Read Biblia Mixe de Quetzaltepec Salmo 9 Bible Online

Salmo 9 - Biblia Mixe de Quetzaltepec bible

Salmo 9

¹Nmëjpëjkta'akäämpy mijts Wintsën winë aaw winëjot, ets nimëtya'aka'anyës oypyë tsujpë xyajnikëxë'ëkyën.

²Mijts Ni'ik Këjxmëpë, nëkooyë ntukxoontaknë, n'ëwäämpyës yë ëy mëti'ipë kyuuy'iipyën yë mxëëw.

³Yë nmëtsipës, tim käktëp ma mijtsën, jëtu'unyë kyëtawtë kyëpiptë ets y'ooktë.

⁴Mijts oy mkutujkën'aty: tëë mnaaxweetsy ma mkutujktaknën, etsës xynyipaye'eyä'äny.

⁵Tëë xy'ojy ja ja'ay ka'apë m'ëwtatyën, tëë xyajkutëkoy ja ëxëëkja'aytyëjk; tëë xytyimjo'otsy xëmëkyëjxm mëti'ipë jeexyë yajtukja'amyäjtstëpën.

⁶Tëë ja mëtsip y'ooky, tëë ja nyaax kyajpn mëët y'ooky; mijts të xyaj'atëkoy ets nitii të kyawë'ëmy mëti'ipë jeexyë yajtukja'amyäjtspën.

⁷E yë Wintsën yë'ë ënä'ämp ets yajkutujkp xëmëkyëjxm, tëë tyajnaxkëtä'äky yë kyutujktakn, ets tpaye'eyä'äny ja oypyë ka'oypyë.

⁸Yë'ë pyaye'eyäämpy ja ja'ay ja nyëë pyoky ijxtëm pyaat'atyën, mëët ja tëyajtën tyajnitukëja'any ja naax kajpn.

⁹Yë Wintsën y'akëëytyujkpy y'axajtujkpy yë ja'ay mëti'ipë ëxëëk yajtuunpën, myajts'ijtyp Kyëwent'ajtyp ko mon tuk yajpaaty.

¹⁰Wintsën, yë ja'ay mëti'ipë m'ixy'ajtëpën mijts mtuk'ijxpäjtëp, jä'ä ko mijts nijëna'a xykya'ëxmatsy mëti'ipë m'ixtaayëpën.

¹¹Win'ëw winya'axtë yë Wintsën, mëti'ipë ënä'ämpën jam Sión; tuk'ëwaanëtë yë naax kajpn mëti'ipë të tunyën.

¹²Tios jyä'ämyejtsyp yë ja'ay mëti'ipë yuujoty pa'amjoty yajpatpën ets ka'ap tja'atyëkoy ja jyi'iyën yaxën; tyiytyuunpy mëti'ipë ëxëëk ëtëtsp ënaanpën.

¹³Wintsën, pa'ëyoow najts'ëyo'owëkës, ëk'ix wi'ixës xyaj'ëyowtën ja ja'ay mëti'ipës xy'ëxëëk'ijxtëpën, yajpëtsëëmkës o'kënjëjp'am,

¹⁴etsës jam Jerusalén nikajpx nimëtya'akëty ko mijts mnitëjkëyëp myajmëjpëjkta'akëty, ets ko janty jotkujkës nyajpaaty koos të xyajtso'oky.

¹⁵Yë ja'ayëty ka'apë Tios t'ëwtatën, kë'ëm të nyäyajnëjkxëtë o'këntum, ma ja o'ktaknën mëti'ipë myëku'uk të tukni'oytyunëtën, kyë'ëmteky jap të jyänë ma ja tejpxyën mëti'ipë të tyu'utstën.

¹⁶Yë Wintsën tëë kë'ëm nyänyikëxë'ëkyë ko të tuny ja nipaye'eyën. Ja ëxëëk ja'ay tsumy matsy të wyi'imy ma ja majtstaknën mëti'ipë kë'ëm të tyaj'oyën.

¹⁷Yë ëxëëkja'aytyëjk ets ja ja'ayëty mëti'ipë ka'ap yë Tios t'ëwtatën, mëti'ipë tu'ukyë yë Tios të tja'atyëkooynyëtën, jam kyëxa'antë ma o'kën yajkutukyën.

¹⁸Yë'ë ka'ap tja'atyëkoyä'äny ja mëti'ipë ëyoop jotëkoopyën, ets ëyoopëja'aytyëjk pyaatantëp ja mëti'ipë y'a'ijx jyëjp'ijxtëpën.

¹⁹Pëtë'ëk, Wintsën. Këtii xy'ëwa'atsy ets naaxwiinyëtë ja'ay xëmë nyäyajmëjnaxëtëty; paye'ey mijts mwintuuy ja pyoky mëti'ipë ka'ap m'ëwtatyën.

²⁰Wintsën, ëtsë'ëkë tääpë ja'ayëty; tuknijawë ko ka'ap tii tkëjxm'atë, naaxwiinyëtë ja'ay yë je'eyëty.