu'uye'ey kutë'kxy mëët yë mtë'kxën mjajën.

¹⁶Mëët mxëëwkyëjxm janty xoontakp ya'atë naax kajpn xëmë ets jotkujk nyäjyawëty ko mijts mëtëy winë xytyuny.

¹⁷Tëyajtën jëtu'un ko mijts myamëk'ajtyp ets myaj'oykyëxë'kpy, ëëts yë nmëk'ajtënëty ni'ikyës njawëtë myëjë kyëjääjë mëët ko mijts jëtu'un janty'oy xytyuknipëjktaakë.

¹⁸Yë'ëjës xykyuwantëp yë Wintsën. Yë nkutujkpëtyës, yë'ë jam Israel wa'ats yajpatp.

¹⁹Ojts tu'kxëëw tu'kjëmëjt xymyëkäjpxy yë mtuunpëtëjk, jëtu'un tä ja'ay tii twin'ixyën, ets ojts xy'ënëëmë yë mja'ay mëti'ipë ënäty oy mëtuunëpën: Tëës tu'uk jotmëkja'ay nwin'ixy maas yë nnaax nkajpnën, mëj'äämpyës të npëjktä'äky ets tëës nputëkë.

²⁰Tëës npaaty ja ntuunpës mëti'ipë xyëëwajtypyën David, etsës të ntukënu'kxy ja kënu'kxy on ets yë'ë yajkutukëty.

²¹Xëmës nputëkëja'any, mëët yë nmëk'ajtënës jotmëkës xëmë nyaj'ita'any.

²²Ka'ap yë myëtsip myäyä'änyë, yë ëxëëkja'aytyëjk ka'ap myëmëta'aka'anyë.

²³Ëjts nëjkx kë'ëm naxkutij naxkumatsë yë myëtsiptëjk, ets ntimjyëwowa'anyës ma yë'ëjën. Piw nuukës ntuna'any mëti'ipë ëxëëk'ijxëpën.

²⁴Ntsokäämpy njawëjäämpyës yë'ë ets oy tsujës njawëja'any, mëët yë'ë koos ëjts xy'ëwtaty, nyajkëjääjëjäämpyës yë kyutujkën ets myëk'ajtën.

²⁵Yë y'ënä'ämën kyutujkën jampaat nëjkx tsyo'ontä'äky ma Mediterrányë mejyën ets jya'tëty jampaat ma Éufrates mëjnëëjën.

²⁶Täätsës xy'ënëëmëja'any: Mijts nTeety'äjtyp ets mijts nTios'ajtyp, mëti'ipës xyajnitsokpën ets xy'ijx'ijtp xykyëwent'ajtpën.

²⁷Ets ëjts, nmo'ojäämpyës yë kutujkën ets nyaxëty tä yë ajtykyopkën, ets yë'ë nyitënaaytya'ajëp tëkokyë yë ënä'ämpëtëjk jënu'un yajpaatën ënä'ämpë naaxwiiny naaxkëjxy.

²⁸Yë ntsojkënës xëmës nyaj'ita'any ma David jyuuky'ajtënën, ets ja käjpxytyu'unën mëti'ipës mëët të ntunyën itaanp xëmë.

²⁹Yë y'u'unk y'ok, yë'ë nëjkx kyutëkëty ma yajkutujktaknën, ets yë'ë nëjkx y'ënä'ämtë mapaat jyää'atyën yë tsajp.

³⁰E ko t'ëxmatstëty yë ntëyajtënës ets n'ënä'ämënës, ko ka'ap jëtu'un jyuuky'atëty tääjës ënäty të njatuk'ënä'ämtën,

³¹ets pën ka'ap tpatuntë ja n'aaw n'ayukës ets ka'ap tmëmëtowtë yë n'ënä'ämën ntëyajtënës.

³²Kopkpëky ko nëjkx ntukumëtowtës ja y'ëxëëktu'un y'ëxëëk kajpxënëty mëët ja näywyop näkya'atsë.

³³E ma David ja jyuukyajtënën ka'apës ja ntsojkën nja'awën tu'ukyë njëpëka'any, ja n'oyjot n'oywyinma'anyës xëmë jam yajpaata'any.

³⁴Ka'apës njëjpkajpxtu'uta'any yë nkäjpxytyu'unënës, yë n'ayukës xëmës nkuuytyuna'any.

³⁵Tëës je'eyë tëkokyë nikäjpxy mëëtës yë nwa'atsajtën, e ka'ap tjëkyepy nwin'ëënëtyës:

³⁶Yë y'u'unk y'okëty yë'ë ënä'ämantëp xëmë ma kyutujktaknën, mapaat jyää'atyën yë xëëw.

³⁷Xëmë y'ita'any tä yë po'ojën, xëmë y'ita'any mapaat jyää'atyën yë tsajp.

³⁸E tii të tyuny të jyätyë, mijts ka'ap ja yajkutujkpë të xy'ëktsojknë mëti'ipë ojts xywyin'ixyën, jëkäm të xypyëjktaknë, tëë xytyimtukjoot'anpëky yajxon.

³⁹Tëë ja käjpxytyu'unën xyjyä'äytyëkooynyë mëti'ipë ojts xytyunyën mëët ja mtuunpë, ets ja kyujän tëë xytyukkukëëytyutnë ets të xy'ixjëpijpnë.

⁴⁰Ojts yë pyotsy xyajjujtaayë mëti'ipë yë nyaax kyajpn nyapots'ajtypyën, ets ojts axit ako'owë xyajjajta'ay ja nyaax kyajpn.

⁴¹Tëkokyë ja'ayëty mëti'ipë jam najxtëpën kopkpëky ko winë tontëty tmäätstëty mëti'ipë jamën, ja naax kajpn mëti'ipë myëwinkon'ajtëpën je'eyë nyëxik tyukxiknëtë.

⁴²Mijts të xy'ëwa'atsy ets ja myëtsiptëjkëty myëta'aktëty, ets akujk jotkujk kyë'ë y'aaw t'apo'kxmuktëty.

⁴³Ojts xyajjëjpkëtaktaayë tyiypyujxnëty, ets ka'ap të xyajpo'oxy tsipjoty.

⁴⁴Tëë xypyëjkë ja xyoontakën ets ja myëk'ajtën, tëë jëtu'unyë xyajnaxkumonë ja y'ënä'ämtakn kyutujktakn;

⁴⁵tëë yë jyuukyajtën xykyuwijtsë ets të xyajwë'ëmy tsëtyu'unmëët.

⁴⁶Mijts Wintsën, ¿Jëna'a mwa'këxë'ëka'any ma tyam yu'utsy myajpaatyën? ¿Jekpyaat xyajtoyä'äny yë mtsip m'äkë tä jëën tyoy jyemyënë?

⁴⁷Wintsën, mëmay mëtaj koos janty wäänës yë njuukyajtën jyaak wë'ëmy; yë ja'ay mëti'ipë të xyajkojyën wäänë jyuuky'äty.

⁴⁸Ka'ap pën kë'ëyxyëëw kë'ëyjyëmëjt jyuuky'äty, ets nijëna'a kya'ookëty. Ka'ap pën myäyëtëty nyäyaj'ëwaatsëpëtsëmëtëty ma o'kën.

⁴⁹Wintsën, ¿maa ja mtsojkën mja'awën të nyijkxy? mijts jëtu'un m'ëna'any ko yë tsojkën ja'awën yë'ë kopkpëky, ojts xytyukwinwanë ja David ko oy winë xytyuna'any ma yë'ëjën.

⁵⁰Wintsën, mja'amyätsëp yajxon ko yë ja'ayëty mëti'ipë mmëtuunëtëpën je'eyë muum yë ja'ay y'ojëtë ya'axëtë, jëtu'unës njawë ëjts yowë yaj'ojp, etsës ënät nkumon nkutukë.

⁵¹Wintsën, ëxëëkjaty tääpë ja'ay xëmë xytyuntës xy'ënëëmëtës mëti'ipë mmëtsip'ajtëpën. Jëtu'un këxëty këpätëty t'ënëëmëtë m'u'unk mëti'ipë të xywin'ixyën oy ma nyijkxy.

⁵²Kënu'kxy mëjjawë yë Wintsën xëmë y'itëty. Jëtu'un, jëtu'un y'itëty.