Read Biblia Mixe de Quetzaltepec Salmo 99 Bible Online

Salmo 99 - Biblia Mixe de Quetzaltepec bible

Salmo 99

¹Yë Wintsën yë'ë yajkutujkp. Yë y'ënyääytyakn ma yajkutukyën jam yajpaaty kyukäjpxy akujky. Yë naax kajpn jëtu'un jyänty tsyëtyuytyë, ets tëkokyë yë naaxwiinyëtë mapaat y'ëwtityën.

²Yë Wintsën mëj'äämpy jam y'ity ma ja Sión kopkën; yë Wintsën yë'ë nyitënaaytyääpy tëkokyë yë naax kajpn.

³Wä'än tyajwin'ëy tyajwinyä'äxy yë xyëëw, jä'ä ko yë'ë mëj'äämpy y'ity ets kutsë'ëkë; Tios, wa'ats yë'ë.

⁴Mijts jëtu'un tu'uk yajkutujkpë mëti'ipë maaytyääyëpën winë, m'oy'ijxyp ko jyää'aty ja mëtëypyë nipaye'eyën; mijts ojts xyajnaaxkëtä'äky ets jyää'atëty ja tu'knaxajtën, yë Jacob y'u'unk y'ëna'k janty'oy të xymyëët'aty ets tëë xynyipaye'ey yajxon tëy tëtä'äky.

⁵Mëjjaw kënu'kxyjyawëtë yë Wintsën, mëti'ipë nTios'ajtëmën; yë'ë wiinkoxtänëtë ets ëwtatë. Yë Tios, wa'ats yë'ë.

⁶Yë Moisés ets Aarón jam yajpaatë ma y'itën yë Tios mëtuunpëtëjk; e yë Samuel jam yajpaaty ma ja'ayëtyën mëti'ipë ojts myëjpëjktakxëtyën ja xyëëw. Yë Wintsën ojts ënätyë y'ëtsowëtë ko ja putëjkën t'amëtoowtë.

⁷Ojts yë Tios mëët kyajpxtë myëtya'aktë jokjoty yootsjoty, ets yë'ëjëty ojts tkuuytyuntë ja ënä'ämën tëyajtën mëti'ipë ojts yajmo'otën.

⁸Wintsën mëti'ipë ëëtsëty nTios'ajtëpën, mijts ojts xy'ëtsoy. Jä'ä ojts mijts mTios'aty pojkpëmä'kxpë ma yë'ëjëtyën, je'eyëp ko ojts näjyëtu'un xytyiytyuny ko muum tyëkooytyë.

⁹Mëjpëjkta'aktë yë nWintsën'ajtëm Tios; wiinkoxtänëtë ja kyopk wa'atspë. Yë nWintsën'ajtëm Tios, wa'ats yë'ë.