Read Biblia Mixe de Quetzaltepec Proverbios 12 Bible Online

Proverbios 12 - Biblia Mixe de Quetzaltepec bible

Proverbios 12

¹Ko yaj'oyjyawë yë nätyu'uwinwow nätyu'uwinwitsë, wijyajtën ënäty yajtsojkën'ajtp; e ko yaj'ëxëëkjawë yë nätyu'uwinwow nätyu'uwinwitsë, tsuu'at ënäty nikëxë'kp.

²Yë oyjyä'äy, tsojkëp yë Tios, e yë ëxëëk ja'ay pokytyum yajpëjktä'äky.

³Yë ëxëëkajtën ka'ap jeky tyaj'ity; yë wa'ats ja'aytyëjk ta'tspëky yajpaatë.

⁴Yë to'oxytyëjk mëti'ipë wijyën, mëj'äämpy yë nyiye'etyëjk tyajnaxy; e yë to'oxytyëjk mëti'ipë tsuujën, ëxëëk yë nyiye'etyëjk tyajjaty.

⁵Yë wa'ats ja'aytyëjk yë'ë myëmaay myëtajtëp yë tëyajtën jaanty'ajtën; e yë ëxëëkja'aytyëjk yi'iyë myëmaay myëtajtëp wi'ix wyin'ëën wyinxajtëtyën.

⁶Ko yë ëxëëk ja'ay kyäjpxy kutsë'ëkë yë'ë, e ko yë wa'ats ja'ay kyäjpxy yë'ë yäjkpy yë nitsokën.

⁷Yë ëxëëkja'aytyëjk mëët nëjkx tu'kë'ëyë y'u'unk y'ëna'k y'o'kta'atë; e yë wa'ats ja'aytyëjk nëjkxëp yë y'u'unk y'ok jeky jyuuky'atë.

⁸Yë'ë muum yë ja'ay yajtuk'oyjya'ap ko wyijyëty kyujkëty; e yë ja'ay mëti'ipë winma'anytyukën, ixtijy ëxwa'any nyäxy.

⁹Oypyëtsëëmp ko ja'ay ku'uxyë pën yajkayë, oy pën kyamëjpëjktä'äkyë; këtii ko ja'ay janty mëj nyäxy ets ka'ap oy kyäy y'uuky.

¹⁰Yë wa'ats ja'ay wyinja'ap ko jëyujk jya'ap winë, yë ëxëëk ja'ay ka'ap tnijawë tii yajtijp näpya'ëyowë.

¹¹Mëti'ipë ja'ay yajtuumpyën nyaax kyam, ka'ap tyëkoy'ajtxëty yë jyi'kxy pyiky; e yë ja'ay mëti'ipë tsuujën, yë'ë tyuunk'ajtyp mëti'ipë ka'ap nimaa tuk'oy'atëtyën.

¹²Mëët ko yë ëxëëkja'aytyëjk tëkatsy winë tsojkën'atë, ëxëëk tmëjatë; e ko wa'ats ja'aytyëjk tii tsojkën'atë, kopkpëky ko tpaata'antë.

¹³Yë ëxëëk ja'ay kë'ëm nyäyajkujo'opyë ko tii ka'ap mëtëy tnikäjpxy; e tu'uk yë wa'ats ja'ay oy winë tukpëtsëmy ma nyäjyawëtyën tsiptuuy kya'aja'any.

¹⁴Tu'uktu'uk yë ja'ay jëtu'un tii tpaaty ijxtëm tii tnimëtyä'äkyën; ets jëtu'un yajmëjuy ijxtëm tii tunyën.

¹⁵Yë tsuuja'ay jëtu'un myäy tyäjy ko tëkokyë mëti'ipë tyuunpyën aak'oy yë'ë; e yë wijyjyä'äy myëtoow'ijtyp ko yaj'ëëwijy yajkajpxwijy.

¹⁶Yë tsuuja'ay pojën tyajnikëxë'ëky ko jyoot'anpëky; e yë këpetyjyä'äy jëtu'un tyajnaxy tä pyojyën ko pën yajjoot'anpëkyë.

¹⁷Ja'ay mëti'ipë tii mëtëy të t'ixyën, mëtëy tii tnimëtyä'äky, e mëti'ipë ka'ap tii të t'ixyën je'eyë nëkoo y'antä'äky.

¹⁸Tää yë ja'ay mëti'ipë tsaatsy ma'at ëëp kajpxpën; e ko kyajpxtë yë wa'ats ja'aytyëjk, yë'ë jatëkok winë yaj'o'oyëtëp.

¹⁹Pën mëtyakpën tëyajtën xëmë y'ita'any; e mëti'ipë je'eyë antakpën, wäänë jyuuky'ata'any.

²⁰Ma ja ëxëëkja'aytyëjk winë tnimay tnitajëtën yë'ë jam yajpatp win'ë'ënën, e ma ja wa'ats ja'aytyëjk tii tnimëtya'aktën jotkujk'ajtën jam ets xoontakën.

²¹Yë wa'ats ja'ay nijëna'a ëxëëk kyajaty kyakëpety, e yë ëxëëk ja'ay tu'kë'ëyë nëjkx tsëëmnajxta'ay ja ëyo'on jotmay.

²²Yë Tios y'ëxëëk'ijxyp yë ja'ay mëti'ipë antakpën, e mëti'ipë winë mëtëy tyuunpyën, yë'ë y'oyjya'ap.

²³Yë ixpëkyjyä'äy ka'ap janty jëtu'un tnikäjpxy tnimëtyä'äky ko tii tjaty tnijawë, e yë tsuuja'ay nimay yë ja'ay tuk'ixy ko tii tuny nitsuu nipoj.

²⁴Mëti'ipë ja'ay tuunpën, kopkpëky ko myëta'aka'any, e mëti'ipë nuuxën, yë'ë yajmëmëta'akaanp.

²⁵Yë monyëtukyë je'eyë ja'ay ëxëëk tyajnäjyawëty; e ko pën oy myëxony myë'ityë, tääts jyotkujkë.

²⁶Yë wa'ats ja'ay jä'ä y'ity tu'uwinwoopë ma ja myëku'ukën; yë ëxëëk ja'ay jëtu'unyë nyë'ëtëkoy tyu'utëkoy.

²⁷Yë jëyujk majtspë mëti'ipë nuuxën, nijëna'a tii tkamatsy; e yë ja'ay mëti'ipë pe'tymyën, pyätyp y'ijxyp mëj këjää ja wit meeny.

²⁸Ko në'ë tu'u yajye'ey mëti'ipë mëtëyën, tukpatp yë juukyajtën; e ko jä'ä ja në'ë tu'u yajye'ey mëti'ipë tsuuja'aytyëjk ye'eytyëpën, o'kën yajpatp.