Read Biblia Mixe de Quetzaltepec Salmo 91 Bible Online

Salmo 91 - Biblia Mixe de Quetzaltepec bible

Salmo 91

¹Pën juukyajtpën ma Tios ja kyë'ëpa'tkën, ma nyikë'ëy nyixajyën ja Ni'ik Këjxmëpë ets mëti'ipë maaytyääyëpën winë,

²jëtu'un y'ënä'äny: Mijts ntsoktakn'ajtyp ets mijts jëtu'un tä tu'uk yë jëën tëjkën maas ka'ap ni pën xynyitëkëtyën, ja nTiosës mëti'ipës tu'ukyë ntuk'ijxpejtypyën.

³Yë'ë maayëp myajpëtsëmëtëty ma ja o'ktaknën yu'utsypë ets ma ja pa'am ëyo'onën mëti'ipë yaj'o'kp yajtëkoopyën,

⁴yë'ë mnikë'ëjan mnixajanëp mëët yë kyäkn, ets ko jam myajpaatëty ma yë'ëjën, akujk jotkujk m'ita'any. Yë tyiyajtën ets wya'atsajtën yë'ë m'axajtukanëp tä tu'uk yë pujxn y'akëëytyukyën.

⁵Këtii mtsë'ëkëty mjawëty ko tii xy'ixëty atsë'ëk ajawë akootstuuy, ni yë'ë xykyatsë'ëkëty ko ja'ay tyujëty tyi'pxëty xëëny,

⁶ets ëyo'on mëti'ipë këtakpën ko kyoots'aty ni yë'ë xykyatsë'ëkëty, näjyëtu'un mëti'ipë yaj'ookaanpën ko xyiiny'äty;

⁷nimay o'kpë kya'aja'any m'anajnytsyow ets näjyëtu'un m'a'oytyow, e mijts nitii mkajat mkakëpätëtëty.

⁸Mijts je'eyëmës ko mnajam'aty: ets nëjkx xy'ixy wi'ix yë ëxëëk ja'ay jyatën kyëpätën ets tkumëtowtën yë pyoky.

⁹Jä'ä ko yë Wintsën yë'ë të xypyëjktä'äky ijxtëm tu'uk yë tsoktaknën; yë Ni'ik Këjxmëpë të xy'ixy ijxtëm tu'uk këwent'ajtpën,

¹⁰nitii ëxëëkpë mkaniminëtëty ets pa'am ëyo'on ka'ap mkutëkëtëty ma mjëën mtëjkën.

¹¹Yë Wintsën yë'ë kyäxäämpy yë kyukäjpxy, ets mkëwent'atëtëty oy maa mnëjkxëty.

¹²Yë'ë mwitsanëp ma mkë'ëjën këtiipë mkunäpëty tsaakëjxy.

¹³Oy kaa akujky mtimye'ey mtimnyaxëty ets ma mëjjatyëtypë jëyujkën mëti'ipë kutsë'ëkëtyën, ets oy xii yaa muum yë tsa'any mjaakë'ënax mjatekynyaxëtëty.

¹⁴Ëjts jotkujkës nyaj'ita'any ets ëwaatsëtuuyës npëjkta'aka'any ma ka'ap tii ëyo'on pyaatëtëtyën, jä'ä ko yë'ë oyës xytsyoky xyjyawë ets xy'ixy'ajtpës näjyëtu'un.

¹⁵Koos xymyëkajpxëty, n'ëtsowäämpyës; ëjts kë'ëm yajpaataanp mëët yë'ë. Nyajpëtsëmäämpyës ma ënäty myony tyukyën etsës nyajnaxa'any kumay;

¹⁶ëjts nyajkutukäämpy ets tukxoonta'aktëty ja juukyajtën jekpyë, etsës nyajxoonta'aka'any ma ja nitsokënën.