Read Biblia Mixe de Quetzaltepec Proverbios 11 Bible Online

Proverbios 11 - Biblia Mixe de Quetzaltepec bible

Proverbios 11

¹Tios ka'ap t'oyjyawë ko tii kä'pxy kyayajkijpxy, yë'ë oyjya'ap ko tii kä'pxy yajkijpxy.

²Ko ja'ay je'eyë nyämyëjaw nyäjyääntyjyawëty, ka'ap pën y'oyjyawëty; ja'ay mëti'ipë wijyën, yu'unk naxym jyä'äy'äty.

³Yë oyjyä'äytyëjk yë'ë oy yajjuuky'ajtëtëp ko winë aak mëtëy tuntë; e yë ëxëëkja'aytyëjkëty yë'ë yajkutëkoyanëtëp yë y'ëxëëk'ajtënëty.

⁴Yë wit meeny nijënu'un kyatuna'any ko ënäty ja poky yajnipaye'ey, je'eyëp ko jyää'aty ja nipaye'eyën, mayjyä'äy tpaatë nitsokën.

⁵Ko jyää'aty ja oypyë nipaye'eyën, ja wa'ats ja'aytyëjk o'oyëtëp ja tyu'ujëty; e ja ëxëëk ja'ay ëxëëk tmëjaty ja y'ëxëëktu'unën.

⁶Yë nipaye'eyën yaj'ëwaatsëpëtsëëmp yë oyjyä'äytyëjk, e mëti'ipë winë y'atsojkpyën ëxëëk tmëjaty.

⁷Ko yë ëxëëk ja'ay y'ooky, o'ktääpy jënu'un winë të tmëmay të tmëtajyën.

⁸Yë Tios yajpëtsëëmpy yë oyjyä'äytyëjk ma monyë tukyën; ets ëxëëkja'aytyëjk yë'ë jam tpëjktä'äky.

⁹Ko yë ëxëëk ja'ay kyäjpxy yajtëkooytyääpy yë jyiiky myëku'uk; e yë wa'ats ja'ay yë wijyajtën yë'ë jatëkok yajtsokëp.

¹⁰Ko yë wa'ats ja'aytyëjk jyotkujkta'aktë, yë naax kajpn jotkujk näjyëtu'un yajpaaty; ko yë ëxëëkja'aytyëjk y'ooktë, xoontakp yë naax kajpn.

¹¹Yë'ë mëët ja wa'ats ja'aytyëjk ja nyäkyënu'kxë yajkojy yë naax kajpn; e yë ëxëëkja'aytyëjk yë'ë yajma'typ mëët y'aaw y'ayuk.

¹²Ja'ay ka'apë oy yë jot winma'any tmëëtëtyën je'eyë myëku'uk wiinkjaty tnimëtyä'äky; e yë ja'ay mëti'ipë jap yë wyinma'anyën amonyë y'ity.

¹³Ja'ay mëti'ipë pi'tskajpxpën aak nyimëtyaktääpy oy tyimtiijëty, yë ja'ay mëti'ipë këpetyën yu'utsy winë tmëët'aty.

¹⁴Pën tu'uk yë yajkutujkpë ka'ap oy y'ëne'emy, yë naax kajpn o'ktëy jyäty kyëpety; ënät winë oy wyimpëtsëmy jyëjpëtsëmy ko nyimay'atë mëti'ipë najts'ë'ëw najtskajpxëtëpën.

¹⁵Ëxëëk wyimpëtsëmy jyëjpëtsëmy ko nyajnu'kxmëty yë ja'ay mëti'ipë ka'ap n'ixy'ajtëmën, mëti'ipë ja'ay ka'ap tii timnyi'ëtsoyën nu'kxy nikë jotkujk yajpaaty.

¹⁶Yë to'oxytyëjk mëti'ipë oy määpy tajpën, kumay nyäxy, yë naaxwiinyëtë ja'ay mëti'ipë pe'tymyën, pyätyp winë mëj këjää.

¹⁷Mëti'ipë ja'ay pa'ëyoop najts'ëyo'owëpën, nätsyojkëp jëtu'un kë'ëm; e mëti'ipë ëxëëk ja jyot wyinma'anyën, kë'ëm nyäy'ëxëëktunyë.

¹⁸Yë ëxëëk ja'ay ko nyätyijyë yajmëjuy, je'eyë yajtukwin'ëëny yë myëju'uny; yë ja'ay mëti'ipë winë oy tyuunpyën, kä'pxy t'ëxajë myëju'uny.

¹⁹Ko ja mëtëypyë ja nipaye'eyën jä'ä npanëjkxmëty, jam xyajnëjkxmëty ma juukyajtën yajpaatyën; e ko ëxëëkpë npanëjkxmëty, jam xyajnëjkxmëty ma ja o'kën yajpaatyën.

²⁰Tios y'ëxëëk'ijxyp yë ja'ay mëti'ipë ëxëëk jot winma'anymyëët'ajtypyën; e mëti'ipë oy winë tyuun kyajpxtëpën janty'oy tsoky tjawë.

²¹Tëyajtën yë'ë ko yë ëxëëk ja'ay ka'ap jëtu'unyë nyinaxa'any, kyumëtowäämpy yë pyoky. Yë wa'ats ja'aytyëjk akujk jotkujk yajpëjkta'aka'antë ëwaatsëtum.

²²Jëtu'un tä tu'uk pu'ts pujxnkë'ëjiitsën mëti'ipë jam ijtpën ma ëtsëm yë jyëjpën, jëtu'un yë to'oxytyëjk nyäxy mëti'ipë këxë'kpën oy ets ka'ap yajxon winë tmay tajy.

²³Mëti'ipë wa'ats ja'aytyëjk tsyojkën'ajtëpën oy wyimpëtsëmy, mëti'ipë yë ëxëëkja'aytyëjk tsyojkën'ajtëpën, je'eyë yajoot'anpëky.

²⁴Tää ja'ay mëti'ipë ka'ap tii tpa'ëyoyën ko tii tyäky, ko tii tpaaty mëj këjää t'ëxajë; näy tää ja'ay mëti'ipë wintukën, ko wyintukëty ni'ikyë y'ëyoowtëkë.

²⁵Ja'ay mëti'ipë ayajk ako'onëpën, ni'ikyë jyotkujktä'äky; mëti'ipë winë yäjkpyën, näjyëtu'un winë t'ëxajë.

²⁶Mëti'ipë ja'ay yu'tsypyën yë tsajpmok, pojkëp yë ja'ay; e mëti'ipë tsyojkypyën, oyjya'awëyëp ja'ay.

²⁷Mëti'ipë ja'ay oy winë tyuunpyën, oy ja'ay jyawëty; e mëti'ipë ëxëëk winë tyuunpyën, ëxëëk ja'ay y'ixyë.

²⁸Mëti'ipë ja'ay yi'iyë tyuk'ijxpejtypyën yë wyit myeeny, jëtu'un nëjkx jyäty tä aaytyë'ëts ujtstë'ëtsën; e yë oyjyä'äytyëjk jëtu'un xëmë yajpaata'antë tä yë aay ujts tsyuxk'ityën.

²⁹Mëti'ipë ja'ay ka'ap yë jyëën tyëjk tkëwent'atyën, ka'ap jap tii wyë'ëma'anxëty; yë tsuuja'ay xëmë nëjkx je'eyë tuunpë wyä'äny ma wijyjyä'äytyëjkën.

³⁰Yë tëypyë nipaye'eyën, juukyajtën yäjkpy; e tsiptu'un tsipkajpxën yë'ë yaj'atëkoopy.

³¹Pën wa'ats ja'ay y'ëxajëp yë myëju'uny yaa naaxwiiny naaxkëjxy, näjyëtu'un yë ëxëëkja'aytyëjk kopkpëky ko tkumëtowtë yë pyoky.