Read Biblia Mixe de Quetzaltepec Proverbios 2 Bible Online

Proverbios 2 - Biblia Mixe de Quetzaltepec bible

Proverbios 2

¹U'unk maay, mijts jä'ä'at yë n'aaw n'ayukës. Pëjkë'ëk ma mjot mwinma'anyën yë n'ënä'ämënës ntëyajtënës.

²Yë'ë mkopk mtatsk mtuk'akonëp yë wijyajtën; pëjkta'ak jam yë mjot mwinma'any ma këpety'ajtënën.

³Amëtow pëjktsow amëjaaw yë këpetyajtën ets wijy'ajt kujk'ajtën.

⁴Amuumtu'ukjot yë'ë tim ixta'a jëtu'un ijxtëm jeexyë xy'ixta'ayën yë wit meeny mëti'ipë muum yu'utsy ijtpën.

⁵Jää yajxon xyjyä'äkyukëty wi'ix yë Wintsën yajwinkutsë'ëkëja'anyën, ets xynyijawëty wi'ix yë Tios yaj'ixy'ätyën.

⁶Tios yë'ë yäjkpy yë wijyajtën ets yë'ë nyikäjpxyp yë nija'awën ets ixpëkyajtën.

⁷Tios pyutëjkëp ets y'ijx'ijtyp Kyëwent'ajtyp yë ja'ay mëti'ipë oy tsuj juukyajtpën ets ka'ap tii tuuntëkoy tkajpxtëkoy.

⁸Kyëwent'ajtyp mëti'ipë ja tëyajtën kyuuyjyuuky'äjtypyën, ets kyuwäämpy ja mëti'ipë oy mëtuunëpën.

⁹Nëjkxëp xynyijawë mëti'ipë tëyajtënën ets mëti'ipë oyën, nëjkxëp xyjyä'äkyukë mëti'ipë mëtëyën.

¹⁰Yë mjot mwinma'any ujts nëjkx y'ity mëët yë wijyajtën, ets ja nija'awën yë'ë nëjkx tyajjotkujktä'äky yë mjot mwinma'any.

¹¹Ja wijyajtën ets ja këpetyajtën yë'ë nëjkx mkëwent'atyë.

¹²Yë'ë myajtso'okëtëp ma ëxëëk në'ë ëxëëk tu'ujën, ets ma ja'ayëtyën mëti'ipë ëxëëk yë jyot wyinma'anyëtyën,

¹³Mëti'ipë myajtstutëpën në'ë aaw tu'u aaw oypyë ets ënät jä'ä tpanëjkxnëtë ja në'ë tu'u kupi'its kukootspë,

¹⁴mëti'ipë jotkujk näjya'awëtëpën ko tii tuuntëkoy tkajpxtëkoytyë ets ënät tnixëëwtuntë ko tsaatsyëty ma'atëty y'ëtë'ëtstë y'ëna'antë.

¹⁵Jam nyaxtë tyëkëtë ma ja në'ë tu'ujën ka'apë myëtëyëtyën, ja në'ë tu'u mëti'ipë mëtëyën tëë t'ëxmatstë.

¹⁶Nëjkxëp myaj'ëwaatsëpëtsëmyë ma ja wiink to'oxytyëjkën, ja to'oxytyëjk mëti'ipë janty'oy yajmëtoopën kyäjpxy myëtyä'äky,

¹⁷mëti'ipë y'ëxmajtsypyën ja jyiiky myëku'uk mëti'ipë tu'ukyë mëët y'ëna'k'ajtyën, ets të tja'atyëkooynyë ja wyaantakën ma Tiosën.

¹⁸Ko ja ja'ay jam nyijkxy ma jëtu'unpë ja to'oxytyëjkën, jëtu'un tpaaty tä jeexyë jam nyijkxyën ma o'ktaknën.

¹⁹Mëti'ipë jam tëjkëtyëpën ma ja jëtu'unpë ja to'oxytyëjk ja jyëën tyëjkën, ka'ap nijëna'a y'ëkwinpijnëtë, nijëna'a jam kya'ëknajxnëtëty ma ja në'ë aaw tu'u aawën mëti'ipë ja juukyajtën tukpatpën.

²⁰Paaty, mijts, panëjkx yë në'ë tu'u oypyë, ets yë'ë tun mëti'ipë tëyajtënën.

²¹Jä'ä ko mëti'ipë juuky'ajtëpën mëët ja tëyajtën, xëmë jyuuky'ata'antë yaa naaxwiiny.

²²E yë ja'ayëty mëti'ipë ëxëëk ja'ay'ajtëpën ets je'eyë yë jyiiky myëku'uk tnikäjpxytyunëtë, nëjkxëp yaj'ixkäxtë ets yaj'ëxwoptë yaa naaxwiiny naaxkëjxy.