Read Biblia Mixe de Quetzaltepec Proverbios 19 Bible Online

Proverbios 19 - Biblia Mixe de Quetzaltepec bible

Proverbios 19

¹Nikë oy ko ja'ay y'ëyoy ets mëtëy jyuuky'äty, ets këtii ko tsuu poj jyä'äy'äty ets ëxëëk ja jot winma'any tmëëtëty.

²Ka'ap y'oyëty ko tii mëj këjää ntsojkën'ajtmëty ets ka'ap jëyëjp nmëma'ay nmëtajmëty. Ko janty tsojkyë winë nyajwintu'upëka'anmëty, jëna'ajëty ka'ap oy wyimpëtsëmy.

³Mëët yë'ë ko ja'ay tsyuujëty, paaty nyë'ëtëkoy tyu'utëkoy; ets ko jëtu'un jyäty, Tios pyoky'ijxyp.

⁴Ko jyam'aty ja wit meeny, nimay ja jëëky mëku'uk kyëxë'ëky; e ëyoopëja'ay ja myëku'uk tu'kpajkpë, ni'ikyë pyuwa'ktu'utyë.

⁵Ja'ay mëti'ipë tii tëkatsy nyikäjpxypën ets ka'ap kë'ëm të t'ixy kopkpëky ko tkumëtowëty. Mëti'ipë ja'ay je'eyë antakpën, ka'ap muum oy pyëtsëmëty.

⁶Mëti'ipë ja'ay nyayäjkpyën winë ets ka'ap tii nyätyukwintuk'ookyë, aak ixtaayëp yë ja'ay ets aak oyjya'awëyëp.

⁷Pën ëyoopë yë ja'ay, yë'ëpaat yë myëkä'äx ka'ap y'oyjyawëty; ni'ik mëti'ipë je'eyë mëët oy nyäjyawëtyën, poj'am nyawa'ktu'utyë.

⁸Mëti'ipë ja'ay tuunkjajtpën ets tyajtuny mëti'ipë jyäjtypyën, kë'ëm nyätsyokyë ets kë'ëm nyätyukputëkëty.

⁹Ja'ay mëti'ipë tii tëkatsy nyikäjpxypën ets ka'ap kë'ëm të t'ixy kopkpëky ko tkumëtowëty; Mëti'ipë ja'ay je'eyë antakpën, yë'ë ëwxijtëp o'kën.

¹⁰Tu'uk yë ja'ay mëti'ipë tsuujën, ka'ap pyääty nyitëkëty ets tii winë tmëët'atëty mëti'ipë tsowën; ni'ik mëti'ipë mëtuunpë juyën ka'ap tjëkyepy t'ënä'ämëty naax kajpn mëjatypë.

¹¹Yë wijyajtën jam nyikëxë'ëky ko ja'ay myä'kxtuky oy jyoot'anpëky, ets mëj'äämpy ja'ay nyäxy ko ka'ap tmëjpëjktä'äky oy pën y'ëxëëkmëkäjpxyë.

¹²Ko tu'uk yë mëj ënä'ämpë jyoot'anpëky, jëtu'un yë'ë tä tu'uk yë mëj kaa nyiitsyën; e ko oy nyäjyawëty, jëtu'un tä yë maanik kyä'äyën ujtskëjxy.

¹³Ko tu'uk yë u'unkteety ka'ap niwi'ixtsow yë myaank jyä'äkyukë, ni tu'kjënu'un jotkujk kyayaj'ityë; e ko ënät yë tyo'oxytyëjk je'eyë ëxëëk jyä'äy'äty, ëtyä'äkyë'äämpy yë nyiye'etyëjk tyajma'të jyuukyajtën.

¹⁴Yë taak teety yë'ë yajktëp ja jëën tëjk ets wit meeny, e Tios yë'ë yäjkpy kutëjk wijypyë.

¹⁵Yë nuux'at je'eyë ma'ayë tyukpaaty; e yë ja'ay mëti'ipë nuuxën, kë'ëm nyäyaj'ayuu'atyë.

¹⁶Mëti'ipë ja'ay kyuuytyuunpyën yë ënä'ämën tëyajtën, yë jyuukyajtën kyëwent'ajtyp; mëti'ipë ja'ay ka'ap tkupëkyën mëti'ipë ja Tios jyanikäjpxypën, kë'ëm nyäyaj'ooky nyäyajtëkoyë.

¹⁷Ko yë ëyoopëja'ay tii ntuk'ënu'kxmëty, Tios ënäty winë yajtuk'ënu'kxp, yë Tios yë'ë nëjkx kë'ëm jëna'a tkujuy ja nu'kxy.

¹⁸Tukumëtow ja m'u'unk ma winë oy tkatunyën ma tyam tjëkyepyën; e ko xytyukkumëtowëty këtii ënät xytyimyaj'ookaanpëty.

¹⁹Mëti'ipë ja'ay poj'am joot'anpëjkpën o'ktëy jyäty kyëpety; ko nkajëjpwijtswinpijtmëty, ni'ikyë y'o'ktë.

²⁰Ja'akyukë ja näy'ëëwij näkyajpxwijë ets kupëk ko ënäty pën mtuk'ënë'ëmxëty ma winë oy xykyatunyën; jëtu'un xyajkëxë'ëkëty ko ënäty mwijyëty.

²¹Yë ja'ay kanaakpëky winë tnimay tnitajë, e yi'iyë tyuunpy mëti'ipë Tios të tyajkutukyën.

²²Ko ja'ay tii t'atsoky, ëxëëk tmëjaty tmëkëpety. Ni'ik oy ko ëyoopëja'ay yajpaaty ets këtii ko je'eyë kyë'ëtsik'aty.

²³Ko yajwinkutsë'ëkë yë Tios yajpatp yë juukyajtën; jotkujk ja'ay jyuuky'äty ets ka'ap tii ëxëëkpë pyäätyë.

²⁴Yë ja'ay nuuxpë jotkujk kyë'ë t'atijë texyjoty, e ka'ap y'ëkjotkujk'ajnë ko jam tjajë'kxanë.

²⁵Ko yajtukumëtoy yë pyoky mëti'ipë ninu'un kaja'akyujkëpën, jää tjaty winë yë tsuuja'ay; yë wijyjyä'äy je'eyë winë yajtuk'ënëëmë tääts tjaty.

²⁶Ko ëxëëk ntu'unmëty ja ëyoopëja'ay, ets ko n'ixkäjxmëty ja taak tsi'tsk ma jëën tëjkën, yë'ë ënäty tu'uk ja mëj tsëtyu'un yajpatp yaj'ijxp, ets ka'ap jëtu'un pyääty nyitëkëty ja u'unk ëna'k y'ëtë'ëtsëty.

²⁷U'unk maay, pën mijts ka'ap xy'oyjyawë ko pën tii mtuk'ënë'ëmxëty, jä'ä ënäty m'ëxmajtsyp ja oypyë ja ëëwwijën kajpxwijën.

²⁸Yë ja'ay mëti'ipë ënaanpën ko tëë tii t'ixy tnijawë ets y'antä'äky yë'ë tyukxikpy ja oypyë ja nänyipaye'eyën. Yë ëxëëk ja'ay jam tyajpëtsëmy ja ëxëëk jot ëxëëk winma'any ma ja wyiin y'aawën.

²⁹Jëjp'ixy jam ja kepy tyim'itë mëti'ipë yajtukwopantëpën ja ja'ayëty ka'apë jyä'äkyukëtën; näwyopë itaanp ma ja tsuuja'ay ja jyëxkëtyën.