Read Biblia Mixe de Quetzaltepec Proverbios 10 Bible Online

Proverbios 10 - Biblia Mixe de Quetzaltepec bible

Proverbios 10

¹Ya'atë Salomón y'aaw'ajtyp y'ayuk'ajtyp: Yë u'unk ëna'k wijypyë ets mëti'ipë winë nyija'apën yajxoontäkpy yë tyeety tyaak; e ja mëti'ipë winma'anytyukën ets tsuujën je'eyë ja tyeety tyaak tyajmony tyajtuky.

²Yë wit meeny mëti'ipë yajpatpën mëët yë ëxëëk jot ëxëëk winma'any, ka'ap pën oy tyajtuny; e ko yë wit meeny ja'ay oy tnitun tniye'eyë, yajpëtsëëmp o'këntum.

³Tios ka'ap tyaj'ayuu'aty yë ja'ay mëti'ipë oyjyä'äyën, mëti'ipë ëxëëk ja'ay'ajtpën ni'ikyë tukpaaty yë yuu, e oy jyakaay jya'ukpë, je'eyëm yë yuu tjawëja'any.

⁴Ko wäänë tii yajnitunë, wäänë tii yajpaaty; e ko mëj këjää tii yajnitunë, mëj këjää tii yajpaaty.

⁵Yë wijytyëjkëty jää yë pëjktä'äky tyajmuktë ko pyojë'ëky, yë tsuutëjkëty jää mya'atë ko ja pëjktä'äky myuka'any.

⁶Ma oyjyä'äyën, mëj këjää yë kënu'kxën jam kyëtä'äky; e ma ja ëxëëk ja'ayën, jëtu'unyë yajkumon yajkutukëty ja ëxëëk jot ëxëëk winma'any.

⁷Ja'ay mëti'ipë oy tsuj të jyuuky'ätyën, xëmë yaja'amyetsy oy të y'o'knë; e mëti'ipë ëxëëk të jyuuky'ätyën, ¿pën ëkja'amyätsanëp?

⁸Yë ja'ay mëti'ipë wijyën, käjpxykyupëjkp nyäpyëjktä'äkyë; e mëti'ipë wiinkjaty ëtsoopën, ëxëëk jyäty kyëpety.

⁹Mëti'ipë ka'ap maa nyu'kxyën ka'ap tii tsë'ëkë; mëti'ipë ëxëëk ja'ay'ajtpën, ëxëëk kyukëxë.

¹⁰Ja'ay mëti'ipë wiinmä'kpën këjää jotmay tyajminy; mëti'ipë tsuu poj kajpxpën, ëxëëk jyäty kyëpety.

¹¹Ko yë wa'ats ja'ay kyäjpxy, yajjotkujktäkpy yë juukyajtën; yë ëxëëk ja'ay o'ktëy tyunyë tsip käjpxy.

¹²Yë näy'ëxëëk'ixë je'eyë yajtsiptuny, e yë tsojkën ja'awën myä'kxtääpy yë nëë poky.

¹³Yë wijyjyä'äy yë'ë kyäjpxyp wijyajtën; yë tsuuja'ay jëtu'un tjawë tä jeexyë yajëkuwopën mëët yë kepy.

¹⁴Yë wijyjyä'äy ka'ap tnikäjpxy ko tii tjaty tnijawë, ni'ik ko tu'uk kyäjpxy yë tsuuja'ay, kutsë'ëkë yë'ë.

¹⁵Yë ja'ay kumeenypë, yë'ë nätyukuwanëp yë wyit myeeny; e yë ëyoopëja'ay yë'ë y'ëyo'on'ajtyp ko y'ëyoy.

¹⁶Yë oyjyä'äy, yë'ë kyuma'ayën'ajtyp yë juukyajtën; yë ëxëëk ja'ay, yë'ë kyuma'ayën'ajtyp yë poky.

¹⁷Mëti'ipë ja'ay kyupëjkpyën ma winë yajtukmëkäjpxyën ko tii oy tkatuny, yë'ë në'ë tu'u oypyë pyijkpy mëti'ipë ja juukyajtën mo'ojëtëpën; e mëti'ipë ka'ap tkupëkyën kë'ëm nyäyajtëkoyë.

¹⁸Antakp yë ja'ay mëti'ipë ka'ap tyajkëxë'ëkyën ko myëku'uk t'ëxëëk'ixy, ets tsuuwinma'any yë'ë ko yajnikäjpxy yajnimëtyä'äky xii yaa muum yë pi'tskäjpxy.

¹⁹Mëti'ipë ëxëëk y'amëtyä'äkyëtyën ka'ap tjawë jëna'a kyajpxtëkoy; wijyjyä'äy nyäxy mëti'ipë amonyë ijtpën.

²⁰Yë wa'ats ja'ay jëtu'un yë y'aaw y'ayuk tä poop pujxnën; yë ëxëëkja'aytyëjk yë jyot wyinma'anyëty; nijënu'un kyatsoowpaaty.

²¹Yë wa'ats ja'ay ko kyäjpxy, may yë ja'ay tyaj'ijxpëky; e yë tsuuja'ay ëxëëk nyäjyawëty ko ka'ap tii tjaty tnijawë.

²²Ni'ik tsyowpaaty ko yë Tios kyënu'kxy jyëkyejpy, jä'ä ko ka'ap yajmony yajtuky.

²³Yë tsuuja'ay jotkujk nyäjyawëty ko tii tuuntëkoy; yë wijyjyä'äy jotkujk nyäjyawëty ko tii niwijy tuny.

²⁴Mëti'ipë ëxëëk ja'ay tsyë'këpën, yë'ë jajtëp këpäjtëp, e yë wa'ats ja'ay pyätyp mëti'ipë tsyojkën'ajtypyën.

²⁵Ko yë mëkpoj nyäxy, yë ëxëëk ja'ay jëtu'unyë pyojtëkoy; e yë wa'ats ja'ay xëmë jotkujk y'ity.

²⁶Ko yë nuux ja'ay tii yajtuk'ëne'emy, jëtu'un nyäjyawëty xun nëë yowë yajtuk'ukp, ëkë jok yowë wiinkupojëyëp.

²⁷Ko Tios yajtsoky yajjawë, yoonp yë juukyajtën; e yë ëxëëkja'aytyëjk ni'ikyë yë jyuukyajtën yajkuwitstë.

²⁸Yë wa'ats ja'aytyëjk akujk jotkujk yajpaatë ma mëti'ipë miimp këtakpën; e yë ëxëëkja'aytyëjkëty jëtu'un tjawëtë mëj ëyo'on yowë tim tukëtakpäjtëtëp.

²⁹Tios kyuwäämpy yë ja'ay mëti'ipë winë oy tyuuntëpën; ets yajkutëkoopy mëti'ipë wiinkjaty winë tyuuntëpën.

³⁰Yë wa'ats ja'ay nijëna'a ëxëëk kyajaty kyakëpety, e yë ëxëëk ja'ay ka'ap jeky jyuuky'ata'any; naaxwiiny naaxkëjxy.

³¹Ko kyäjpxy yë wa'ats ja'ay, aakyë'ë kyäjpxyp mëti'ipë niwijyën; e yë ëxëëk ja'ay ni pën kyayajkajpxa'anyë.

³²Yë wa'ats ja'ay aakyë'ë kyäjpxy oypyë; yë ëxëëk ja'ay aakyë'ë kyäjpxyp tëkatsypë.