Read Biblia Mixe de Quetzaltepec Salmo 94 Bible Online

Salmo 94 - Biblia Mixe de Quetzaltepec bible

Salmo 94

¹Näyajnikëxë'ëkët mijts Wintsën, Tios mëti'ipë tukëpäjtpën ja poky.

²Mijts nipaye'epyë naaxwiinyëtë apëtsëmy; nipëtë'ëk yë amëj akëjxmëpë, tukukëpät ijxtëm pyaat'atyën.

³Wintsën, ¿tii jekyën jëtu'un janty'oy janty xoontä'äky yajpaata'antë yë ëxëëkja'aytyëjkëtyë?

⁴Aakyë'ë ëxëëkpë tyuuntëp kyajpxtëp ets nijënu'un tkamëët'atë yë näywyinkutsë'kën, je'eyë xëmë amëj akëjxm nyäyjyawëtë. Yë'ëjëty nëkooyë jyänty nyäkyumayëtë oy nitii tkanijawëtë ets tkamëët'atë.

⁵Yë'ëjëty ëxëëk ojts tuntë ja mnaax mkajpn ets janty naxym ojts tpëjkta'aktë, jëtu'un tä jeexyë ka'ap nitii timkyëjxm'atën.

⁶Yaj'o'k yajtëkooytyëp yë ku'ookpyë to'oxytyëjk jaaypyaat jaaypyo'kxy ets ku'ooky'u'unk ku'ooky'ëna'k.

⁷Jëtu'un myäytyë tyajtë ko yë Wintsën ka'ap tii t'ixy, ko Tios mëti'ipë Jacob Tyios'ajtypyën, ka'ap tii tnijawë ets ka'ap tii tunyë këwentë.

⁸Miitsëty tsuuja'aytyëjkëty ets kumonypë myajpaatën ets winma'anytyukpë, ja'akyukëtë ya'atë: ¿Jëna'a miitsëty mja'akyukëja'antë?

⁹¿Tii wä'än jëtää ka'ap myëtoyë mëti'ipë tatsk të tyajkojyënë? ¿Wä'än jëtää ka'ap y'ixyë mëti'ipë wiin të tyajkojyënë?

¹⁰¿Wä'än jëtää ka'ap tyiytyunyë mëti'ipë naax kajpn tyukumëtoopyën ko tii tuuntëkoyë? ¿Wä'än jëtää ka'ap jyä'äkyukë mëti'ipë naax kajpn winë tyuk'ijxpëjkpyënë?

¹¹Yë Wintsën wa'ats tnijawë ko naaxwiinyëtë ja'ay yi'iyë myääpy tyäjpy yë tsuuwinma'any ka'apë tyuunpëtyën.

¹²Wintsën, janty jotkujk yë ja'ay yajpaaty ko xytyukmëkäjpxy ënätyë ko tii oy tkatuny, jëtu'un ja ijxpëjkën ni'ikyë xymyo'oy,

¹³tääts jotkujk yajpaatëty, oy ëxëëk ja xëëw jëmëjt jyaminy jyakëtä'äky, ma ja ëxëëkja'aytyëjk yaj'oytyuntë ja jyutëty.

¹⁴Yë Wintsën ka'ap yë nyaax kyajpn t'ëxmatsa'any ets ka'ap atu'uk tyajwë'ëma'any mëti'ipë jyä'ä'ajtypyën.

¹⁵Ja nänyipaye'eyën oy yajxon jatëkok tyu'uye'eyä'äny ets tëkokyë yë ja'ayëty mëti'ipë mëët jyuuky'atën yë'ë pyanëjkxantëp.

¹⁶¿Pënës xy'ëkniwaantu'utëp ma ëxëëkja'ayëtyën, ma ja tuuntëkoopyë kajpxtëkoopyëtyën?

¹⁷Koos jeexyë yë Wintsën të xykyaputëkë jëna'ajëpës jeexyë n'o'knë, ma jap mon tuk xëmë yajpaatyën.

¹⁸Koos ojts tëkok n'ëna'any: o'kpës yam, ënetyës ojts xynyiminy yë mtsojkën mja'awën, Wintsën, etsës xypyutëjkëy.

¹⁹Koos mëk nmay ntajy ets kanaakjëjp ja jotmay maas yë njot nkëpajkën, mijtsës xyajjotkujktakp etsës xymyo'oy yë xoontakën.

²⁰Mijts ka'ap tjëkyepy mnäy'oyjyawëtëty mëët yë yajkutujkpë mëti'ipë ka'ap tii oy yajxon tnipaye'eyën, mëti'ipë aak tëkatsy winë tyuuntëpën ets ka'ap jyëtu'unëty tä ja ënä'ämën myinyën,

²¹mëti'ipë je'eyë nyikäjpxytyu'unëtyëpën yë wa'ats ja'aytyëjk ets ka'apë tii poky tuuntëkoyën, ets tyajnitukëtë ets y'ookëty.

²²E ëjts Wintsënës ntsoktakn'ajtyp, yë nTiosës yë'ëjës nja'ap tä tu'uk yë mëjtsaakopkën mëti'ipës xykyuwaanpën.

²³Yë Wintsën yë'ë nëjkx jëna'a tyajkutuky ets ëxëëkja'aytyëjk yi'iyë yë y'ëxëëktu'un y'ëxëëk kajpxën yajkutëkoyëtëty. Yë nTios'ajtëm nëjkx kë'ëm yajkutëkoyëtë.